Ko He Faʼifaʼitaki Maʼa Te Kau Tūpulaga Pea Mo Te Kau Mātuʼa
Neʼe felogoi lelei mo te ʼAtua. ʼI tona maʼuli kātoa neʼe ina fai te finegalo ʼo Sehova. Neʼe “haʼele . . . mo te ʼAtua moʼoni” pea neʼe ina maʼu ai te ʼu tapuakina. Ko te tagata ʼaia neʼe ko Noe, ko he faʼifaʼitaki ʼe tāu mo feʼauga ke faʼifaʼitakiʼi e te kau tūpulaga pea mo te kau mātuʼa. (Sen. 6:9) Ko te foʼi ʼata viteo ʼaē ko tona kupu tāfito Noé : il marchait avec Dieu, ʼe tokoni atu anai ke koutou sisio pe neʼe feafeaʼi te maʼuli ʼo Noe, he koʼe neʼe tāu mo feʼauga ke tapuakinaʼi ia ia e Sehova, pea ʼe lava feafeaʼi hakotou faʼifaʼitakiʼi tona ʼu kalitātē.
ʼI te foʼi ʼata DVD ʼo Noé ʼe tou maʼu ai te “quiz” peʼe ko te ʼu fehuʼi ʼaenī ʼe hoa mai. Koutou sioʼi te foʼi ʼata ʼaia, pea koutou fai kiā koutou te ʼu fehuʼi ʼaenī: (1) Koteā te meʼa kovi ʼaē neʼe fai e te kau ʼāselo, pea neʼe ko ai te kau Nefilime? (Sen. 6:1, 2, 4) (2) He koʼe neʼe kua agakovi te hahaʼi, pea neʼe malave feafeaʼi ki te ʼAtua? (Sen. 6:4-6) (3) Koteā ʼaē neʼe kehe ai ia Noe mo te hahaʼi? (Sen. 6:22) (4) Neʼe fakaʼauha feafeaʼi te kau agakovi? (Sen. 6:17) (5) Neʼe lahi feafeaʼi te aleka? (Sen. 6:15) (6) Koteā te tahi gāue ʼaē neʼe fai e Noe, pea neʼe tali feafeaʼi e te hahaʼi? (Mat. 24:38, 39; 2 Pet. 2:5) (7) Neʼe taki toko fia ia te ʼu manu ʼaē neʼe fakahū ki te aleka? (Sen. 7:2, 3, 8, 9) (8) Neʼe ʼua lolotoga temi e fia, pea neʼe ko temi e fia ʼaē neʼe lōmaki ai te kele? (Sen. 7:11, 12; 8:3, 4) (9) He koʼe neʼe hāo ia Noe pea mo tona famili? (Sen. 6:18, 22; 7:5) (10) Neʼe tuʼu te aleka ʼi te fenua fea? (Sen. 8:4) (11) Neʼe ʼiloʼi feafeaʼi e Noe neʼe kua feala hanatou mavae mai te aleka? (Sen. 8:6-12) (12) Koteā ʼaē neʼe fai e Noe ʼi tana mavae mai te aleka? (Sen. 8:20-22) (13) Koteā ʼaē ʼe fakatātā e te nuanua? (Sen. 9:8-16) (14) Koteā te faka ʼuhiga ʼo te ‘haʼele mo te ʼAtua’? (Sen. 6:9, 22; 7:5) (15) Koteā ʼaē ʼe tonu ke tou fai ke feala hatatou felāveʼi mo Noe ʼi te Palatiso? (Mat. 28:19, 20; 1 Pet. 2:21)
ʼO ʼuhiga mo te fakamatala ʼi te Tohi-Tapu ʼo te agatonu pea mo te fakalogo ʼa Noe, koteā te ako ʼe koutou tāʼofi ʼo ʼuhiga mo takotou lava ‘haʼele mo te ʼAtua’ pea mo takotou falala ki te fealagia ʼaē ʼa Sehova ke ina hāofaki tana hahaʼi ʼi totatou temi?—Sen. 7:1; Taag. 10:16; Hep. 11:7; 2 Pet. 2:9.