Tou Fakahā Te Huafa ʼo Te ʼAtua Ki Te Hahaʼi
1. ʼE malave feafeaʼi ki te hahaʼi tanatou ʼiloʼi te huafa ʼo te ʼAtua?
1 Neʼe feafeaʼi tokotou loto ʼi te temi ʼaē neʼe koutou ʼuluaki logo ai ki te huafa ʼo te ʼAtua? Tokolahi neʼe nātou hage ko te fafine ʼaē neʼe ina ʼui fēnei: “Neʼe ʼau tagi ʼi taku ʼuluaki sio ʼaē ki te huafa ʼo te ʼAtua ʼi te Tohi-Tapu. Neʼe malave ʼaupito kia ʼau ia te ʼatamai mālama, he neʼe feala ai ke ʼau ʼiloʼi moʼoni pea mo fakaʼaogaʼi te huafa ʼo te ʼAtua.” Ki te fafine ʼaia, ko tana ʼiloʼi te huafa ʼo te ʼAtua neʼe ko he faʼahi maʼuhiga ke feala ai hana ʼiloʼi ia Sehova pea ke feala hana fakatupu he ʼu felogoi mo ia.
2. He koʼe ʼe maʼuhiga ke tou akoʼi ki te hahaʼi peʼe ko ai ia Sehova?
2 He Koʼe ʼe Tonu Ke Fakahā Te Huafa ʼo Te ʼAtua Ki Te Hahaʼi? Ka tou ʼiloʼi te huafa ʼo te ʼAtua pea ʼe tou ʼiloʼi ai mo tana ʼu kalitate, tana ʼu fakatuʼutuʼu, mo tana ʼu gāue, pea mo te hāofaki. Neʼe tohi fēnei e te ʼapositolo ko Paulo: “Ko ia ʼaē ʼe fetapā ki te huafa ʼo Sehova ʼe hāo anai ia.” Kae neʼe fehuʼi e Paulo peʼe “nātou fetapā feafeaʼi anai kia ia” mo kapau ʼe mole akoʼi muʼa ki te hahaʼi ʼo ʼuhiga mo Sehova pea mo nātou tui kia te ia? Koia ʼe maʼuhiga ke fakahā e te kau Kilisitiano te huafa ʼo te ʼAtua ki te hahaʼi pea mo te ʼu faʼahi fuli ʼaē ʼe pipiki ki te huafa ʼaia. (Loma 10:13, 14, MN ) Kae ʼe ʼi ai te tahi tupuʼaga ʼe lahi age ʼe tonu ai ke ʼiloʼi e te hahaʼi te huafa ʼo te ʼAtua.
3. Koteā te tupuʼaga tāfito ʼo tatatou fai faka mafola?
3 ʼI te ʼu taʼu 1920, ʼaki te Tohi-Tapu, ko te hahaʼi ʼa te ʼAtua neʼe nātou mahino ai ki te fehuʼi maʼuhiga ʼaē ʼe pipiki ki te lagavaka ʼo te pule faʼifaʼitaliha ʼo te ʼAtua pea mo te fakamaʼa ʼo tona huafa. ʼI muʼa ʼo te fakaʼauha e Sehova te hahaʼi agakovi moʼo molehi te ʼulihi ʼo tona huafa, ʼe tonu ke “fakaʼilo ki te hahaʼi” te moʼoni ʼo ʼuhiga mo ia. (Isa. 12:4, 5; Esk. 38:23) Koia ko te tupuʼaga tāfito ʼo tatatou fai faka mafola ʼe ko te fakavikiviki kia Sehova ia muʼa ʼo te hahaʼi pea mo tāpuhā tona huafa ʼi te kele katoa. (Hep. 13:15) Ko totatou ʼofa ki te ʼAtua pea mo totatou kāiga, ʼe ina uga anai tatou ke tou kau lahi ki te gāue ʼaē neʼe fakatotonu mai e te ʼAtua.
4. He koʼe kua ʼiloʼi te kau Fakamoʼoni ʼa Sehova ʼaki te huafa ʼo te ʼAtua?
4 “He Hahai Ki Tona Huafa”: ʼI te taʼu 1931, neʼe tou toʼo te higoa ʼaē ko te kau Fakamoʼoni ʼa Sehova. (Isa. 43:10) Talu mai ai, neʼe lahi ʼaupito te fakahā e te hahaʼi ʼa te ʼAtua tona huafa, koia ʼe ʼui fēnei ai te tohi Prédicateurs, ʼi te pasina 124: “ ʼI te kele katoa ko ia ʼaē ʼe ina fakaʼaogaʼi māhani te huafa ʼo Sehova ʼe ʼiloʼi atu aipe ʼe ko te Fakamoʼoni ʼa Sehova.” ʼE moʼoni koa te faʼahi ʼaia ʼo ʼuhiga mo koutou? Ko te loto fakafetaʼi ki te agalelei ʼa Sehova ʼe tonu ke ina uga tatou ke tou ‘tāpuhā tona huafa,’ ke tou palalau ʼo ʼuhiga mo ia ʼi te ʼu temi faigamālie fuli pe.—Pes. 20:7; 145:1, 2, 7.
5. ʼUhi heʼe tou toʼo te huafa ʼo te ʼAtua ʼe tonu ke feafeaʼi tatatou aga?
5 ʼE tonu ke tou lagolago ki tona ʼu lekula, heʼe ko tatou ko “he hahai ki tona huafa.” (Gaue 15:14; 2 Tim. 2:19) ʼI te agamāhani, ʼe ʼuluaki tokagaʼi e te hahaʼi te agalelei ʼa te kau Fakamoʼoni ʼa Sehova. (1 Pet. 2:12) ʼE mole tou fia ʼulihi anai tona huafa ʼaki hatatou maumauʼi te ʼu pelesepeto fakaʼatua, peʼe mole kei tou fakamuʼamuʼa tona tauhi ʼi totatou maʼuli. (Lev. 22:31, 32; Mal. 1:6-8, 12-14) Kae ke tou fakahā ʼi totatou maʼuli ʼe maʼuhiga kia tatou te pilivilesio ʼaē ke tou toʼo te huafa ʼo te ʼAtua.
6. Koteā te pilivilesio ʼaē ʼe feala ke tou maʼu ʼi te temi nei ʼo talu ai?
6 Ia ʼaho nei, ʼe tou sio ki te fakahoko ʼo te ʼu palalau ʼaenī ʼa Sehova: “Mai te hopo ake ʼo te laʼā ʼo aʼu ki tona tō, ʼe lahi anai toku huafa ʼi te lotolotoiga ʼo te ʼu puleʼaga.” (Mal. 1:11) Tou haga fakahā te moʼoni ʼo ʼuhiga mo Sehova, pea mo “tāpuhā tona huafa taputapu ʼo aʼu ki he ʼu temi ʼe mole honatou gataʼaga, ei ʼo talu ai.”—Pes. 145:21.