He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 15 ʼo ʼApe.

“ ʼI tau manatu ʼe mole koa la lahi ʼaupito te ʼu logo ʼaē ʼe tou maʼu iā ʼaho nei? [Tuku ke fai mai hana tali.] Kae ʼe mole he logo ʼe maʼuhiga age ʼi te logo ʼaē ʼe tuʼu ʼi te vaega ʼaenī. [Lau age ia Soane 17:3.] ʼE fakamahino ʼi te nusipepa ʼaenī te faka ʼuhiga ʼo te kupuʼi palalau ‘maʼuli heʼegata,’ pea ʼe tou lava maʼu feafeaʼi ia te ʼatamai mālama ʼaē ʼe ina faka fealagia ke tou kaku kiai.”

Réveillez-vous! ʼaho 22 ʼo ʼApe.

“Logola ko Sesu Kilisito ʼe lagi ko te tagata ʼaē ʼe ʼiloa ʼaupito age ʼi te tagata fuape, kae tokolahi te hahaʼi ʼe nātou feʼekeʼaki pe ko ai moʼoni ia Sesu. ʼE ke ʼiloʼi koa la māʼia mo te kau ʼapositolo totonu ʼa Sesu neʼe nātou fai te fehuʼi ʼaia? [Tuku ke fai mai hana tali. Pea koutou lau age ia Maleko 4:41.] ʼE fakamahino ʼi te nusipepa ʼaenī te ʼuhiga moʼoni ʼo Sesu ohage ko tona tuʼu ʼi te Tohi-Tapu.”

Te Tule Leʼo ʼaho 1 ʼo Maio

“Ka mate he tahi neʼe tou ʼoʼofa ai, ʼe mahino ia ʼe tou toe fia sisio kiā ia. Koteā tau manatu ki te faʼahi ʼaia? [Tuku ke fai mai hana tali.] Tokolahi neʼe nātou maʼu he fakaloto fīmālie ʼi te fakapapau ʼa te Tohi-Tapu ʼo ʼuhiga mo te fakatuʼuake. [Lau age ia Soane 5:28, 29.] ʼE fakamatala ʼi te nusipepa ʼaenī te temi ʼaē ka hoko ai anai te fakatuʼuake pea ko ai moʼoni ʼaē ka fakatuʼuake anai.”

Réveillez-vous! ʼaho 8 ʼo Maio

“Tokolahi te ʼu mātuʼa ʼe nātou filifili te ʼu meʼa ʼaē ʼe feala ke sioʼi e tanatou fānau. Neʼe faigataʼa koa hau maʼu he ʼu ʼata ʼe lelei maʼa te famili? [Tuku ke fai mai hana tali. Pea koutou lau age ia Efeso 4:17.] ʼE tuʼu ʼi te nusipepa ʼaenī te ʼu tokoni ʼe ʼaoga anai ki te ʼu mātuʼa moʼo tokoni ki tanatou fānau ke nātou filifili te ʼu ʼata ʼaē ʼe lelei ke sioʼi.”