ʼE Koutou Sio Pe Koa Ki Te Agaaga ʼo Tuʼa?
1 Ka tou fai faka mafola, ʼe mole lagi tou fia tala te logo lelei ki ʼihi hahaʼi, ʼuhi pe ko tonatou agaaga. Ohage la, koteā ʼaē ka koutou fai mo kapau ʼe sio fakaʼitaʼita atu he tagata ʼi takotou ʼaʼahi tona vāhaʼa fale ʼaē ʼe ina fia ʼiloʼi te moʼoni? Neʼe hoko te meʼa feiā ki te tuagaʼane pionie, pea neʼe ina fakatotonu ke ʼalu ki te tagata ʼaia ʼo palalau ki ai. Neʼe fakamālo fakafefeka age te tagata kia ia. Kae neʼe hoko te meʼa fakapunamaʼuli, he neʼe fakalogo ki te logo ʼa te Tohi-Tapu, pea neʼe ina tali fakafiafia ke fai hana ako. Ko te tuagaʼane neʼe mole ina sioʼi te ʼu agaaga ʼo tuʼa ʼa te tagata, pea neʼe feala ai ki te tagata pea mo tona ʼohoana ke nā ako te moʼoni.
2 Neʼe toe feiā mo te tahi tuagaʼane. ʼI te kamata neʼe mataku ʼi te agaaga ʼa te talavou, he neʼe lauʼulu loloa. Kae neʼe ina fai fakanounou tana gāue ki ai, mokā haʼu ki te fale koloā ʼaē neʼe gāue ai. Neʼe fua tana ʼu faiga, heʼe ʼi te temi nei kua papitema te tūpulaga ʼaia. Koteā ʼaē ka tokoni anai kia tatou ke mole tou manatu atu aipe ko te taʼi hahaʼi ʼaia ʼe mole nātou tali anai te logo lelei?
3 Tou Mulimuli Ki Te Faʼifaʼitaki ʼa Sesu: Neʼe ʼiloʼi e Sesu, ʼe ina foaki anai tona maʼuli maʼa te hahaʼi fuli pe. Koia neʼe mole ina sioʼi te agaaga ʼo tuʼa ʼa te hahaʼi. Neʼe mahino kia ia, māʼia mo te hahaʼi ʼaē ʼe mole faʼa lelei tonatou maʼuli, ʼe feala ke nātou fia fetogi, mo kapau ʼe foaki age kia nātou te ʼu tokoni pea mo te ʼu fakaloto mālohi ʼaē ʼe ʼaoga. (Mat. 9:9-13) Neʼe tokoni ki te kau maʼu koloā pea mo te kau masiva. (Mat. 11:5; Mko. 10:17-22) Koia ʼaua naʼa tou fakamāuʼi te hahaʼi ʼaē ʼe tou felāveʼi mo nātou ʼi te minisitelio, ʼuhi ko tonatou agaaga ʼo tuʼa, naʼa mole feala hatatou ʼiloʼi te hahaʼi ʼaē ʼe lelei tonatou loto. (Mat. 7:1; Soane 7:24) Koteā ʼaē ka tokoni anai kia tatou ke tou mulimuli ki te faʼifaʼitaki lelei ʼa Sesu?
4 ʼAki tatatou ako ʼo te Tohi-Tapu, kua mahino kia tatou ʼe feala ki te Folafola ʼa te ʼAtua ke ina fetogi te manatu ʼa te hahaʼi, tanatou aga pea mo tonatou ʼulugaaga. (Ef. 4:22-24; Hep. 4:12) Koia tou taupau he manatu ʼe lelei pea mo tou falala kia Sehova, ia Ia ʼaē ʼe ina ʼiloʼi te loto ʼa te tagata.—1 Sam. 16:7; Gaue 10:34, 35.
5 Tatau aipe pe koteā te agaaga ʼo tuʼa ʼo te hahaʼi fuli ʼaē ʼe tou faka mafola kiai te logo lelei, kae tou fakaʼamu ke lagolago te faʼahi ʼaia ki te tānaki ʼo te taʼukai lahi ʼaē ʼe fai ʼi te ʼu ʼaho fakamuli.—1 Tim. 2:3, 4.