ʼE Hāofaki Anai Te ʼu Hahaʼi Kehekehe
1. He koʼe ʼe ʼofa te ʼAtua kiā tatou?
1 ʼE feala ki te hahaʼi ke nātou maʼu te maʼuli ʼuhi ko te ʼofa makehe ʼo te ʼAtua. ʼE finegalo ia Sehova “ke fakamauli te tagata fuape, pea ke natou kaku ki te iloi o te mooni.” (1 Tim. 2:3, 4) ʼE ʼofa te ʼAtua kiā tatou heʼe tou tui ki te sākilifisio faitotogi ʼa Sesu, kae mole ʼuhi ko totatou lanu, totatou tuʼulaga ʼi te malamanei, totatou poto, peʼe ko totatou agaaga ʼaē ʼe hā ki tuʼa. (Soa. 3:16, 36) ʼI tatatou kaugā gāue mo te ʼAtua, ʼe tonu ke tou tekeʼi te ʼu manatu fakapalatahi, ʼaē ʼe feala ke ina uga ai tatou ke tou fēhihiʼa ki te hahaʼi ʼaē ʼe feala ke tali e Sehova.
2, 3. Koteā ʼaē ʼe feala ke tokoni mai ke ʼaua naʼa tou fakamāuʼi te hahaʼi ʼo mulimuli ki tonatou agaaga ʼaē ʼe hā ki tuʼa?
2 ʼAua Naʼa Tou Fakamāuʼi: ʼE sioʼi e Sehova te meʼa ʼaē ʼi te loto ʼo te hahaʼi, pea ʼe mole ina sioʼi ʼaki he ʼu manatu ʼe kovi pea mo he aga ʼe fakapalatahi. (1 Sam. 16:7) ʼE toe sio foki ki tonatou ʼu fealagia. Koia ʼe ʼofa kiā nātou ʼaē ʼe nātou fia fakafiafia ia ia. (Asea 2:7) ʼE tou sio feiā koa ki te hahaʼi ohage ko te sio ʼa te ʼAtua?
3 ʼI tatatou minisitelio, ʼe lagi mole tou leleiʼia ʼihi hahaʼi, heʼe ʼuli tonatou ʼu mutuʼi meʼa peʼe mole nātou teu fakapoipoi, peʼe mole gaohi leleiʼi tonatou kava, peʼe tau he foʼi hau ʼi tonatou ihu peʼe ko tonatou laugutu. Ko ʼihi ʼe lagi momoe ʼi te ʼu ala heʼe mole honatou ʼapi. Ko ʼihi ʼe lagi nātou palalau kovi mai kiā tatou. ʼAua naʼa tou fakamāuʼi he tahi ʼo tou ʼui ʼe mole liliu anai ʼi he temi ʼo tauhi kiā Sehova, kae ʼe tonu ke tou maʼu he manatu ʼe lelei, he “[neʼe tou feiā mo tatou] i te temi mua, nee tou agavale, talagataa, [pea mo] hehe.” (Tito 3:3) ʼI tatatou mahino ki te faʼahi ʼaia, ʼe tou fia fai faka mafola anai ki te hahaʼi fuli pe, māʼiape la mo nātou ʼaē ʼe hage mai ki tuʼa ʼe mole tāu mo nātou.
4, 5. Koteā ʼaē ʼe tou ako mai te ʼu faʼifaʼitaki ʼa Sesu pea mo Paulo?
4 Te ʼu Faʼifaʼitaki ʼo Te ʼUluaki Sēkulō: Neʼe toʼo e Sesu Kilisito he temi moʼo tokoni ki te hahaʼi ʼaē neʼe līʼakina he neʼe ʼui ʼe mole feala ke nātou fetogi. (Luka 8:26-39) Neʼe mole tali e Sesu te ʼu aga ʼaē ʼe kovi, kae neʼe ina ʼiloʼi ko te hahaʼi ʼaia neʼe nātou tō koviʼia ʼi tonatou maʼuli. (Luka 7:37, 38, 44-48) Koia neʼe lotomahino ai, pea “nee fonu i te ofa kia natou, koteuhi kua natou hage he u ovi e mole honatou tauhi.” (Mko. 6:34) ʼE feala koa ke tou faʼifaʼitakiʼi lelei age ia ia?
5 Ko te ʼapositolo ko Paulo neʼe tuki makaʼi, mo tā, pea neʼe pilisoni. (Gaue 14:19; 16:22, 23) Neʼe ʼita koa ʼi tona gaohi koviʼi ʼaia pea mo manatu koa neʼe ko he puli temi tana fai tana gāue ʼi ʼihi fenua pea ki ʼihi lanu? Kailoa ia. Neʼe ina ʼiloʼi neʼe feala ke ina maʼu he ʼu hahaʼi loto moʼoni ʼi te ʼu lanu fuli pe, pea neʼe loto papau ke ina maʼu ia nātou. ʼE tou manatu feiā koa ʼo ʼuhiga mo te hahaʼi ʼo totatou telituale ʼaē ʼe kehe tonatou maʼuli pea mo tanatou ʼu agaʼi fenua?
6. ʼE feala ke malave feafeaʼi tatatou aga ki te hahaʼi foʼou ʼaē ʼe ʼōmai ki te ʼu fono ʼo te kokelekasio?
6 ʼE Tou Tali Lelei Te Hahaʼi ʼi Te Temi Nei: Tokolahi te hahaʼi ʼa te ʼAtua ʼe nātou fiafia heʼe ko te ʼu tēhina mo tuagaʼane ʼo te kokelekasio, neʼe nātou tali leleiʼi nātou kae neʼe mole nātou tokagaʼi tonatou agaaga ʼaē neʼe hā ki tuʼa. Ko te tagata ʼi Siamani, neʼe ʼalu ki te Fale ʼo Te Puleʼaga, neʼe mole gaohi lelei tona kava, neʼe lauʼulu loloa, pea neʼe toe ʼuli mo tona ʼu mutuʼi meʼa. Neʼe ʼiloʼi e te hahaʼi ʼe ko he tagata agakovi. Kae neʼe fakatalitali lelei ia ia ʼi te fono. Neʼe punamaʼuli ʼaupito te tagata, koia neʼe toe liliu ai ki te fono ʼi te vāhaʼa ki muli age. Mole fualoa, pea neʼe ina fakamaʼa ia ia, mo tuku tana suluka, pea mo ʼohoana mo te fafine neʼe nā fakatahi. Mole tuai, pea ko nāua mo tanā fānau, neʼe nātou tauhi kiā Sehova ko he famili logo tahi.
7. ʼE tou lava faʼifaʼitakiʼi feafeaʼi totatou ʼAtua ʼaē ʼe mole fakapalatahi?
7 Moʼo faʼifaʼitakiʼi totatou ʼAtua ʼaē ʼe mole fakapalatahi, tou faka fealagia ki te hahaʼi fuli pe ke nātou maʼu te ʼu lelei ʼo te ʼofa makehe ʼo te ʼAtua.
[Talanoa ʼo te pasina 3]
“Ko te ʼAtua ʼe mole fakapalatahi; kae ʼi te puleʼaga fuli pe ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.”—Gaue 10:34, 35, MN.