Te Minisitelio Faka Kilisitiano—Ko Totatou Gāue Tāfito ʼAia
1 Ko tatou fuli ʼe ʼi ai tatatou ʼu gāue kehekehe ʼe tonu ke tou fai. ʼE fakamaʼua mai e te ʼAtua ke tou tokakaga ki totatou loto fale. (1 Tim. 5:8) Kae ko te gāue ʼaē ʼe tonu ke fai ʼuhi ko te fakatotonu fakaʼatua ʼaia, ʼe mole tonu ke maʼuhiga age ʼi te gāue ʼaē ko te faka mafola ʼo te Puleʼaga pea mo te fai ʼo he ʼu tisipulo.—Mat. 24:14; 28:19, 20.
2 ʼO mulimuli ki te faʼifaʼitaki ʼa Sesu, tou “haga kumi muʼa te puleʼaga.” (Mat. 6:33, MN; 1 Pet. 2:21) Neʼe mole lahi tana ʼu koloā, koia neʼe tokaga lahi ai ki te fakahoko ʼo te finegalo ʼo tana Tāmai. (Luka 4:43; 9:58; Soa. 4:34) Neʼe ina faigaʼi lahi ke fai fagonogono ʼi te ʼu faigamālie fuli pe. (Luka 23:43; 1 Tim. 6:13) Neʼe ina fakaloto mālohiʼi tana kau tisipulo ke nātou toe tokakaga lahi feiā ki te gāue ʼo te taʼukai.—Mat. 9:37, 38.
3 Tou Faʼifaʼitakiʼi Ia Sesu Ia ʼAho Nei: ʼE feala ke tou faʼifaʼitakiʼi ia Sesu ʼo tou faka faigafua totatou maʼuli pea ke tou tokaga tāfito ai ki te minisitelio faka Kilisitiano. Kapau ʼe tou maʼu te ʼu meʼa ʼaē ʼe ʼaoga ki te maʼuli, pea tou haga mulimuli ki te tokoni ʼa te Tohi-Tapu, ke ʼaua naʼa tou kumi he ʼu tuʼuga koloā ʼi te mālama ʼaenī. (Mat. 6:19, 20; 1 Tim. 6:8) ʼE lelei age hatatou kumi ke tou kau lahi age ki te gāue fai faka mafola! Kapau ʼe tou felāveʼi mo he ʼu ʼaluʼaga faigataʼa, pea ʼe tonu ke tou faiga ohage ko tona fai e Sesu, ke mole maʼuhiga age tatatou ʼu tuʼania ʼi tatatou gāue tāfito, ʼaē ko te tala ʼo te logo lelei ʼo te Puleʼaga.—Luka 8:14; 9:59-62.
4 Māʼia mo nātou ʼaē ʼe lahi tanatou ʼu maʼua, ʼe nātou fakamuʼamuʼa te gāue fai faka mafola. Ko te tēhina ʼe kaugamālie tona famili, mo maʼu gāue, pea mo tagata ʼāfea ʼi te kokelekasio ʼe ina ʼui fēnei: “Maʼaku ko taku minisitelio ʼe ko taku gāue tāfito ʼaia.” ʼE ʼui fēnei e te tuagaʼane pionie: “ ʼE mole he gāue faka mālama ʼe feala ke tatau mo te selevisi pionie.”
5 Tatau aipe peʼe koteā totatou ʼaluʼaga, kae tou mulimuli ki te faʼifaʼitaki ʼa Sesu. ʼO feafeaʼi? ʼO tou fakaliliu te minisitelio faka Kilisitiano, ko tatatou gāue tāfito ʼaia.