Te Polokalama Faka Famili—Ki Te Ako Faka Famili
1 ʼI tokotou ʼuhiga mātuʼa Kilisitiano, ko te meʼa ʼofa lahi ʼaē ʼe feala ke koutou foaki ki takotou fānau: ʼe ko tokotou ʼofa ʼaē kiā Sehova. ʼE koutou lava fai ia te faʼahi ʼaia “mokā koutou heheka ʼi tokotou loto fale” moʼo fai ʼi te vahaʼā fuli ia te ako Tohi-Tapu faka famili. (Teu. 6:5-7) Peʼe ko tokotou ʼohoana ko he Fakamoʼoni ʼa Sehova, peʼe koutou māʼuʼuli ʼi he loto fale ʼe mole koutou lotu tahi, peʼe ko koutou ko he tāmai peʼe ko he faʼē ʼe koutou taupau tokotahi takotou fānau, ʼe feala ʼaki he ako Tohi-Tapu faka famili ʼe fai tuʼumaʼu, ke koutou tokoni ki takotou fānau ke nātou fakaōvi kiā koutou pea mo Sehova.
2 Koutou Kamata He Ako Faka Famili: ʼUluaki, koutou fakamāhani ʼo fai hakotou ako faka famili. Kapau ʼe mole koutou ʼiloʼi papau te ʼaho pea mo te hola ʼaē ʼe tonu ke fai ai te ako, pea ʼe lelei hakotou felogoi faka famili ki te faʼahi ʼaia. (Taag. 15:22) Kapau ʼe kei liliki takotou ʼu tamaliki, ʼe lagi koutou fai fakanounou anai te ako kae koutou fai putuputu ʼi te vāhaʼa. Koutou fakafuafua lelei peʼe kofea te polokalama ʼaē ʼe ʼaoga ki tokotou loto fale. Koutou fakatuʼutuʼu he hola moʼo fai te ako faka famili, pea koutou faiga ke koutou mulimuli kiai.
3 Ko te tohi fea ʼaē ka koutou ako? Ko ʼihi ʼe nātou teuteuʼi faka famili te tohi ʼaē ʼe vakaʼi ʼi te Ako Tohi ʼo Te Kokelekasio peʼe ko Te Tule Leʼo. Ki ʼihi ʼe nātou ako te tohi ʼaē neʼe tā tāfito maʼa te kau tūpulaga. Neʼe ʼui e te tāmai ʼa te kiʼi tama pea mo te kiʼi taʼahine: “Ko te meʼa ʼaē ʼe lelei ai ʼi tamatou ako ʼi te vāhaʼa fuli mo te ʼu tamaliki, heʼe mātou fai te ʼu kiʼi gaoʼi ʼo faʼifaʼitakiʼi te ʼu hisitolia ʼo Te ʼu Tohi ʼo Te ʼu Hisitolia Faka Tohi-Tapu. ʼE nātou tāʼofi lelei te ako ʼaki te ʼu kiʼi gaoʼi, pea ʼe ko he faʼahi ʼe maʼuhiga age ʼi hamatou vakaʼi he ʼu tuʼuga palakalafe.”
4 Ke Fai Te Ako ʼi Te vāhaʼa Fuli: ʼE tonu ke fai tuʼumaʼu te ako faka famili pea ke fakatalitali e te famili ia te ako ʼaia ʼaki he loto fakafiafia. Kapau ʼe hoko mai he ʼu meʼa fakapunamaʼuli, pea ʼe feala pe ke fetogi te ʼaho pea mo te hola ʼo te ako faka famili. ʼE feala pe foki ke fetogi mo te ʼu alatike peʼe ko te ʼu faʼahi ʼaē neʼe tonu ke vakaʼi ʼi te ako faka famili. Kae ka hoko he ʼu fetogi ʼo ʼuhiga mo te polokalama ako faka famili, pea ʼe mole tonu leva ke hoko putuputu te faʼahi ʼaia. ʼI te tahi famili, ko te tāmai ʼe ina tohi te hola foʼou ʼo te ako ki he moʼi pepa, pea ʼe ina hili ki he faʼahi ʼe lava sio fuli kiai te famili. ʼE ko he meʼa lelei te ʼu taʼi faiga ʼaia moʼo fai tuʼumaʼu te ako faka famili! Kapau ʼe koutou taupau takotou fānau “ʼi te akonaki pea mo te ʼu manatu ʼa Sehova,” ʼe koutou fakahā ai ia tokotou ʼofa kiā nātou pea mo tatatou Tāmai ʼaē ʼe ʼi selo.—Ef. 6:4, MN.