Tou Leleiʼia Te Foʼi Fime La Bible : le livre le plus ancien toujours dʼactualité

Ko te ʼu fehuʼi ʼaenī ʼe nātou faka maʼuhigaʼi te ʼu puani ʼe koutou sio anai kiai mokā koutou sioʼi te foʼi fime viteo ʼaia: (1) Koteā te ʼu faʼahi ʼaē ʼe makehe ʼaupito ai te Tohi-Tapu? (2) Koutou tuku mai he faʼifaʼitaki, ʼe hā ʼaki mai ko te Tohi-Tapu, logola tona ʼāfea, kae ʼe ʼalutahi mo te ʼu meʼa fakapoto lalahi ʼo te temi ʼaenī. (3) ʼE tou lava ʼiloʼi feafeaʼi ko te Tohi-Tapu ʼo te temi ʼaenī ʼe tatau mo te ʼu tohi ʼuluaki? (4) Koteā te faʼahi fakaofoofo ʼo te ʼu tohi ʼāfea ʼo te Tohi-Tapu, pea koteā te falala ʼaē ʼe koutou maʼu ʼaki te faʼahi ʼaia? (5) Koteā te ʼu ʼaluʼaga ʼaē neʼe tokoni ai ia John Wycliffe, Johannes Gutenberg, William Tyndale, Mary Jones, pea mo Charles Taze Russell ki te faka mafola ʼo te Folafola ʼa te ʼAtua ʼi te malamanei katoa? (6) Neʼe feafeaʼi te fakafeagai mālohi ʼa te ʼēkelesia ki te Tohi-Tapu, kae koteā ʼaē neʼe tokoni ki tona hāofaki ʼo aʼu mai ki totatou temi? (7) ʼE lahi feafeaʼi te fakaliliu pea mo te tā Tohi-Tapu ʼa te kautahi ʼa Sehova? (8) Neʼe ʼaoga feafeaʼi te ʼu tokoni ʼa te Tohi-Tapu moʼo tokoni ki te hahaʼi ke nātou tauʼi tonatou ʼu fihifihia ʼo ʼuhiga mo te gaoʼi paʼaga (1 Tim. 6:​9, 10), mokā hoko he mavete pea mo te faiʼaga ʼi te taumatuʼa (1 Ko. 13:​4, 5; Ef. 5:​28-​33), pea mo te manako ki te ʼu koloā (Mat. 16⁠:26)? (9) Koteā te ʼu fakamoʼoni ʼaē ʼe nātou fakahā mai, ko te maʼuliʼi ʼo te ʼu pelesepeto faka Tohi-Tapu ʼe nātou lava tauʼi ʼi te malamanei katoa, te fehiʼa faka puleʼaga, te fehiʼa ki te tahi lanu, pea mo te fehiʼa ki te tahi fenua? (10) Koteā te ʼu ʼaluʼaga ʼaē ʼe koutou fiafia lahi ai ʼi takotou ako ia te Tohi-Tapu? (11) Kia koutou, ʼe ʼaoga anai kia ai ia te foʼi fime viteo ʼaia, pea ʼe feafeaʼi anai hakotou fakahā age kia nātou ʼaia?