Tou Faʼifaʼitakiʼi Te Faitotonu ʼa Sehova
1 “Ko Sehova ʼe ʼofa ki te faitotonu.” (Pes. 37:28) Koia, logola neʼe ina fakatotonu ke fakaʼauha te malamanei heʼe faitotonu ʼaenī, kae neʼe ina fakatuʼutuʼu ke fai muʼa he fakatokaga. (Mko. 13:10) ʼE maʼu ai e te hahaʼi te faigamālie ke nātou fakahemala pea mo hāofaki nātou. (2 Pet. 3:9) ʼE koutou faiga koa ke koutou faʼifaʼitakiʼi te faitotonu ʼa Sehova? Ko te ʼaluʼaga fakaʼofaʼofa pea mo te mamahi ʼa te hahaʼi ʼe ina uga koa koutou ke koutou vaevae mo nātou te ʼamanaki ʼo te Puleʼaga? (Taag. 3:27) Ko tatatou ʼofa ki te faitotonu ʼe ina uga anai tatou ke tou kau lahi ki te fai faka mafola.
2 ʼAua Naʼa Tou Fakapalatahi ʼi Tatatou Fai Faka Mafola: Kapau ʼe tou tala te fakatuʼutuʼu ʼa te ʼAtua ki te hahaʼi fuli, ʼo mole tou fakapalatahi, pea ʼe tou “maʼuliʼi . . . te faitotonu.” (Mik. 6:8) ʼE mole tonu ke tou maʼu he ʼu manatu fakapalatahi ʼo ʼuhiga mo te hahaʼi ʼuhi pe ko tonatou ʼu agaaga ʼaē ʼe hā ki tuʼa. (Skp 2:1-4, 9) “Ko [te] finegalo [ʼo Sehova] ke fakamauli te tagata fuape, pea ke natou kaku ki te iloi o te mooni.” (1 Tim. 2:4) Ko te folafola moʼoni ʼa te ʼAtua ʼe feala ke ina fetogi te maʼuli ʼo te hahaʼi. (Hep. 4:12) Ko tatatou mahino ki te faʼahi ʼaia ʼe ina uga tatou ke tou fakaōvi ʼaki he loto falala ki te hahaʼi, māʼiape la mo nātou ʼaē neʼe mole nātou fia logo ʼi te temi muʼa.
3 Ko te tuagaʼane neʼe gāue ʼi te fale koloā, neʼe mataku ʼi te tagata neʼe faʼa ʼalu age ʼo fai fakatau. Kae ʼi tana maʼu te faigamālie, neʼe faiga ai ke palalau age ki te tagata ʼaia ʼo ʼuhiga mo te Palatiso ʼaē neʼe fakapapau e te ʼAtua. Neʼe ina tali faka fefeka age ʼe mole tui ki te ʼu fagana pea ko ia ko te hippie pea ʼe toloke. Kae neʼe mole tuku ai e te tuagaʼane. ʼI te tahi ʼaho, neʼe fehuʼi age e te tagata ʼaia pe koteā tana manatu ʼo ʼuhiga mo tona lauʼulu loloa, pea neʼe ina fakamahino ʼaki he fakaʼapaʼapa te manatu ʼa te Tohi-Tapu ki te faʼahi ʼaia. (1 Ko. 11:14) Neʼe fiafia te tuagaʼane ʼi te ʼaho ake, neʼe kua tele te kava ʼa te tagata pea mo kosi tona lauʼulu. Neʼe ina kole ke fai hana ako Tohi-Tapu, pea neʼe fai e he tēhina ʼaki he loto fiafia, pea neʼe tuputupu ʼo aʼu ki tona foaki tona maʼuli pea mo papitema. Ohage ko te tagata ʼaia, tokolahi ʼaē kua nātou tauhi kia Sehova ʼi te temi nei, ʼe nātou fakafetaʼi ki te mole fakapalatahi pea mo te ʼu faiga ʼo nātou ʼaē neʼe nātou fakahā kia nātou te logo ʼo te Puleʼaga.
4 Kua ōvi mai te temi ʼaē ka pulihi ai e Sehova te heʼe faitotonu ʼi te kele katoa. (2 Pet. 3:10, 13) ʼI te kiʼi temi veliveli ʼaē ʼe kei toe, ʼofa pe ke tou faʼifaʼitaki te faitotonu ʼa Sehova, ʼo tou foaki ki te hahaʼi fuli pe te faigamālie ʼaē ke nātou hāo mai te fakaʼauha ʼaē ka hoko ki te malamanei heʼe faitotonu ʼa Satana.—1 Soa. 2:17.