Koteā ʼAē ʼe Koutou Fakamuʼamuʼa?
1 Tokolahi te ʼu kautahi faka lotu ʼe nātou faka maʼuhigaʼi te fai ʼo he ʼu gāue moʼo tokoni ki te hahaʼi, ohage la ko te laga ʼo he ʼu faleako peʼe ko he ʼu fale mahaki. Ko te kau Fakamoʼoni ʼa Sehova, logola ʼe mole galo kia nātou “te fai o te mea e lelei pea mo te mauli vaevae,” kae ʼe nātou fakamuʼamuʼa te tokoni ki te hahaʼi ʼi te faʼahi fakalaumālie.—Hep. 13:16.
2 Te Faʼifaʼitaki ʼi Te ʼUluaki Sēkulō: Neʼe lahi te ʼu gāue lelei neʼe fai e Sesu ʼi tana minisitelio ʼi te kele, kae ko tana gāue ʼaē neʼe ina fakamuʼamuʼa neʼe ko te tala ʼo te moʼoni. (Luka 4:43; Soa. 18:37; Gaue 10:38) Neʼe ina fakatotonu ki tana kau tisipulo ke nātou “ ʼolo pea ke nātou fai ni ʼu tisipulo ʼi te hahaʼi ʼo te ʼu fenua fuli pe, . . . ʼo . . . ako ia nātou.” (Mat. 28:19, 20, MN ) Pea neʼe ina fakahā ko nātou ʼaē ʼe tui kia te ia ʼe nātou fai anai he gāue ʼe lahi age ʼi te gāue ʼaē neʼe kamata. (Soa. 14:12) Neʼe fakamuʼamuʼa e Sesu te gāue fai faka mafola, heʼe tokoni ai ki te hahaʼi ke nātou ʼiloʼi te ala ʼo te maʼuli.—Soa. 17:3.
3 Ki te ʼapositolo ko Paulo, ko tana gāue fai faka mafola neʼe ko he “maua,” neʼe mole feala ke ina meʼa noaʼi. (1 Ko. 9:16, 17) Neʼe lotolelei ke ina fai he ʼu sakilifisio, ke ina kātakiʼi te ʼu faigataʼaʼia, peʼe ke ina tali te ʼu mamahi fuli moʼo fakahoko tana minisitelio. (Gaue 20:22-24) Neʼe toe tatau te manatu ʼa te ʼapositolo ko Petelo pea mo tana ʼu kaugā gāue. Logola neʼe pilisoniʼi nātou pea mo tā nātou, kae neʼe “nātou haga akoʼi pea mo tala te logo lelei ʼo ʼuhiga mo Kilisito, Sesu.”—Gaue 5:40-42, MN.
4 E feafeaʼi ia tatou? ʼE tou fakamuʼamuʼa koa te gāue ʼaē ko te tala ʼo te logo lelei ʼo te Puleʼaga pea mo fai ʼo he ʼu tisipulo? Ohage ko Sesu, ʼe tou manatu moʼoni koa kia nātou ʼaē ʼe “natou fakaofaofa pea mo ogosia o hage he u ovi e mole honatou tauhiovi”? (Mat. 9:36) Ko te ʼu meʼa ʼaē ʼe hoko ʼi te temi nei ʼi te malamanei pea mo te ʼu lea faka polofeta ʼo te Tohi-Tapu ʼe nātou fakahā lelei mai kua ōvi mai te fakaʼosi ʼo te tuʼu agakovi ʼaenī! Ko tatatou manatuʼi te maʼuhiga ʼo te gāue fai faka mafola ʼe ina uga anai tatou ke tou faʼafai ʼi te fai faka mafola.
5 Koutou Vakavakaʼi Takotou ʼAluʼaga: Mai tona ʼaluʼaga ʼaē ʼe tau fetogi te ʼu ʼaluʼaga ʼo tatou takitokotahi, koia ʼe lelei mokā tou vakavakaʼi ʼi ʼihi temi peʼe feala ke tou fai he ʼu fetogi ke lahi age tatatou kau ki te gāue fai faka mafola. Ko te tuagaʼane neʼe pionie katoa ʼi te ʼu taʼu 1950, mo te ʼu taʼu 1960 pea mo te ʼu taʼu 1970, pea neʼe tonu leva ke ina tuku he neʼe mahaki. Kae ʼaki te temi, neʼe toe logo lelei leva. Mole heʼeki faʼa fualoa, neʼe ina vakavakaʼi tona ʼaluʼaga pea neʼe ina sio ʼe feala ke toe pionie. Neʼe fiafia lahi ʼi tana kau ki te Ako ʼo te kau pionie ʼi tona taʼu 90. Kaeā koutou? Kua koutou vave letelete koa peʼe kua koutou vave maʼu koa te pepa ʼaē ʼe koutou faiga kiai ʼi takotou ako? Ko te fetogi ʼo tokotou ʼaluʼaga ʼe ina faka fealagia koa ke koutou pionie?
6 ʼI te tokagaʼi ʼaē e Sesu ko Maleta “nee fe’hohaʼaki . . . i te lahi o [te ʼu] mea [ʼaē] e gaohi,” ʼaki he ʼu palalau mālū, neʼe ina ʼui age kia ia ʼe ina maʼu anai he ʼu tapuakina ʼe lahi age mo kapau ʼe ina faka faigafua te ʼu meʼa ʼaē ʼe ina fai. (Luka 10:40-42) ʼE feala koa ke koutou faka faigafua tokotou maʼuli? ʼE ʼaoga moʼoni koa ke gāue toko lua he taumatuʼa? Kapau ʼe fai he ʼu fetogi, pea ʼe feʼauga koa maʼa te famili te lī totogi ʼa he tokotahi? Neʼe tapuakina lahi te tokolahi he neʼe fai he ʼu fetogi ke nātou kau lahi age ʼi te minisitelio.
7 ʼOfa pe ke tou mulimuli fuli ki te faʼifaʼitaki ʼaē neʼe tuku mai e Sesu pea mo te kau ʼapositolo! ʼE feala ke tou tui papau ʼe tapuakina anai tatou e Sehova, ʼi tatatou faiga ʼaē ke tou kau lahi ki te gāue maʼuhiga ʼaē ko te faka mafola ʼo te logo lelei ʼo te Puleʼaga.—Luka 9:57-62.