Tou Fakatuputupu Ia Te Loto Fakafetaʼi ʼo ʼUhiga Mo Te ʼu Kalitātē Māʼoluga ʼo Sehova
1 ʼE mole gata pe ʼi tatatou akoʼi ia te hahaʼi ki te ʼu moʼoni tāfito ʼo te Tohi-Tapu mokā tou fai ia tatatou minisitelio. ʼE tou toe tokoni foki ki te hahaʼi ke nātou ʼiloʼi lelei ia Sehova pea mo fakatuputupu tanatou loto fakafetaʼi ʼaē ki tona ʼu kalitātē māʼoluga. Ka mahino ia te hahaʼi tauhi fakamalotoloto ki te moʼoni ʼo ʼuhiga mo te ʼAtua, ʼe malave mālohi kiā nātou, ʼo uga ai ia nātou ke nātou fai ni ʼu fetogi ʼi ʼonatou maʼuli “ke feala [hanatou] haʼele ʼi he ʼaluʼaga ʼe tau mo feʼauga mo Sehova, ke [nātou] lelei kātoa kiā te ia.”—Kol. 1:9, 10, MN; 3:9, 10.
2 Tatatou Tohi Ako Foʼou: ʼI te kamataʼaga pe ʼo te tohi Te Ako Mai Te Tohi-Tapu, ʼe talanoa ki te ʼu kalitātē ʼo Sehova. ʼI te ʼuluaki kapite, ʼe tali ki te ʼu fehuʼi ʼaenī: ʼE tokaga moʼoni koa te ʼAtua kiā koutou?, E feafeaʼi koa te ʼAtua?, ʼE feala koa hakita fakaōvi ki te ʼAtua? ʼE toe talanoa ia te kapite ʼaia ki te maʼoniʼoni ʼo Sehova (ʼi te palakalafe 10), ki tana faitotonu pea mo tona loto mahino (ʼi te palakalafe 11), ki tona ʼofa (ʼi te palakalafe 13) pea ki tona mālohi pea mo tona manavaʼofa, mo tana agalelei, mo tona loto fakamolemole, mo tana faʼa kātaki (ʼi te palakalafe 16), pea ki tana agatonu (ʼi te palakalafe 19). Pea ʼo ʼuhiga mo te ʼu kalitātē fuli ʼaia, ʼe talanoa fakanounou leva kiai ʼi te palakalafe 20, ʼo fēnei: “Ka lahi anai te ʼu meʼa ʼaē ʼe koutou ako ʼo ʼuhiga mo ia, pea ʼe toe lahi age anai mo takotou tui moʼoni kiā te ia, mo ʼofa kiā te ia pea mo koutou ōvi kiā te ia.”
3 ʼE feafeaʼi anai hatatou fakaʼaogaʼi ia te tohi Te Ako Mai Te Tohi-Tapu, moʼo tokoni ki te kau Ako Tohi-Tapu ke nātou fakaōvi kiā Sehova? ʼI tatatou ʼosi vakaʼi he kalitātē ʼo te ʼAtua ʼi he palakalafe, ʼe feala leva hatatou fehuʼi age kiā ia ʼaē ʼe ako: “Koteā ʼaē ʼe ke mahino ʼi te palakalafe ʼaenī ʼo ʼuhiga mo Sehova?” peʼe tou fehuʼi fēnei age: “ ʼE hā feafeaʼi ʼi henī ia te tokaga ʼaē ʼa te ʼAtua kiā tatou takitokotahi?” Kapau ʼe tou fai ni ʼu fehuʼi feiā ʼi te lolotoga ʼo te fai ʼo te ako, pea ʼe tou akoako age kiā nātou ʼaē ʼe ako, ke nātou metitāsioʼi te ʼu meʼa ʼaē ʼe nātou ako pea mo tokoni anai kiā nātou ke nātou fakatuputupu ia te loto fakafetaʼi ʼo ʼuhiga mo te ʼu kalitātē māʼoluga ʼo Sehova.
4 Fakaʼaogaʼi Te Fakamanatu: ʼI te fakaʼosi ʼo te ʼu kapite fuli, koutou fakaafe ia ia ʼaē ʼe ako ke tali ʼaki tana ʼu palalau māhani ki te ʼu puani takitahi ʼo “Te ʼu Meʼa ʼAē ʼe Akoʼi Mai ʼi Te Tohi-Tapu.” Koutou talanoa ki te ʼu vaega faka Tohi-Tapu ʼaē ʼe tuʼu ai. Ke tupu ʼaki hana fakahā atu tana manatu, ʼe lagi feala ʼi ʼihi lakaga ke koutou fehuʼi age: “Koteā tau manatu ʼo ʼuhiga mo te ʼu puani ʼaē ʼe talanoa kiai te Tohi-Tapu ʼo ʼuhiga mo te faʼahi ʼaia?” Kapau ʼe koutou fai feiā, ʼe koutou faka maʼuhigaʼi anai te ʼu puani tāfito ʼo te kapite pea ʼe koutou ʼiloʼi ai anai te meʼa ʼaē ʼe tui tāfito kiai ia ia ʼaē ʼe ako. ʼE ko he faʼahi ʼe tokoni anai kiā ia ke ina kamata fakatuputupu hana ʼu felogoi mo Sehova.