“ ʼE Ina Foaki Ia Te Mālohi Kiā Ia ʼAē Kua Gaʼegaʼe”
1 Ko tātou fuli ʼi ʼihi temi ʼe tou gaʼegaʼe ai. Lagi ʼuhi ko tata gāue faka mālama peʼe ko he ʼu gāue pē ʼe tou fai, kae ʼe ʼi ai foki mo te ʼu fihifihia ʼe tou tau mo ia ʼi “te ʼu temi maʼuhiga ʼaupitō mo faigataʼa [ʼaenī].” (2 Tim. 3:1) ʼI totatou ʼuhiga kaugana ʼa Sehova, ʼe feafeaʼi hatatou maʼu ia te mālohi fakalaumālie ʼaē ʼe ʼaoga kiā tātou ke ʼaua naʼa tou vaivai ʼi tatatou minisitelio? ʼE tou maʼu ia te mālohi ʼaia mo kapau ʼe tou falala kiā Sehova, ia ia ʼaē ʼe “mālohi [foki] ia ʼi tona māfimāfi.” (Isa. 40:26) ʼE ina ʼiloʼi ia te ʼu meʼa ʼaē ʼe ʼaoga kiā tātou pea ʼe fia tokoni moʼoni mai ia kiā tātou.—1 Pet. 5:7.
2 Te ʼu Fakatuʼutuʼu ʼa Sehova: ʼE faka mālohiʼi tātou e Sehova ʼaki tona laumālie māʼoniʼoni, ia te mālohi fakatalakitupua ʼaē neʼe ina fakaʼaogaʼi moʼo fakatupu ia meʼa fuli ʼi te ʼatulaulau. ʼE tokoni mai te laumālie ʼo te ʼAtua ke tou “toe mālolohi” mo kapau ʼe tou gaʼegaʼe. (Isa. 40:31) Kotou fai ia te fehuʼi ʼaenī: ‘Ko ʼanafea ʼaē neʼe au kole fakamālotoloto ai ia te laumālie māʼoniʼoni moʼo faka mālohiʼi au ke au fakahoko toku ʼu maʼua faka Kilisitiano?’—Luka 11:11-13.
3 Kapau ʼi te ʼaho fuli ʼe tou lau pea mo metitāsioʼi te Folafola ʼa te ʼAtua pea mo tou kakai ʼi te faʼahi fakalaumālie ʼaki ia he ako tuʼumaʼu ʼo te ʼu tohi faka Tohi-Tapu, ʼe tou hagē anai ko he “fuʼu ʼakau [mālohi] ʼe tō ovi ki te vaitafe, ʼe fua ʼi tona temi totonu pea ʼe mole fefe tona ʼu lau.”—Pes. 1:2, 3.
4 ʼE toe fakaʼaogaʼi foki e Sehova ia totatou ʼu tehina mo tuagaʼane ʼi te tui, ke natou liliu ko “he tokoni ʼe fakaloto mālohi” kiā tātou. (Kol. 4:10, 11) ʼE natou fakaloto mālohiʼi tātou ʼi te ʼu fono ʼaki tanatou ʼu fai palalau fakaloto mālohi, pea mo tanatou ʼu tali, pea mo tanatou ʼu kiʼi akonaki. (Gāue 15:32) Pea ko te kau tagata ʼāfea tāfito ʼaē ʼe natou foaki mai ia te tokoni fakalaumālie pea mo te fakaloto mālohi.—Isa. 32:1, 2.
5 Te Minisitelio: Kapau ʼe kotou logoʼi kua kotou vaivai fakalaumālie, ʼaua naʼa tuku takotou fai faka mafola! Ko tata kau tuʼumaʼu ki te minisitelio ʼe mole tatau ia mo te ʼu tuʼuga gāue ʼaē ʼe tou fai, heʼe ina fakaloto mālohiʼi moʼoni tātou. (Mat. 11:28-30) Ko te faka mafola ʼo te logo lelei ʼe tokoni mai kiā tātou ke tou manatuʼi tuʼumaʼu ia te Puleʼaga ʼo te ʼAtua pea mo te maʼuli heʼegata mo tona ʼu tapuakina ʼaē ki te kā haʼu.
6 ʼE kei toe lahi atu ia te ʼu gāue ke tou fai ʼi muʼa ʼo te fakaʼauha ʼo te tuʼu agakovi ʼaenī. ʼE lahi te ʼu tupuʼaga ke tou nonofo mālolohi ai ʼi tatatou selevisi, “[ʼo tou] fakalogo ki te mālohi ʼaē ʼe foaki mai e te ʼAtua.” (1 Pet. 4:11) ʼAki te tokoni ʼa Sehova ʼe tou fai kātoa anai tatatou gāue, heʼe “ina foaki te mālohi kiā ia ʼaē kua gaʼegaʼe.”—Isa. 40:29.