Tou Gāueʼi Te Fealagia ʼAē Ko Te Uga ʼo Te Hahaʼi Ke Nātou Fakakaukau
1. Ko te fakamatala fea ʼa te Tohi-Tapu ʼaē ka tou vakavakaʼi anai, pea koteā tona tupuʼaga?
1 Ko te akonaki ʼa te ʼapositolo ko Paulo ʼi te sinakoka ʼo Atiokia ʼi Pisitia, ʼaē ʼe fakamatala ʼi te tohi ʼo Gaue 13:16-41, ʼe tou maʼu ai te faʼifaʼitaki lelei ʼo ʼuhiga mo te uga ʼaē ʼo te hahaʼi ke nātou fakakaukau. Neʼe tokagaʼi e Paulo ia te hisitolia ʼa te kau Sutea pea mo tanatou faʼahiga manatu, pea neʼe ina tala te logo lelei ʼo mulimuli ki te ʼu faʼahi ʼaia. ʼE tou vakavakaʼi anai te fakamatala ʼaia ʼo ʼuhiga mo te akonaki ʼa Paulo, ke feala hatatou faʼifaʼitakiʼi ʼi tatatou minisitelio.
2. Koteā te ako ʼaē ʼe tou tāʼofi ʼi te faʼahiga faiakonaki ʼa Paulo?
2 Tou Maʼu He Puani ʼe Tou Manatu Tahi Kiai: Logola ko te logo ʼaē neʼe tala e Paulo, neʼe talanoa tāfito ai ki te tuʼulaga maʼuhiga ʼa Sesu ʼi te fakahoko ʼo te finegalo ʼo te ʼAtua, kae neʼe mole ina kamata tana akonaki ʼaki ia te puani ʼaia. Neʼe talanoa ia ʼo ʼuhiga mo te faʼahi neʼe mahino tatau kiā ia pea mo te kau Sutea, ʼaē neʼe kaugamālie ʼi te nofoʼaki: ko te hisitolia ʼo te kau Sutea. (Gaue 13:16-22) ʼO feiā mo tatou, ʼe feala anai hatatou fakatupu te fia logo ʼa te hahaʼi, mo kapau ʼe tou kumi he ʼu puani ʼe tou manatu tahi kiai. Moʼo fai ia te faʼahi ʼaia, ʼe tonu ke tou fai he ʼu fehuʼi ke tou ʼiloʼi ai tanatou manatu, kae ke tou fai fakaʼeteʼete, pea mo tou fakalogo lelei ke feala hatatou mahino ki te ʼu faʼahi ʼaē ʼe maʼuhiga moʼoni kiā nātou.
3. Koteā ʼaē neʼe faigataʼa ai ki te nofoʼaki tanatou tali ia Sesu ʼe ko te Mesia ʼaē neʼe fakapapauʼi mai?
3 ʼI tana fakamatala ia te hisitolia ʼa te kau Sutea, neʼe fakamanatuʼi e Paulo ki te nofoʼaki ia te fakapapau ʼa te ʼAtua, ʼo ʼuhiga mo te Fakamaʼuli ʼaē ka haʼu anai mai te hōloga ʼo Tavite. Kae tokolahi te kau Sutea, neʼe nātou manatu ko te Fakamaʼuli ʼaia, ʼe ko he tagata solia lototoʼa ʼe haʼu anai ʼo fakagata te pule ʼa te kau Loma, pea mo ina fakatuʼu te puleʼaga Sutea ke mālohi age ʼi te ʼu puleʼaga fuli ʼaē. Neʼe nātou ʼiloʼi neʼe fakafisi te kau takitaki lotu Sutea ʼi Selusalemi kiā Sesu, mo nātou ʼave ia ia ki te kau takitaki Loma, pea mo nātou matehi. Koteā anai te ʼu palalau ʼaē ka fai e Paulo ke feala hanatou tui papau neʼe ko Sesu te Mesia ʼaē neʼe fakapapauʼi mai?
4. Neʼe hā feafeaʼi te poto ʼa Paulo ʼi tana faiakonaki ki te nofoʼaki Sutea?
4 Tou Talanoa Ki He ʼu Manatu ʼe Kua ʼIloʼi e Te Hahaʼi: ʼI tana ʼiloʼi ia te manatu ʼa te nofoʼaki, neʼe fakaʼaogaʼi e Paulo ia te Tohi-Tapu ke fai palalau mo nātou ʼo ʼuhiga mo he ʼu manatu neʼe kua nātou ʼiloʼi. Ohage la, neʼe ina ʼui ko Sesu ʼe ko te hāko ʼo Tavite, pea neʼe ko ia ʼaē neʼe talanoa ki ai ia Soane Patita, ʼaē neʼe faka tui ki ai ia te hahaʼi ʼe ko he polofeta ʼa te ʼAtua. (Gaue 13:23-25) Neʼe ʼui e Paulo ko te kau takitaki lotu, ʼi tanatou fakafisi kiā Sesu pea mo fakatūʼā ia ia ki te mate, “neʼe nātou fakahoko te ʼu meʼa ʼaē neʼe tala e te kau Polofeta.” (Gaue 13:26-28, MN ) Tahi ʼaē meʼa, neʼe ina fakamahino neʼe sio mata ʼihi kiā Sesu kua fakatuʼuake mai te kau mate, pea neʼe ina fakaʼaogaʼi te ʼu vaega Tohi-Tapu ʼaē neʼe hoko ʼi te fakatuʼuake ʼa Sesu.—Gaue 13:29-37.
5. (a) Neʼe feafeaʼi te faiakonaki ʼa Paulo ki te kau Keleka? (b) E feafeaʼi hatatou faʼifaʼitakiʼi ia Paulo mokā tou fai faka mafola ʼi tatatou telituale?
5 ʼI tana faiakonaki ki te kau Keleka ʼi te Aleopasi ʼo Ateni, neʼe fakaʼaogaʼi e Paulo ia te tahi fakamatala. (Gaue 17:22-31) Kae neʼe tatau te logo ʼaē neʼe talanoa kiai, pea ʼi tana ʼu faiakonaki ʼaia e lua, neʼe ʼi ai tona ʼu fua lelei. (Gaue 13:42, 43; 17:34) ʼO toe feiā iā ʼaho nei, ʼe lahi anai te ʼu fua lelei ʼo tatatou minisitelio mo kapau ʼe tou faiga ke tou maʼu he ʼu manatu ʼe tou manatu tahi ai mo te hahaʼi, pea mo palalau ki te ʼu meʼa ʼaē kua nātou ʼiloʼi pea mo tokagaʼi tanatou ʼu manatu.