ʼE Feala Koa Hakotou Tokoni?
1 ʼE vakaʼi tuʼumaʼu pe e Sehova he ʼu ʼaluʼaga ke tokoni ai ki tana kau kaugana agatonu. (2 Fkma. 16:9; Isa. 41:10, 13) Neʼe fakatatau e Isaia ia Sehova ki he tagata tauhi ōvi, pea neʼe ina tohi fēnei: “ ʼAki tona nima, ʼe ina fakatahiʼi anai te ʼu akeno; pea ʼe ina fua anai nātou ki tona fatafata. ʼE ina takitaki fakalelei anai te ʼu ōvi fafine ʼaē ʼe nātou fāgai tonatou ʼu kiʼi ʼuhi.” (Isa. 40:11) Tou vakaʼi ʼihi ʼaluʼaga ʼe feala ai ke tou faʼifaʼitakiʼi ia te tokoni ʼofa ʼa Sehova.
2 Tou Tokoni Kia Nātou ʼAē ʼe Foʼofoʼou Mai: ʼE feala ke tou tokoni kiā nātou ʼaē ʼe foʼofoʼou mai, ʼo tou fakaafe nātou ke nātou fakatahitahi mo tatou, ke fakaloto mālohiʼi ai nātou. (Taag. 13:20) ʼE manatuʼi e te tēhina te tokoni age ʼa te kokelekasio ʼi tana kamata fakatahi kiā nātou, pea neʼe ina ʼui fēnei: “Neʼe lahi te ʼu ʼaho neʼe au fakatahi ai mo te famili ki tanatou ako faka famili. ʼI taku tuputupu ʼi te faʼahi fakalaumālie, neʼe au tau ʼalu mo te taumatuʼa pionie ʼo fai faka mafola ʼaho kātoa mo nāua. Neʼe mātou fai palalau tuʼumaʼu pe ki he ʼu manatu fakalaumālie.” Neʼe ina toe ʼui fēnei: “ ʼI muʼa ʼo taku liliu ko he Kilisitiano, neʼe ko taku agamāhani ia taku ʼalu ki te ʼu fakafiafia ʼi te ʼu pō ʼo te Feliaono pea mo te Moeaki. Kae kua au maʼu toku ʼu tēhina ke au fakakaugā ki ai.” Ko te tokoni ʼofa ʼaia ʼa te kokelekasio, neʼe tupu ai te tapiki maʼu ʼa te tēhina ki te moʼoni pea mo mālohi ai tana tui, pea ʼi te temi nei kua kau ʼi te famili ʼo te Petele.—Kol. 2:6, 7.
3 Tou Fefakaloto Mālohiʼaki: Ka hoko ni ʼu ʼaluʼaga faigataʼa ki totatou ʼu tēhina, pea ʼe feala ke tou kumi he ʼu ʼaluʼaga ke tou tokoni ai kiā nātou. ʼE feala koa ʼaki he kaugā fai faka mafola ʼe mahaki, ke koutou fai faka mafola ʼaki te telefoni peʼe koutou kole age peʼe fia kaugā fai mo koutou he ako Tohi-Tapu, ʼo lagi koutou fai te ako ʼi tona ʼapi? ʼE lagi fiafia anai he faʼe peʼe ko he tāmai ʼe ina taupau tokotahi tana fānau ʼi takotou tokoni age kiā ia ʼi te fai faka mafola. Ko nātou ʼaē ʼe umiuminoa ʼe lagi nātou fiafia anai ʼi takotou tokoni age kiā nātou moʼo fai ʼo he ʼu ʼaʼahi peʼe ko te ʼahiʼahiʼi ʼo he tahi age ʼu faʼahiga fai faka mafola. Kapau ʼe tou ʼofa ki totatou ʼu tēhina, pea ʼe tou fia kumi anai he ʼu ʼaluʼaga ke tou fakaloto mālohiʼi ai ia nātou.—Loma 14:19.
4 Kapau ʼe tou faʼifaʼitakiʼi te tokoni ʼofa ʼo Sehova ki tana kau kaugana, pea ʼe tou fefakaloto mālohiʼaki. ʼE feala ai ki te kokelekasio ke fakatahi ʼi te ʼofa, pea mo tou faka kolōlia ai ki tatatou Tāmai ʼi selo.—Ef. 4:16.