ʼE Koutou Lagolago Koa Ke Fai He Tānaki Gāue ʼe Totonu?
1 ʼE lahi te ʼu fakamatala ʼi te Tohi-Tapu ʼe tohi ai te ʼu mataʼi numelo, moʼo tokoni mai ke kita ʼiloʼi lelei te ʼu faʼahi ʼaē ʼe pipiki ki te hisitolia. Ohage la, neʼe mālo ia Seteone ʼi te kau Matiane, ʼaki pe tana kau solia e toko 300. (Kfm. 7:7) Neʼe matehi e te ʼaselo ʼa Sehova te toko 185 000 kau solia Asilia. (2 Hau 19:35) ʼI te Penikosite ʼo te taʼu 33 ʼo totatou temi, ko te teitei toko 3 000 hahaʼi neʼe papitema, mole fualoa pea tuputupu te hahaʼi tui ʼo nātou toko 5 000. (Gaue 2:41; 4:4) ʼE hā lelei mai ʼi te ʼu fakamatala ʼaia, ko te ʼu kaugana ʼa te ʼAtua ʼo te temi muʼa, neʼe nātou faiga lahi ke nātou tānaki pea mo tohi he fakamatala ʼe katoa pea mo totonu.
2 Ia ʼaho nei, ʼe fakatotonu mai e te kautahi ʼa Sehova ke tou tohi tatatou gāue fai faka mafola ʼi te māhina fuli. Ko tatatou lagolago agatonu ki te fakatuʼutuʼu ʼaia ʼe feala ai ke tokaga lelei ki te gāue fai faka mafola. ʼAki te ʼu pepa tānaki gāue ʼe feala ai ke ʼiloʼi te faʼahi ʼaē ʼe tonu ke tokagaʼi ʼi te minisitelio, peʼe lagi ʼaoga he kau gāue ʼe lahi age ʼi he koga meʼa. ʼI te kokelekasio, ko te ʼu pepa tānaki gāue ʼe tokoni ki te ʼu tagata ʼāfea ke nātou ʼiloʼi ia nātou ʼaē ʼe feala ke lahi age tanatou gāue, ʼo feiā mo nātou ʼaē ʼe lagi ʼaoga anai kiai he tokoni. Pea ko te ʼu tānaki ʼo te tuputupu ʼo te gāue fai faka mafola ʼo te Puleʼaga ʼe fakaloto mālohi ai ki te fale tautēhina faka Kilisitiano katoa. ʼE koutou lagolago koa ke fai he tānaki gāue ʼe totonu?
3 Tokotou Maʼua Takitokotahi: ʼI te fakaʼosi ʼo te māhina, ʼe faigataʼa koa kia koutou takotou manatuʼi te ʼu meʼa ʼaē neʼe koutou fai ʼi te minisitelio? Kapau koia, pea he koʼe koa ʼe mole koutou tohi takotou gāue ʼi te temi fuli pe ʼaē ʼe koutou kau ai ki te fai faka mafola? Ko ʼihi ʼe nātou fakaʼaogaʼi he kaletalio peʼe ko he kalane. Ko ʼihi ʼe nātou toʼo mo nātou he pepa tānaki gāue ʼe mole heʼeki tohi ai he meʼa. ʼI te fakaʼosi ʼo te māhina, koutou foimo liufaki takotou pepa tānaki ki te tēhina taupau ʼo takotou ako tohi. Peʼe lagi koutou leleiʼia age hakotou tuku takotou kiʼi pepa tānaki ki te puha ʼi te Fale ʼo Te Puleʼaga. Kapau ʼe galo kia koutou te liufaki ʼo takotou kiʼi pepa tānaki, koutou foimo fakahā age ki te tēhina taupau ʼo takotou ako tohi, kae ʼaua naʼa koutou atalitali ke ʼalu atu kia koutou ʼo ʼuhiga mo te faʼahi ʼaia. Ka koutou tohi fakalelei takotou gāue pea ʼe koutou fakahā ai ʼe koutou fakaʼapaʼapa ki te fakatuʼutuʼu ʼa Sehova, pea mo koutou ʼofa ki te ʼu tēhina ʼaē neʼe hinoʼi ke nātou tae pea mo tānaki ia te ʼu hola.—Luka 16:10.
4 Te Gāue ʼo Te Tēhina Taupau Ki Te Ako Tohi: Ohage ko he tagata tauhi ōvi ʼe leʼoleʼo pea mo tuʼania ʼo ʼuhiga mo tana ʼu ōvi, ko te tēhina taupau ki te ako tohi ʼe ina fia ʼiloʼi te gāue ʼaē ʼe fai e tana ako tohi lolotoga te māhina. (Taag. 27:23) ʼE ina ʼiloʼi peʼe nātou kau tuʼumaʼu pea mo lahi tanatou fai faka mafola, pea mo nātou fiafia ai pea ʼe ina foimo foaki he tokoni mo kapau neʼe ʼi ai he tahi neʼe mole kau ki ai ʼi te māhina katoa. ʼI te agamāhani ʼe foaki anai he tokoni ʼe fakaloto mālohi pea mo ʼaoga, peʼe ko he fakaafe ke nā kaugā fai faka mafola fakatahi.
5 ʼI te fakaʼosi ʼo te māhina, ʼe tonu ke ʼiloʼi papau e te tēhina taupau ʼo te ako tohi peʼe kua tohi pea mo liufaki e tana ako tohi katoa tanatou pepa tānaki gāue, ke feala ai ki te tēhina sikalaipe ke ina momoli he tānaki gāue ʼe totonu ki te filiale ʼi te ʼaho ono ʼo te māhina ka hoa mai. ʼI te vave fakaʼosi ʼo te māhina, ʼe lagi lelei ke ina fakamanatuʼi te faʼahi ʼaia ki tana ako tohi, pea ke ʼi ai he ʼu pepa tānaki gāue ʼi te koga meʼa ʼaē ʼe fai ai te ako tohi. Kapau ʼe tau galo ia ʼihi ke nātou tohi tanatou gāue, pea ʼe feala ke ina fai he ʼu fakamanatu pea mo he fakaloto mālohi.
6 Ko te momoli tautonu ʼo takotou ʼu pepa tānaki, ʼe tokoni ai ki he tānaki ʼe totonu ʼo te gāue fai faka mafola. ʼE koutou lagolago anai koa ʼi te māhina fuli, ʼo foimo tohi takotou kiʼi pepa tānaki gāue?