Tou Kalagaʼi Te Logo ʼo Te Puleʼaga
1 “ ʼE tonu ke ʼau . . . faka mafola te logo lelei ʼo te puleʼaga ʼo te ʼAtua . . . , heʼe ko te tupuʼaga la ʼaia ʼo toku fekauʼi mai.” (Luka 4:43, MN ) ʼAki te ʼu kupu ʼaia, neʼe fakahā ai e Sesu te kupu tāfito ʼo tana minisitelio—Te Puleʼaga ʼo te ʼAtua. Ko te logo ʼaē ʼe tou kalagaʼi ia ʼaho nei, ʼe toe talanoa tāfito ki te Puleʼaga, ohage ko tona fakakikite ia Mateo 24:14, MN: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” Koteā te ʼu moʼoni ʼo ʼuhiga mo te Puleʼaga ʼo te ʼAtua ʼaē ʼe maʼua ke logo kiai te hahaʼi?
2 ʼI te temi nei, ko te Puleʼaga ʼo te ʼAtua ʼe pule mai selo, pea kua ina vave fetogi anai te ʼu puleʼaga faka tagata. Kua ʼosi kapu ifo te Tevolo mai te lagi, pea kua kamata te ʼu ʼaho fakamuli ʼo te tuʼu agakovi ʼaenī. (Apk. 12:10, 12) Ko te tuʼu ʼāfea mo agakovi ʼa Satana ʼe fakaʼauha katoa anai, kae ʼe haga tuʼu pe anai te Puleʼaga ʼo te ʼAtua, ʼo talu ai.—Tan. 2:44; Hep. 12:28.
3 ʼE fakafimālie anai e te Puleʼaga te loto ʼo te hahaʼi fakalogo fuli pe. ʼE ina pulihi anai te ʼu mamahi ʼaē ʼe tupu ʼaki te ʼu tau, mo te fai fakapō, mo te agakovi, pea mo te masiva. (Pes. 46:8, 9; 72:12-14) ʼE tapuke anai te meʼa kai maʼa te hahaʼi fuli pe. (Pes. 72:16; Isa. 25:6) ʼE mole toe ʼi ai anai he ʼu mahaki pea mo he ʼu māʼimoa. (Isa. 33:24; 35:5, 6) ʼI te liliu māmālie ʼa te hahaʼi ʼo maʼuli haohaoa, ʼe liliu anai te kele ko he palatiso, pea ʼe maʼuli fakatahi anai te hahaʼi pea mo felogoi tahi.—Isa. 11:6-9.
4 ʼE hā tatatou fia fakalogo ki te Puleʼaga ʼo te ʼAtua ʼi te faʼahiga fakaʼaogaʼi ʼo totatou maʼuli ʼi te temi nei. ʼE tonu ke malave te logo ʼo te Puleʼaga ki totatou maʼuli katoa, ʼo kau ai mo tatatou ʼu fakatuʼutuʼu pea mo te ʼu meʼa ʼe tou fakamuʼamuʼa. Ohage la, logola ʼe maʼua ke tou tokaga ki te ʼu meʼa ʼaē ʼe ʼaoga ki totatou loto fale, kae ʼe mole feala ke tou tuku te tuʼania ki te ʼu faʼahi fakasino ke maʼuhiga age ʼi te ʼu gāue ʼo te Puleʼaga. (Mat. 13:22; 1 Tim. 5:8) ʼE tonu ke tou manatuʼi te fakatotonu ʼaenī ʼa Sesu: “Ke koutou haga kumi muʼa te puleʼaga pea mo tona faitotonu, pea ʼe toe foaki atu anai mo te ʼu meʼa fuli ʼaia kia koutou [te ʼu meʼa fakasino ʼaē ʼe ʼaoga ki te maʼuli].”—Mat. 6:33, MN.
5 ʼE maʼuhiga ʼaupito ke logo te hahaʼi pea ke nātou mulimuli ki te logo ʼo te Puleʼaga, heʼe kei maʼu te temi. ʼOfa pe ke tou tokoni kia nātou ke nātou fai feiā, ʼo tou “faigai te fakamooni o uhiga mo te Puleaga o te Atua.”—Gaue 19:8.