Te Gāue ʼAē ʼe Tou Fakamuʼamuʼa
1. Neʼe fakahā feafeaʼi e Sesu neʼe maʼuhiga kiā ia tana minisitelio?
1 Neʼe fakamuʼamuʼa e Sesu ia tana minisitelio. Neʼe gāue kinakina, ʼo haʼele ʼi ni ʼu kilometa e lauʼi teau ʼi Palesitina, ʼo fai fakamafola ki te hahaʼi e tokolahi. Neʼe ina taupau ia he maʼuli ʼe faigafua, ke lahi ai tona temi ʼaē ke ina fakaʼaogaʼi ki te minisitelio pea mo tokaga tāfito kiai. (Mat. 8:20) ʼI te faigaʼi ʼaē e te hahaʼi tokolahi ke natou tāʼofi ia Sesu ke ʼaua naʼa mavae iā nātou, ke ina fakamālōlō tanatou ʼu mahaki, neʼe ina ʼui fēnei: “ ʼE tonu ke au toe fakamafola te logo lelei ʼo te puleʼaga ʼo te ʼAtua ki ʼihi kolo, heʼe ko te tupuʼaga lā ʼaia ʼo toku fekauʼi mai.”—Luka 4:43.
2. He koʼē neʼe maʼuhiga ʼaupitō kiā Sesu tana minisitelio?
2 He koʼē neʼe maʼuhiga ʼaupitō kiā Sesu tana minisitelio? Ko te faʼahi ʼaē neʼe manatu tāfito kiai neʼe ko te fakatapuhā ʼo te huafa ʼo Sehova. (Mat. 6:9) Neʼe ʼofa ia ki tana Tamai ʼaē ʼi selō pea neʼe ina fia fakahoko ia te finegalo ʼo tana Tamai pea mo fakalogo ki Tana ʼu fakatotonu fuli. (Soa. 14:31) Tahi ʼaē meʼa, neʼe tokaga fakamālotoloto Sesu ki te hahaʼi pea mo fia tokoni kiā nātou.—Mat. 9:36, 37.
3. ʼE tou lava fakahā feafeaʼi ʼe tou tōkakaga tāfito ki tatatou minisitelio?
3 Tou Faʼifaʼitakiʼi Ia Sesu: ʼE feala ke faigataʼa ʼaupitō ia te fakamuʼamuʼa tuʼumaʼu ʼaē ʼo te minisitelio ohagē ko Sesu, koteʼuhi ko te mālama ʼaenī ʼe ina toʼo ʼaupitō totatou temi pea ʼe lahi tana ʼu fakafiafia. (Mat. 24:37-39; Luka 21:34) Koia, ʼe tonu ai ke tou ʼiloʼi papau ia te ʼu gāue ʼaē ʼe maʼuhiga age, ʼo tou toʼo he temi ke tou teuteu ki te gāue fai fakamafola pea mo kau tuʼumaʼu kiai. (Filp. 1:10) ʼE tou faiga ke tou fakafaigafua tuʼumaʼu pē totatou maʼuli pea ke mole tou fakaʼaogaʼi kātoa ia te ʼu lelei ʼo te mālamanei.—1 Ko. 7:31.
4. He koʼē ʼe maʼuhiga ʼi te temi nei ke tou fakamuʼamuʼa ia te gāue pē ʼaē ʼe tahi ʼe maʼuhiga tāfito age?
4 Ko ia ʼaē ʼe fakapotopoto, kā fakatuʼakoi tona temi, pea ʼe ina fakamuʼamuʼa anai ia te ʼu gāue ʼaē ʼe maʼuhiga. Ohagē lā, kapau ʼe ina ʼiloʼi ʼe ʼamanaki hoko mai he toe ʼafā lahi, ʼe ina fakaʼaogaʼi tāfito anai tona temi pea mo tona mālohi moʼo puipui tona fāmili pea mo fakahā age ki tona ʼu vāhaʼa fale te faʼahi ʼaia. ʼE ina tuku keheʼi anai te ʼu gāue ʼaē ʼe mole faʼa maʼuhiga. Kua nounou te temi ʼaē kei toe ʼi muʼa ʼo te hoko mai ʼo te ʼafā ʼo Halamaketone. (Sofo. 1:14-16; 1 Ko. 7:29) Ke haofaki tātou pea mo nātou ʼaē ʼe fakalogo mai, ʼe tonu ke tou tōkakaga tuʼumaʼu kiā tātou pea mo tatatou faiakonaki, ʼi te loto kōkelekāsio peʼe ʼi tuʼa atu. (1 Tim. 4:16) ʼEī, ʼe fakalogo totatou haofaki ki tatatou fakamuʼamuʼa tuʼumaʼu aipē ia tatatou minisitelio!