Tou Taupau He ʼu Felogoi Lelei Mo Sehova
1. Koteā ʼaē neʼe fakatokagaʼi e te tuagaʼane ʼo ʼuhiga mo tona maʼuli fakalaumālie?
1 Neʼe ʼui fēnei e te tuagaʼane: “Kua teitei taʼu 20 taku nofo ʼi te moʼoni, pea ko te meʼa pe neʼe ʼau fai ko te ʼalu ki te ʼu fono pea mo kau ki te gāue fai faka mafola.” Kae ʼe ina toe ʼui fēnei: “Neʼe ʼau fakakaukau leva, logola ko te ʼu meʼa ʼaia ʼe maʼuhiga, kae ʼe mole feʼauga anai moʼo lagolago mai kia ʼau mo kapau ʼe hoko mai haku ʼu faigataʼaʼia. . . . Kua ʼau mahino ʼi te temi nei, ʼe tonu ke ʼau fetogi taku fakakaukau pea mo fai haku polokalama ako faka Tohi-Tapu, ke ʼau ʼiloʼi lelei ia Sehova pea mo ʼofa kia te ia, pea mo fakafetaʼi ki te meʼa ʼofa ʼaē neʼe foaki mai e tona ʼAlo.”
2. He koʼe ʼe maʼuhiga ke tou taupau he ʼu felogoi lelei mo Sehova?
2 ʼE maʼua ke kita faiga mālohi moʼo fakatupu hakita felogoi takitokotahi pea mo loloto mo Sehova. ʼE mole kita fakagata pe ki te ʼu gāue faka Kilisitiano ʼaē ʼe kita fai māhani. Kapau ʼe mole tou felogoi tuʼumaʼu mo Sehova, ʼaki te temi ʼe feala ke hage maʼa tatou neʼe ko hotatou kaumeʼa ʼe mole kei tou palalau mo ia. (Apk. 2:4) Tou vakaʼi peʼe lava tokoni feafeaʼi mai te ako takitokotahi ʼo te Tohi-Tapu pea mo te faikole ke tou taupau tatatou ʼu felogoi lelei mo Sehova.—Pes. 25:14.
3. Koteā te faʼahiga fai ʼo te ako, ʼe ina fakaōvi anai tatou ki te ʼAtua?
3 ʼE Maʼuhiga Te Faikole Pea Mo Te Metitasio: Ko te ako takitokotahi moʼo fafaga tokita loto, ʼe mole gata ʼaki pe te fakaʼiloga ʼo te ʼu puani tāfito ʼo he alatike ako pea mo te vakaʼi ʼo te ʼu vaega ʼaē ʼe tuʼu ai. Kae ʼe maʼua ke kita metitasio ki te ʼu puani ʼaē ʼe ina fakahā mai ʼo ʼuhiga mo te ʼu ala ʼo Sehova, tana ʼu pelesepeto pea mo tona ʼulugaaga. (Ek. 33:13) Ko tatatou mahino ki te ʼu meʼa fakalaumālie, ʼe malave ki totatou loto pea mo ina uga tatou ke tou fakakaukau ʼo ʼuhiga mo totatou maʼuli. (Pes. 119:35, 111) ʼE tonu ke tou fai tatatou ako takitokotahi ʼaki te fakatuʼutuʼu ʼaenī: ke tou fakaōvi kia Sehova. (Skp. 4:8) Ko he ako ʼe fai fakalelei, ʼe ʼaoga kiai he temi pea mo he koga meʼa lelei, pea ke feala hona fai tuʼumaʼu ʼe tonu ke tou fakatonutonuʼi ia tatou. (Tan. 6:10) Tatau aipe peʼe koutou maʼumaʼua tuʼumaʼu, kae ʼe koutou tāʼofi koa hokotou temi ʼi te ʼaho fuli, moʼo metitasioʼi te ʼu kalitate fakaofoofo ʼo Sehova?—Pes. 119:147, 148; 143:5.
4. Ko te faikole ʼi muʼa ʼo te fai ʼo te ako takitokotahi, ʼe tokoni feafeaʼi mai ke tou taupau he ʼu felogoi lelei mo Sehova?
4 Ke ʼi ai he ʼaoga ʼo te ako takitokotahi kia kita, ʼe maʼuhiga ke kita faikole fakamalotoloto. ʼE ʼaoga kia tatou te laumālie maʼoniʼoni ʼo te ʼAtua, ke feala ki te ʼu moʼoni faka Tohi-Tapu ke nātou hū ki totatou loto, pea mo uga tatou ke “tou tauhi ki te ʼAtua . . . ʼaki he manavasiʼi faka lotu pea mo manavahe.” (Hep. 12:28, MN ) Koia, ʼe tonu ke tou kamata tatatou ʼu temi ako, ʼaki he kole kia Sehova ke ina foaki mai tona laumālie. (Mat. 5:3) ʼI te ʼu temi ʼaē ʼe tou metitasioʼi ai te Tohi-Tapu, pea mo tou fakaʼaogaʼi te ʼu tohi ʼaē ʼe foaki mai e te kautahi ʼa Sehova moʼo tokoni ki tatatou ako, ʼe tou avahi ai totatou loto kia Sehova. (Pes. 62:8) Ko te fai feiā ʼo tatatou ako, ʼe ko he faʼahiga atolasio ʼaia, ʼe tou fakahā ai tatatou agatonu kia Sehova, pea mo ina fakamālohiʼi ai tatatou fia pipiki kia te ia.—Suta 20, 21.
5. He koʼe ʼe maʼuhiga ke tou metitasioʼi te Folafola ʼa te ʼAtua ʼi te ʼaho fuli?
5 Ohage pe ko te ʼu felogoi fuli, ʼe tonu ke tou taupau tuʼumaʼu tatatou felogoi mo Sehova, ke haga tuputupu. Koia, ʼofa pe ke tou tāʼofi hotatou temi ʼi te ʼaho fuli moʼo fakaōvi ki te ʼAtua, heʼe tou ʼiloʼi ʼe fakaōvi mai anai kia tatou.—Pes. 1:2, 3; Ef. 5:15, 16.