ʼE Foaki e Sehova Te Mālohi Ki ʼAē Kua Gaʼegaʼe
“[Ko Sehova] ʼe ina foaki te mālohi kia ia ʼaē kua gaʼegaʼe; pea ʼe ina fakatuputupu te mālohi ia ia ʼaē ʼe mole hona mālohi.”—Isaia 40:29.
1. Koutou tuku mai he faʼifaʼitaki ʼo te mālohi ʼaē ʼe maʼu e te ʼu meʼa ʼaē neʼe fakatupu e te ʼAtua.
ʼE MOLE he tuʼakoi ʼo te mālohi ʼo Sehova. Pea ʼe lahi te mālohi ʼaē ʼe maʼu ʼi te ʼu meʼa ʼaē neʼe ina fakatupu! Ko he kiʼi atome—ʼaē ʼe faʼufaʼu tāfito ʼaki ia meʼa fuli—ʼe veliveli ʼaupito heʼe maʼu ʼi te kiʼi moʼi toʼi vai e tahi te ʼu lauʼi teau miliale mo miliale atome.a ʼE fakalogo te maʼuli ʼo meʼa fuape ʼi totatou kele, ki te mālohi ʼaē ʼe tupu mai te malave ʼa te ʼu atome ki te laʼā. Kae ʼe lahi feafeaʼi te mālohi ʼo te laʼā ʼaē ʼe ʼaoga moʼo taupau te maʼuli? ʼE maʼu e te kele te kiʼi koga veliveli ʼo te mālohi katoa ʼaē ʼe fakatupu e te laʼā. Kae ko te kiʼi koga veliveli ʼaupito ʼo te mālohi ʼo te laʼā ʼaē ʼe tō ki te kele ʼe lahi maumau age ia ʼi te mālohi katoa ʼaē ʼe fakaʼaogaʼi e te ʼu fale faʼu hila ʼi te kele katoa.
2. Koteā te manatu tāfito ʼaē ʼe fakahā ia Isaia 40:26 ʼo ʼuhiga mo te mālohi ʼo Sehova?
2 Kapau ʼe tou fakakaukauʼi ʼo ʼuhiga mo te atome, peʼe tou tokagaʼi te lahi ʼo te ʼatulaulau, pea ʼe tou ōfo lahi ai ʼi te mālohi ʼaupito ʼo Sehova. Neʼe feala ai ke ina ʼui fēnei: “Hiki ʼokotou ʼu mata ki ʼoluga pea ke koutou sio. Ko ai koa ʼaē neʼe ina fakatupu te ʼu meʼa ʼaia? Ko Ia ʼaē neʼe ina fakaʼasi mai ki tuʼa ʼonatou kautau ʼo fai pe ki tona tokolahi, pea ina pāui fuli nātou ʼi ʼonatou higoa. ʼI te lahi ʼo te mālohi, heʼe toe mālohi foki ʼi tona māfimāfi, ʼe mole puli he tahi ia nātou.” (Isaia 40:26) Ei, ko Sehova ʼe ‘mālohi ʼi tona māfimāfi,’ pea ʼe ko te Matapuna ʼo te “mālohi” ʼaē neʼe ina fakaʼaogaʼi moʼo fakatupu te ʼatulaulau katoa.
Ko He Mālohi ʼe Laka Age ʼi Te Mālohi Māhani
3, 4. (a) Koteā te ʼu faʼahi ʼaē ʼe feala ke tou gaʼegagaʼe ai? (b) Koteā te fehuʼi ʼaē ʼe tonu ke tou vakaʼi?
3 ʼE mole he tuʼakoi ʼo te mālohi ʼo te ʼAtua, kae ko te tagata ʼe feala ke gaʼegaʼe. ʼI te potu fuli ʼaē ʼe tou ʼolo kiai, ʼe tou sio ki te hahaʼi kua nātou gaʼegaʼe. ʼE nātou ʼaʼala ake ʼe nātou gaʼegaʼe, ʼe nātou ʼolo ʼo gāue peʼe ʼolo ʼo ako ʼe nātou gaʼegaʼe, ʼe nātou liliu mai ki fale ʼe nātou gaʼegaʼe, pea ʼe nātou ʼolo ʼo momoe gaʼegaʼe pea mo ogosia. Ko ʼihi ʼe nātou fakaʼamu ke nātou ʼolo ki he koga meʼa ʼo mālōlō ai. ʼI totatou ʼuhiga kaugana ʼa Sehova, ʼe tou toe gaʼegaʼe mo tatou, koteʼuhi ʼe tonu ke tou haga faiga mālohi ke tou pipiki maʼu ki te ʼAtua ʼi totatou maʼuli. (Maleko 6:30, 31; Luka 13:24; 1 Timoteo 4:8) Pea ʼe lahi te tahi ʼu faʼahi ʼe nātou fakavaivai ai totatou mālohi.
4 Logola totatou ʼuhiga Kilisitiano, kae ʼe mole tou hāo mai te ʼu fihifihia ʼaē ʼe hoko ki te hahaʼi fuape. (Sopo 14:1) ʼE feala ke tou lotovaivai ʼuhi ko te mahaki, mo te puli paʼaga, peʼe ko te tahi ʼu faigataʼaʼia ʼo te maʼuli. ʼO hilifaki ki te ʼu fihifihia ʼaia, ʼe toe ʼi ai mo te ʼu ʼahiʼahi ʼaē ʼe fai tāfito kia nātou ʼaē ʼe fakatagaʼi ʼuhi ko te faitotonu. (2 Timoteo 3:12; 1 Petelo 3:14) ʼUhi ko te ʼu fakaneke ʼi te ʼaho fuli ʼo te mālama, pea mo te fakafeagai ki tatatou gāue fai faka mafola ʼo te Puleʼaga, ko ʼihi ia tatou kua lagi gaʼegagaʼe, ʼo tou manatu kua veliveli tatatou tauhi kia Sehova. Tahi ʼaē meʼa, ko Satana te Tevolo ʼe ina fakaʼaogaʼi ia meʼa fuape ʼaē ʼe ina maʼu moʼo maumauʼi tatatou nofo agatonu ki te ʼAtua. Koia, ʼe tou lava maʼu feafeaʼi te mālohi fakalaumālie ʼaē ʼe ʼaoga ke ʼaua naʼa tou gaʼegagaʼe pea mo līaki tatatou agatonu?
5. He koʼe ʼe mole feala ke tou fakahoko te minisitelio faka Kilisitiano ʼaki pe te mālohi fakatagata?
5 Moʼo maʼu te mālohi fakalaumālie, ʼe tonu ke tou falala kia Sehova, te Tupuʼaga ʼo te mālohi fuli. Moʼo fakahoko te minisitelio faka Kilisitiano, neʼe fakahā lelei e te ʼapositolo ko Paulo ʼe ʼaoga he mālohi ʼe lahi age ʼi te mālohi ʼo te hahaʼi agahala. Neʼe ina tohi fēnei: “E matou mau te koloa aeni i he u hina kele’kula, ke ha e ko te malohi tauʼoluga pau o te Atua, kae e mole haù maia matou.” (2 Kolonito 4:7) ʼE fakahoko e te kau Kilisitiano fakanofo “te gaue o te fakatokatoka,” ʼaki te tokoni ʼo tonatou ʼu kaugā gāue ʼaē ʼe nātou ʼamanaki ke nātou maʼuʼuli ʼi te kele. (2 Kolonito 5:18; Soane 10:16; Apokalipesi 7:9) ʼUhi ʼaē ko tatou ko te ʼu hahaʼi agahala ʼe tou fai te gāue ʼa te ʼAtua logola te ʼu fakataga, kae ʼe mole feala ke tou fai te gāue ʼaia ʼaki pe totatou mālohi. ʼE tokoni mai ia Sehova kia tatou ʼaki tona laumālie maʼoniʼoni, pea ʼe hā ʼi totatou ʼu vaivai tona mālohi. Pea ʼe tou loto fīmālie heʼe fakapapau mai ko “Sehova ʼe tokoni anai ki te kau faitotonu.”—Pesalemo 37:17.
‘Ko Sehova Totatou Mālohi’
6. ʼE fakamoʼoni feafeaʼi mai e te Tohi-Tapu ko Sehova ʼe ko totatou Matapuna ʼo te mālohi?
6 Ko tatatou Tāmai ʼaē ʼi selo ʼe ‘mālohi ʼi te māfimāfi’ pea ʼe faigafua kia ia hana foaki mai te mālohi. Ei, ʼe ʼui fēnei mai kia tatou: “[Ko Sehova] ʼe ina foaki te mālohi kia ia ʼaē kua gaʼegaʼe; pea ʼe ina fakatuputupu te mālohi ia ia ʼaē ʼe mole hona mālohi. Ko te kau tamaliki tagata ʼe nātou gaʼegagaʼe anai pea mo vaivavai anai, pea ko te kau talavou ʼe nātou tūkia moʼoni anai, kae kia nātou ʼaē ʼe nātou falala kia Sehova ʼe nātou toe mālolohi anai. ʼE nātou mahiki ake anai ʼaki he ʼu kapakau, ohage ko te ʼu akuila. ʼE nātou lele anai pea ʼe mole nātou vaivavai anai; ʼe nātou haʼele anai pea ʼe mole nātou gaʼegagaʼe anai.” (Isaia 40:29-31) ʼUhi ko te tuputupu ʼo te ʼu fakaneke, ʼe feala ʼi ʼihi temi ke tou hage ko he tagata lele kua gaʼegaʼe, pea mole kei lava hoko atu tana lele. Kae kua tou ōvi ki te laini fakaʼosi ʼo te lele ki te maʼuli, koia ʼe mole tonu ke tou tuku ai. (2 Fakamatala 29:11) Ko totatou Fili, te Tevolo, ʼe feʼaluʼaki “o hage he laione e gugulu,” pea ʼe ina loto ke tou tuku tatatou lele. (1 Petelo 5:8) Tou manatuʼi ko ‘Sehova ʼe ko totatou mālohi pea mo totatou meʼa tali tau,’ pea neʼe lahi te ʼu fakatuʼutuʼu ʼaē neʼe ina fai moʼo ‘foaki te mālohi kia ia ʼaē kua gaʼegaʼe.’—Pesalemo 28:7.
7, 8. Koteā te fakamoʼoni ʼaē ʼe ina fakahā mai neʼe foaki e Sehova te mālohi kia Tavite, mo Hapakuke, pea mo Paulo?
7 Neʼe foaki e Sehova te mālohi kia Tavite ke ina lavaʼi te ʼu faigataʼaʼia lahi. ʼAki he tui pea mo he loto falala katoa, neʼe tohi fēnei e Tavite: “ ʼAki te ʼAtua ʼe tou toe maʼu anai te mālohi, pea ko ia totonu ʼaē ka ina moloki anai totatou ʼu fili.” (Pesalemo 60:12) Neʼe toe foaki e Sehova te mālohi kia Hapakuke ke ina lava fakaʼosi tana gāue faka polofeta. ʼE ʼui fēnei ia Hapakuke 3:19: “Ko Sehova te Tuʼi ʼAliki ʼe ko toku mālohi; pea ʼe ina fai anai ke hage toku ʼu vaʼe ko te ʼu vaʼe ʼo te ʼu tia, pea ʼi toku ʼu potu māʼoluga ʼe ina fakahaʼele anai ʼau.” Pea ʼe toe maʼuhiga mo te faʼifaʼitaki ʼa Paulo, ʼaē neʼe ina tohi fēnei: “E au fealagia te meafuape [ʼi te ʼAtua] ae e ina fakamalohi au.”—Filipe 4:13.
8 Ohage ko Tavite, mo Hapakuke, pea mo Paulo, ʼe tonu ke tou tui ʼe lava foaki mai kia tatou e te ʼAtua te mālohi pea mo hāofaki tatou. ʼI tatatou ʼiloʼi ʼaē ko te Tuʼi ʼAliki ko Sehova ʼe ko totatou Matapuna ʼo “te mālohi,” tou vakaʼi ʼi te temi nei te ʼu faʼahi ʼaē ʼe feala ke tou maʼu ai te mālohi fakalaumālie ʼaē ʼe foaki lahi mai e te ʼAtua.
ʼE Tou Mālolohi ʼAki Te ʼu Fakatuʼutuʼu Fakalaumālie
9. He koʼe ʼe maʼuhiga te ʼu tohi faka Kilisitiano moʼo fafaga ʼo tatou?
9 Ko te ako fakalelei ʼo te Tohi-Tapu ʼaki te ʼu tohi faka Kilisitiano, ʼe feala ai ke tou mālolohi pea ʼe tokoni mai kia tatou. Neʼe hiva fēnei te tagata fai pesalemo: “Manuʼia te tagata ʼaē . . . ko tona fiafia ʼe ʼi te lao ʼa Sehova, pea ʼi tana lao ʼe ina lau leʼo veliveli ʼi te ʼaho mo te po. ʼE liliu moʼoni anai ohage ko he fuʼu ʼakau ʼe to ōvi ki te vaitafe, ʼe fua ʼi tona temi totonu pea ʼe mole fefe tona ʼu lau, pea ko meʼa fuli ʼaē ʼe ina fai ʼe lava anai.” (Pesalemo 1:1-3) ʼE maʼua ke tou kakai ke tou mālolohi ai ʼi te faʼahi fakasino, ʼo toe feiā pe mo kapau ʼe tou fia mālolohi ʼi te faʼahi fakalaumālie, pea ʼe maʼua ke tou kai ki te meʼa kai fakalaumālie ʼaē neʼe foaki mai e te ʼAtua ʼi tana Folafola pea mo te ʼu tohi faka Kilisitiano. Koia ʼe maʼuhiga ai ke tou fai he ako ʼe ʼaoga kia tatou pea ke tou metitasioʼi.
10. Ko te temi fea ʼaē ʼe feala ke tou ako ai pea mo metitasio ai?
10 ʼE fua lelei moʼoni tatatou metitasio ki te ʼu “mea loloto o te Atua.” (1 Kolonito 2:10) Kae ko te temi fea ʼaē ʼe feala ai ke tou metitasio? Ko te foha ʼo Apalahamo, ia Isaake, “neʼe ʼalu ʼo haʼele ʼi tuʼa moʼo metitasio ʼi te tuvao ʼi te lolotoga tō ʼo te pōʼuli.” (Senesi 24:63-67) Ko te tagata fai pesalemo ko Tavite ‘neʼe metitasio ʼo ʼuhiga mo te ʼAtua lolotoga te ʼu temi leʼo ʼo te pōʼuli.’ (Pesalemo 63:6) ʼE feala ke tou ako te Folafola ʼa te ʼAtua pea mo metitasio kiai ʼi te temi fuli pe—ʼi te uhu, ʼi te afiafi, pea mo te pōʼuli. Ko te ako pea mo te metitasio ʼaia ʼe ina taki tatou ki he tahi fakatuʼutuʼu neʼe foaki mai e Sehova ke tou maʼu ai te mālohi fakalaumālie—ko te faikole.
11. He koʼe ʼe tonu ke maʼuhiga kia tatou te faikole tuʼumaʼu?
11 Ko te faikole tuʼumaʼu ki te ʼAtua ʼe tokoni mai ke tou mālolohi. Koia tou haga “kataki . . . i te faikole.” (Loma 12:12) ʼI ʼihi temi, ʼe tonu ke tou faikole tāfito ke tou maʼu te poto pea mo te mālohi moʼo tauʼi he ʼahiʼahi. (Sakopo 1:5-8) Tou toe fakafetaʼi foki pea mo fakavikiviki ki te ʼAtua mokā tou sio ki te fakahoko ʼo tana ʼu fakatuʼutuʼu, peʼe ka tou sio neʼe ina foaki mai te mālohi ke tou haga tauhi kia te ia. (Filipe 4:6, 7) Kapau ʼe tou nonofo ōvi kia Sehova ʼi te faikole, pea ʼe mole ina līaki anai tatou ʼi he temi. Neʼe hiva fēnei ia Tavite: “Koutou sisio! Ko te ʼAtua ʼe ko toku tokoni.”—Pesalemo 54:4.
12. He koʼe ʼe tonu ke tou kole ki te ʼAtua tona laumālie maʼoniʼoni?
12 Ko tatatou Tāmai ʼaē ʼi selo ʼe ina foaki mai te mālohi kia tatou ʼaki tona laumālie maʼoniʼoni, peʼe ko tona mālohi gāue. Neʼe tohi fēnei e Paulo: “ ʼE ʼau tuʼutuli ia muʼa ʼo te Tāmai . . . ke ina faka fealagia atu, ʼo mulimuli ki te lahi ʼo tona kolōlia, ke koutou liliu ʼo mālolohi ʼi tokotou ʼuhiga tagata ʼaē ʼo loto ʼaki te mālohi ʼo tona laumālie.” (Efeso 3:14-16, MN ) ʼE tonu ke tou faikole ke tou maʼu te laumālie maʼoniʼoni, ʼo tou falala ʼe tapuakina anai tatou e Sehova ʼo ina foaki mai tona laumālie. Neʼe ʼui fēnei e Sesu: Kapau ʼe kole e he kiʼi tamasiʼi he moʼi ika, pea ʼe foaki age anai koa e he tāmai ʼofa he gata? Kailoa. Koia neʼe ina ʼui fakaʼosi fēnei: “Kapau leva, ko koutou [ʼaē ʼe agahala pea ʼe feala ke koutou] agakovi, e koutou popoto i te fai meaofa lelei ki autou fanau, pea e lahi feafeai anai te foaki e te Tamai i Selo ia te Laumalie-Maonioni kia ia e ina kole kia te ia.” (Luka 11:11-13) Tou haga faikole ʼaki he loto falala pea mo tou manatuʼi tuʼumaʼu ko te ʼu kaugana agatonu ʼa te ʼAtua ʼe feala ke nātou “mālolohi” ʼaki te mālohi ʼo tona laumālie.
Te Kokelekasio ʼe Ko He Tokoni ʼe Fakaloto Mālohi
13. ʼE tonu ke tou manatu feafeaʼi ʼo ʼuhiga mo te ʼu fono faka Kilisitiano?
13 ʼE tou maʼu te mālohi mai ia Sehova ʼi te ʼu fono ʼo te kokelekasio faka Kilisitiano. Neʼe ʼui fēnei e Sesu: “Ko te faahi e fakatahi ai he tokolua, pe ko he tokotolu i toku huafa, e au afio i te lotolotoga o natou.” (Mateo 18:20) ʼI te temi ʼaē neʼe fai ai e Sesu te fakapapau ʼaia, neʼe lolotoga palalau ki te ʼu faʼahi ʼaē neʼe tonu ke tokaga kiai te kau takitaki ʼo te kokelekasio. (Mateo 18:15-19) Kae ʼe faka ʼuhiga tana ʼu palalau ki tatatou ʼu fono pea mo tatatou ʼu fakatahi fuli, ʼaē ʼe kamata pea mo fakaʼosi ʼaki he faikole ʼi tona huafa. (Soane 14:14) Koia ʼe ko he pilivilesio hatatou kau ki te ʼu fakatahi faka Kilisitiano ʼaia, tatau aipe peʼe ko te tokosiʼi ʼaē ʼe kau kiai peʼe ko te lauʼi afe. Koia tou fakahā te loto fakafetaʼi ki te ʼu lakaga ʼaia ʼaē ʼe fakaloto mālohi ai tatou ʼi te faʼahi fakalaumālie, pea mo uga ai tatou ki te ʼofa pea mo te ʼu gāue lelei.—Hepeleo 10:24, 25.
14. Koteā te ʼu fua lelei ʼaē ʼe tou maʼu mai te ʼu faiga ʼa te kau tagata ʼāfea Kilisitiano?
14 ʼE foaki e te kau tagata ʼāfea te tokoni pea mo te fakaloto mālohi ʼi te faʼahi fakalaumālie. (1 Petelo 5:2, 3) Neʼe tokoni pea mo fakaloto mālohiʼi e Paulo te ʼu kokelekasio ʼaē neʼe ina ʼaʼahi, ohage ko tona fai e te ʼu tēhina feʼoloʼaki ia ʼaho nei. Neʼe fakaʼamu lahi ke nofo mo tona ʼu tēhina ʼi te tui, ke nātou felagaʼaki ʼaki he ʼu fakaloto mālohi. (Gaue 14:19-22; Loma 1:11, 12) Tou fakaʼamu ke tou fakahā tuʼumaʼu he loto fakafetaʼi ki totatou ʼu tagata ʼāfea pea mo te tahi ʼu tēhina taupau Kilisitiano, ʼaē ʼe tokoni lahi kia tatou ke tou mālolohi ʼi te faʼahi fakalaumālie.
15. Koteā “[te] tokoni ʼe fakaloto mālohi” ʼaē ʼe tou maʼu ʼi te ʼu tēhina ʼo totatou kokelekasio?
15 Ko totatou ʼu tēhina ʼi te tui ʼi totatou kokelekasio, ʼe “ko he tokoni ʼe fakaloto mālohi.” (Kolose 4:10, 11, MN ) ʼI tonatou ʼuhiga ‘kaumeʼa moʼoni,’ ʼe feala ke nātou tokoni mai kia tatou ʼi te ʼu temi faigataʼa. (Tāʼaga Lea 17:17) Ohage la, ʼi te temi ʼo te pule Nasi ʼi te taʼu 1945, neʼe faka ʼāteaina ai te toko 220 ʼu kaugana ʼa te ʼAtua mai te lotoʼā fakamamahi ʼi Sachsenhausen, pea neʼe nātou haʼele ia kilometa e 200. Neʼe nātou haʼele faka kūtuga, pea ko nātou ʼaē neʼe mālolohi neʼe nātou fakaheka nātou ʼaē ʼe vaivai age ʼi te ʼu kiʼi saliote veliveli. Koteā ʼaē neʼe hoko ki muli age? ʼI te haʼele ʼaia ki te mate, neʼe ko te toko 10 000 tupu ʼo te lotoʼā fakamamahi ʼaē neʼe mamate, kae neʼe mole mate he Fakamoʼoni ʼa Sehova. ʼE maʼu te ʼu fakamatala feiā ʼi te ʼu tohi ʼa te Sosiete Watch Tower, ohage ko te Annuaire des Témoins de Jéhovah pea mo te tohi Les Témoins de Jéhovah : Prédicateurs du Royaume de Dieu, pea ʼe fakamoʼoni ai ʼe foaki e te ʼAtua te mālohi ki tana hahaʼi, pea ʼe mole nātou līaki tanatou tui.—Kalate 6:9.b
ʼE Tou Mālolohi ʼi Tatatou Fai Faka Mafola
16. ʼE tou maʼu feafeaʼi te mālohi fakalaumālie mokā tou kau tuʼumaʼu ki te minisitelio?
16 Kapau ʼe tou kau tuʼumaʼu ki te gāue fai faka mafola ʼo te Puleʼaga, pea ʼe tou mālohi ai ʼi te faʼahi fakalaumālie. Ko te gāue ʼaia ʼe tokoni mai kia tatou ke tou haga tokaga ki te Puleʼaga ʼo te ʼAtua, pea mo tou ʼamanaki ki te heʼegata pea mo te ʼu tapuakina ʼaē ka tou maʼu ai. (Suta 20, 21) Ko te ʼu fakapapau ʼo te Tohi-Tapu ʼaē ʼe tou palalau kiai ʼi totatou minisitelio, ʼe nātou foaki mai kia tatou te ʼamanaki pea ʼe tou hage ko te polofeta ko Mikea, ʼaē neʼe ina ʼui fēnei: “ ʼE tou haʼele anai ʼi te huafa ʼo Sehova totatou ʼAtua ʼo heʼegata, ei, ʼo talu ai.”—Mikea 4:5.
17. Koteā te ʼu tokoni ʼaē ʼe tou maʼu ʼo ʼuhiga mo te ʼu ako Tohi-Tapu?
17 ʼE mālohi tatatou ʼu felogoi mo Sehova mokā tou fakaʼaogaʼi lahi te Tohi-Tapu moʼo akoʼi te hahaʼi. Ohage la, ka tou fai he ʼu ako Tohi-Tapu ʼaki te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, ʼe lelei anai ke tou lau pea mo fai palalau ki ʼihi vaega faka Tohi-Tapu ʼaē ʼe tuʼu ai. ʼE tokoni te faʼahi ʼaia kia ia ʼaē ʼe ako, pea ʼe mālohi ai mo tatatou mahino ki te Tohi-Tapu. Kapau ʼe mole mahino lelei ia ia ʼaē ʼe ako ki he manatu ʼi te Tohi-Tapu peʼe ko he lea fakatātā, pea ʼe lagi tonu anai ke tou fai tuʼa lahi te ako ʼi he kapite e tahi ʼo te tohi Te ʼAtamai Mālama. ʼE tou fiafia lahi anai ʼi te teuteuʼi lelei pea mo faiga lahi ke tou tokoni ki te hahaʼi ke nātou fakaōvi ki te ʼAtua!
18. Koutou tuku mai he faʼifaʼitaki ʼo te fakaʼaogaʼi lelei ʼo te tohi Te ʼAtamai Mālama.
18 ʼI te taʼu fuli, ko te tohi Te ʼAtamai Mālama ʼe fakaʼaogaʼi lelei moʼo tokoni ki te lauʼi afe hahaʼi ke nātou liliu ko he ʼu kaugana kua foaki tonatou maʼuli kia Sehova, pea ʼe kau kiai mo te hahaʼi tokolahi ʼaē neʼe mole nātou ʼiloʼi te Tohi-Tapu. Ohage la, ʼi tana kei veliveli, ko te tagata Inituisi ʼi Sri Lanka neʼe logo ki te palalau ʼa te tuagaʼane Fakamoʼoni ʼo ʼuhiga mo te Palatiso. Hili kiai ni ʼu taʼu, neʼe fai palalau mo te tuagaʼane ʼaia, pea neʼe kamata fai e te ʼohoana ʼo te tuagaʼane tana ako Tohi-Tapu. Ei, neʼe haʼu te tagata ʼo ako ʼi te ʼaho fuli pe, pea mole fualoa pea neʼe kua ina ako katoa te tohi Te ʼAtamai Mālama. Neʼe kamata kau ki te ʼu fono fuli, neʼe mavae ʼi tana lotu, pea neʼe liliu ko he kaugā fagona. ʼI te temi ʼaē neʼe papitema ai, neʼe ina fai te ako Tohi-Tapu ʼa te tagata neʼe nā feʼiloʼiʼaki.
19. Kapau ʼe tou fakamuʼamuʼa te Puleʼaga, pea koteā ʼaē feala ke tou tui papau kiai?
19 Kapau ʼe tou haga fakamuʼamuʼa te Puleʼaga, pea ʼe tou maʼu ai te fiafia ʼaē ʼe fakaloto mālohi. (Mateo 6:33) Logola ʼe tou tau mo te ʼu ʼahiʼahi kehekehe, kae tou haga faka mafola te logo lelei ʼaki he loto fiafia pea mo he loto faʼafai. (Tito 2:14) Tokolahi ia tatou ʼe feala ke tou liliu ʼo pionie katoa, pea ko ʼihi ʼe nātou tauhi ʼi te ʼu koga meʼa ʼaē ʼe ʼaoga lahi ai he kau fai faka mafola. Tatau aipe pe koteā te meʼa ʼaē ʼe tou fai ʼaki he loto fiafia moʼo fakahaʼele ki muʼa te ʼu gāue ʼa te Puleʼaga, kae ʼe tou falala ko Sehova ʼe mole ina galoʼi anai tatatou gāue pea mo te ʼofa ʼaē ʼe tou fakahā ki tona huafa.—Hepeleo 6:10-12.
Tou Hoko Atu ʼAki Te Mālohi ʼo Sehova
20. ʼE tou lava fakahā feafeaʼi ʼe tou kumi te mālohi ʼo Sehova?
20 ʼAki totatou loto katoa, tou fakahā ʼe tou tui kia Sehova pea mo tou kumi tona mālohi. ʼE feala ke tou fai feiā mo kapau ʼe tou tali te ʼu fakatuʼutuʼu fakalaumālie ʼaē ʼe ina foaki mai ʼaki te ‘tagata kaugana agatonu.’ (Mateo 24:45) Ko tatatou ako takitokotahi ia te Folafola ʼa te ʼAtua pea mo ako ʼaki te kokelekasio ʼo fakaʼaogaʼi te ʼu tohi faka Kilisitiano, mo tatatou faikole fakamalotoloto, mo te tokoni ʼa te kau tagata ʼāfea, mo te ʼu faʼifaʼitaki lelei ʼo totatou ʼu tēhina mo tuagaʼane agatonu, pea mo tatatou kau tuʼumaʼu ki te minisitelio, ʼe ko te ʼu meʼa ʼaia ʼaē ʼe mālohi ai tatatou ʼu felogoi mo Sehova pea mo tou maʼu ai te mālohi moʼo hoko atu tatatou tauhi taputapu.
21. Neʼe fakahā feafeaʼi e te ʼu ʼapositolo ko Petelo pea mo Paulo te ʼaoga ʼo te mālohi ʼo te ʼAtua?
21 Logola totatou ʼuhiga agahala, kae ʼe foaki mai anai e Sehova te mālohi ke tou fai tona finegalo, mo kapau ʼe tou tali ke tokoni mai kia tatou. ʼI tana ʼiloʼi te ʼaoga ʼo te tokoni ʼaia, neʼe tohi fēnei e te ʼapositolo ko Petelo: “Kapau ʼe tauhi he tahi, pea ke tauhi ohage ko he tahi ʼe fakalogo ki te mālohi ʼaē ʼe foaki mai e te ʼAtua.” (1 Petelo 4:11, MN ) Pea neʼe fakahā e Paulo tana falala ki te mālohi ʼaē ʼe foaki mai e te ʼAtua, ʼi tana ʼui fēnei: “E au fiafia i te u vaivai, i te u vaivaiga, i te u faigataa, i te u fakataga mo te u tuutamaki o uhiga mo Kilisito! Koteuhi e hoki au malohi moka e hoki au vaivai.” (2 Kolonito 12:10) Tou fakaʼamu ke tou fakahā he tui ʼe tatau pea mo tou faka kolōliaʼi te Tuʼi ʼAliki ko Sehova, ʼaē ʼe ina foaki te mālohi kia ia ʼaē ʼe gaʼegaʼe.—Isaia 12:2.
[Kiʼi nota]
a Ko te fakafuafua ʼaia neʼe fai ʼi Amelika, ʼe ko te 1 ʼo hoa kiai te ʼu selo e 20.
b Neʼe tā e te Watchtower Bible and Tract Society of New York, Inc.
ʼE Koutou Tali Feafeaʼi Anai?
• He koʼe ʼe ʼaoga ki te hahaʼi ʼa Sehova he mālohi ʼe laka age ʼi te mālohi māhani?
• Koteā te fakamoʼoni faka Tohi-Tapu ʼaē ʼe ina fakahā mai ʼe foaki e te ʼAtua te mālohi ki tana ʼu kaugana?
• Koteā ʼihi fakatuʼutuʼu fakalaumālie ʼaē neʼe foaki mai e Sehova ke tou mālolohi ai?
• ʼE tou lava fakahā feafeaʼi ʼe tou kumi te mālohi ʼo te ʼAtua?
[Paki ʼo te pasina 12]
ʼE mālohi tatatou ʼu felogoi mo Sehova mokā ʼe tou fakaʼaogaʼi te Tohi-Tapu moʼo akoʼi te hahaʼi