ʼE Foaki Mai e Sehova Te Mālohi
1 Koteā takotou manatu ʼo ʼuhiga mo te ʼapositolo ko Paulo? Ka tou lau te tohi ʼo Gaue, ʼe tou ōfo ʼi tana gāue kinakina ʼi te tauhi kia Sehova. Neʼe fakahoko feafeaʼi e Paulo te ʼu gāue fuli ʼaē neʼe ina fai? Neʼe ʼui maʼana: “ ʼE ʼau maʼu te mālohi kia meʼa fuli, ʼuhi ko ia ʼaē ʼe ina foaki mai te mālohi.” (Filp. 4:13, MN ) ʼO toe feiā mo tatou, ʼe tou lava maʼu te mālohi ʼaē ʼe foaki mai e Sehova. ʼO feafeaʼi? Kapau ʼe tou fakaʼaogaʼi te ʼu fakatuʼutuʼu e ono ʼaē ʼe ina fai ke fakaloto mālohiʼi ai tatou ʼi te faʼahi fakalaumālie.
2 Te Folafola ʼa Te ʼAtua: Ohage pe ko te ʼaoga ʼaē ke tou kakai ke feala hatatou mālolohi ʼi te faʼahi fakasino, koia ʼe tonu ke tou kai ki te Folafola ʼa te ʼAtua ke feala hatatou maʼuʼuli ʼi te faʼahi fakalaumālie. (Mat. 4:4) ʼE foaki mai e te Tohi-Tapu te mālohi moʼo taupau ʼo tatou. Moʼo taupau tatatou faʼafai pea mo tatatou fia gāue mālohi ki te moʼoni, ʼe tonu ke tou fai hatatou ako takitokotahi pea mo tou metitasio ʼi te ʼaho fuli mo kapau ʼe feala.—Pes. 1:2, 3.
3 Te Faikole: ʼE maʼuhiga ke tou fakaōvi kia Sehova, tāfito ʼi te ʼu temi ʼaē ʼe kita tau ai mo he ʼu faigataʼaʼia. ʼAki tona laumālie, ʼe ina foaki te mālohi ki te hahaʼi ʼaē ʼe nātou kole age kia te ia ʼi te faikole. (Luka 11:13; Ef. 3:16) ʼE fakaloto mālohiʼi tatou e te Tohi-Tapu ke tou “kataki (...) i te faikole.” (Loma 12:12) ʼE koutou fai koa ia te faʼahi ʼaia?
4 Te Kokelekasio: Tahi ʼaē meʼa, ʼe tou maʼu te mālohi pea mo he fakaloto mālohi, ʼi te ʼu fono ʼo te kokelekasio, pea mo te ʼu fakakaugā fakaloto mālohi ʼaē ʼe tou maʼu ai mokā tou fakatahi mo tatatou ʼu tēhina mo tuagaʼane. (Hep. 10:24, 25) Kapau ʼe tou tau mo he fihifihia, pea ʼe nātou fakaloto mālohiʼi tatou pea mo tokoni mai kia tatou ʼaki he lotoʼofa.—Taag. 17:17; Tnk. 4:10.
5 Te Fai Faka Mafola: Ko te kau tuʼumaʼu ki te minisitelio, ʼe tokoni kia tatou ke tou haga tokaga ki te Puleʼaga pea mo tona ʼu tapuakina. ʼE lagalaga totatou loto mokā tou tokoni ki te hahaʼi ke nātou ʼiloʼi pe ko ai ia Sehova. (Gaue 20:35) ʼE mole feala kia tatou fuli ke tou ʼolo ki te ʼu koga meʼa ʼaē ʼe ʼaoga lahi ai he kau gāue, pea ʼe mole tou lava kau fuli ki te selevisi temi katoa, kae ʼi te tahi ʼu ʼaluʼaga, ʼe feala ke tou kau katoa ki te minisitelio.—Hep. 6:10-12.
6 Te ʼu Tagata Taupau: Ko te ʼu tagata ʼāfea ʼe nātou foaki mai he ʼu fakaloto mālohi pea mo nātou lagolago kia tatou. Neʼe fakatotonu e Sehova ke nātou tauhi tana faga ōvi. (1 Pet. 5:2) Ko te kau tagata taupau feʼoloʼaki, ʼe nātou fakaloto mālohiʼi te ʼu kokelekasio ʼaē ʼe nātou ʼaʼahi, ohage ko te meʼa ʼaē neʼe fai e Paulo ʼi tona temi.—Loma 1:11, 12.
7 Te Faʼifaʼitaki ʼo Te Kau Agatonu: ʼE ko he meʼa fakaloto mālohi hatatou vakaʼi te ʼu faʼifaʼitaki lelei ʼo te kau agatonu ʼo te temi muʼa pea mo te temi nei. (Hep. 12:1) Ka koutou loto ke fakaloto mālohiʼi koutou, he koʼe ʼe mole koutou lau he hisitolia fakaloto mālohi ʼi tatatou ʼu nusipepa, he hisitolia fakaloto mālohi ʼi te Annuaire, peʼe ko he hisitolia fakafiafia ʼo te hisitolia ʼo te temi ʼaenī ʼo te kau Fakamoʼoni ʼa Sehova ʼi te tohi Prédicateurs?
8 Ko te tēhina, neʼe ina tali te moʼoni ka neʼe kei tamasiʼi, pea ʼi te temi nei kua taʼu 90 tupu. ʼI tana kei veliveli, neʼe ʼahiʼahiʼi tana tui. ʼUluaki, ko ʼihi ʼaē neʼe gāue mālohi ʼi te kokelekasio neʼe nātou līaki te kautahi ʼa Sehova. ʼOsi ʼaia pea neʼe faigataʼa kia ia te gāue faka mafola ʼi te ʼu ʼapi. Kae neʼe falala tuʼumaʼu kia Sehova, pea neʼe ina leleiʼia te minisitelio. Pea ʼe feafeaʼi ʼi te temi nei? Logola tana mahamahaki, ʼe kei kau ki te famili ʼo te Petele, pea ʼe kau ki te Kolesi Pule. ʼE mole fakahemala ki tana pipiki maʼu ki te kautahi ʼa Sehova.
9 Ko te tuagaʼane ʼe kau ki te famili ʼo te Petele ʼi Pilitania, neʼe papitema ʼi tona taʼu 13. ʼI te taʼu ʼaē neʼe hoa kiai, neʼe ina kamata tana gāue pionie mo tona tokolua lahi, pea hili kiai te taʼu, neʼe pilisoniʼi tana tāmai he neʼe mole fia kau ki te tau lolotoga te Lua Tau Faka Malamanei. Neʼe falala tuʼumaʼu ki te mālohi ʼa Sehova, pea neʼe ina haga fai aipe tana tauhi ki te ʼAtua moʼoni. ʼAki te temi, neʼe ʼohoana mo te tēhina agatonu, pea neʼe nā hoko fakatahi atu tanā fai ia te finegalo ʼo Sehova. Hili kiai taʼu e 35 ʼo tanā ʼohoana, pea neʼe mate fakafokifā tona ʼohoana. Pea neʼe ina toe kole kia Sehova ke ina foaki age he mālohi, pea neʼe ina hoko atu tana tauhi ʼo aʼu mai ki te ʼaho nei, ʼaki he fakaʼamu ke ina tauhi ʼo talu ai ia Sehova, ʼaki te hahaʼi ʼaē ka maʼuʼuli ʼi te kele.
10 Ko Sehova ʼe tokoni pea mo ina fakaloto mālohiʼi tana ʼu kaugana agatonu. “ ʼE ina foaki te mālohi kia ia ʼaē kua gaʼegaʼe; pea ʼe ina fakatuputupu te mālohi ia ia ʼaē ʼe mole hona mālohi.” ʼE tou lava maʼu te mālohi heʼegata ʼaia mo kapau ʼe tou fakaʼaogaʼi katoa te ʼu fakatuʼutuʼu e ono ʼaē neʼe tou talanoa kiai. Koutou manatuʼi: “[Ko] nātou ʼaē ʼe nātou falala kia Sehova ʼe nātou toe mālolohi anai. . . . ʼE nātou lele anai pea ʼe mole nātou vaivavai anai; ʼe nātou haʼele anai pea ʼe mole nātou gaʼegagaʼe anai.” (Isa. 40:29-31) Neʼe falala ʼaupito ia Paulo ki te mālohi ʼa Sehova, pea ʼe tonu ke toe feiā mo tatou.