Kotou Faʼifaʼitakiʼi Ia Kilisito ʼi Tokotou Minisitelio
1 Neʼe tuku mai e Sesu te faʼifaʼitaki ke tou mulimuli kiai ʼi totatou minisitelio. Neʼe lahi te ʼu lakaga neʼe hā ai tona ʼofa lahi ki te ʼAtua pea mo te hahaʼi pea neʼe lahi mo te ʼu gāue kehekehe ʼaē neʼe ina fai maʼa nātou. Neʼe ina akoʼi ki te kau agamalū ia te moʼoni, pea ʼi tona lotoʼofa neʼe tokoni kiā nātou ʼaē neʼe lotomamahi pea mo mafasia.—Mat. 9:35.
2 Te Faʼifaʼitaki Pea Mo Te ʼu Akonaki ʼa Sesu: Neʼe mole tuku e Sesu ke fakaleluʼi ia ia e te ʼu gāue faka politike peʼe ke ina fai he ʼu gāue ke lelei age te maʼuli ʼo te hahaʼi. Pea neʼe mole ina tuku ke fakaleluʼi ia ia e he tahi ʼu gāue ʼe lagi lelei, ke tupu ai hana mole kei tokaga leva ki tana ʼuluaki gāue tāfito. (Luka 8:1) Neʼe tokaga tāfito ia Sesu ʼo faka mafola ia te logo lelei ʼo te Puleʼaga ʼo te ʼAtua, ʼo fakamahino ai ko te puleʼaki pē ʼaia e tahi pea mo tologa ki te ʼu fihifihia ʼo te mālamanei. Neʼe lahi te gāue ʼaē neʼe tonu ke fai e Sesu ʼi he kiʼi temi ʼe nounou. ʼI te loto ʼaē ʼa te hahaʼi ʼo Kapenaume ke nofo ia Sesu mo nātou, neʼe ʼui māʼana ki tana kau tisipulo: “Tou hoko atu totatou fagona ki te u kolo . . . ke au fagonogono ai te Evaselio; he ko te tupuaga aia o taku haù.”—Mko. 1:38.
3 ʼI te ʼosi akoako e Sesu tana kau tisipulo, neʼe ina fekauʼi ia nātou ke natou ʼolo, ʼo ina fakatotonu fēnei age: “Koutou fakaha mo tala: ‘Kua fakaovi mai te Puleaga o Selo.’ ” (Mat. 10:7) Neʼe ina akoʼi age ki tana kau tisipulo ʼe tonu ke natou fakamuʼamuʼa ʼi tonatou maʼuli ia te ʼu gāue ʼo te Puleʼaga. (Mat. 6:33) ʼI te ʼu palalau fakaʼosi ʼaē neʼe fai e Sesu ki tana kau tisipulo ʼi muʼa ʼo tana hake ki selō, neʼe hā lelei ai te meʼa ʼaē neʼe tonu ke natou fai. Neʼe ina ʼui fēnei age: “Koutou olo o fakahoko he u tisipulo i te atu puleaga.”—Mat. 28:19.
4 Te Maʼuhiga ʼo Te Puleʼaga: Neʼe palalau tāfito ia Sesu ki te Puleʼaga ʼo te ʼAtua, pea neʼe ina uga tana kau tisipulo ke natou mulimuli ki tana faʼifaʼitaki. ʼE mole he fua ʼo te ʼu faiga ʼa te tagata moʼo fakatokatoka te ʼu fihifihia ʼo te mālamanei. (Sel. 10:23) ʼE gata pē ki te Puleʼaga ʼo te ʼAtua ʼaē kā ina tapuhā anai ia te huafa ʼo te ʼAtua pea mo foaki he fīmālie ki te mālamanei ʼo talu ai. (Mat. 6:9, 10) Ko te akoʼi ʼo te ʼu moʼoni ʼo te Puleʼaga ki te hahaʼi ʼaē ʼe “natou toʼetoʼe pea mo lotomamahi ʼo ʼuhiga mo te ʼu meʼa fakalialia fuli ʼaē ʼe hoko,” ʼe tokoni ai ke natou fiafia ʼi tonatou maʼuli ʼi te temi nei pea mo natou taupau maʼu te ʼamanaki moʼoni ki te kā haʼu.—Esk. 9:4.
5 ʼE kei kau pē ia Sesu ki te faka mafola ʼo te logo lelei ʼo te Puleʼaga ʼo te ʼAtua, pea ʼe ina fakapapau ʼe tokoni mai kiā tātou. (Mat. 28:20) ʼE tonu koa ke feafeaʼi tatatou mulimuli ki te faʼifaʼitaki ʼaē neʼe tuku mai e Sesu? (1 Pet. 2:21) ʼI te ʼu ʼaho maʼuhiga pea mo fakamuli ʼaenī, ʼofa pē ke tou faiga ʼaupitō ke tou mulimuli fakalelei ki te faʼifaʼitaki ʼaē neʼe tuku mai e Sesu ʼi te minisitelio!