Te ʼu Fua ʼo Te Faka Mafola ʼAki Te ʼu Foʼi Fime Viteo
1 “Ko tamā tama neʼe ina sioʼi te ʼu foʼi fime viteo kae neʼe mole heʼeki poto ʼi te haʼele. Neʼe ina sioʼi tuʼa lahi. ʼE ko he meʼa fakatalakitupua ia te maʼu ʼo te ʼu meʼa ʼaia moʼo fakahū ki tamā fānau te ʼofa kia Sehova.” Koteā te ʼu foʼi fime viteo ʼaē neʼe talanoa kiai te ʼu mātuʼa Kilisitiano ʼaia? ʼE kau kiai te foʼi fime viteo ʼo Noé : il marchait avec Dieu. Ko te fafine ʼe mole ko he Fakamoʼoni ʼa Sehova kae ko tana kiʼi tama neʼe ina sioʼi te foʼi fime viteo ʼo Noé ʼi te ʼapi ʼo te tahi, pea neʼe ina momoli tola Amelika e 90 ki te filiale pea neʼe ina kole ai peʼe ʼi ai he tahi ʼu foʼi fime maʼa te ʼu tamaliki. Ko te ʼu foʼi fime viteo ʼaē ʼe fai e te kautahi ʼa Sehova ʼe malave ʼaupito ki te kau tūpulaga pea mo nātou kua matutuʼa.
2 ʼI Te Loto Fale: Neʼe sioʼi e te famili Fakamoʼoni ʼa Sehova, ia te foʼi fime viteo La Fermeté des Témoins de Jéhovah face à la persécution nazie, pea neʼe ʼui fēnei e te faʼe: “Neʼe ʼau feʼekeʼaki ʼi te ʼaho fuli, pe koteā ʼaē ʼe fai e Sehova ke lava kātakiʼi ai e he ʼu hahaʼi ohage ko tatou he ʼu meʼa fakamataku feiā! ʼI taku fakakaukauʼi te ʼu faʼahi ʼaia, neʼe ʼau mahino ai ʼe mole faʼa maʼuhiga taku ʼu faigataʼaʼia. Ko tamā sioʼi te foʼi ʼata ʼaia mo tamā fānau, neʼe tokoni ai kia nātou ke nātou mahino lelei ki te ʼaoga ʼaē ke tou falala kia Sehova. Ki muli age, ʼi tamā fai palalau mo nātou ki te foʼi ʼata ʼaia, neʼe ma tokoni ai ki tamā ʼu taʼahine ke nātou nonofo tokaga moʼo kātakiʼi te ʼu faigataʼaʼia pea mo te ʼu fakataga ʼaē ʼe feala ke hoko.”
3 ʼI Te Faleako: ʼI tana fai palalau ia muʼa ʼo tana kalasi, neʼe feala ki te kiʼi tūpulaga Fakamoʼoni ʼa Sehova ke ina fakamamata kia nātou te foʼi fime viteo Fermeté. ʼI te kamata, neʼe ʼui e te fafine faiako ʼe mole ina tali te kau Fakamoʼoni. ʼI tana ʼosi sioʼi te foʼi ʼata, neʼe ina ʼui fēnei: “ ʼAki te foʼi ʼata ʼaia neʼe fetogi katoa ai taku manatu ʼo ʼuhiga mo te kau Fakamoʼoni ʼa Sehova. ʼE ʼau fakapapau atu, kapau ʼe nātou toe ʼōmai ki toku ʼapi, pea ʼe ʼau fakalogo anai kia nātou pea mo ʼau kamata haku ako Tohi-Tapu mo nātou!” He koʼe neʼe fetogi tana manatu ʼaia kia tatou? Neʼe ina ʼui, neʼe tupu ʼuhi ko tatatou “ ʼofa pea mo tatatou agatonu moʼoni.”
4 ʼI Te Minisitelio: Neʼe felāveʼi te tuagaʼane mo te fafine neʼe fai fehuʼi ʼo ʼuhiga mo tatou pea mo tatatou tui, kae neʼe mole ina fia toʼo te ʼu tohi. Neʼe toe liliu age te tuagaʼane mo te foʼi fime viteo Les Témoins de Jéhovah : un nom, une organisation pea neʼe sioʼi e te fafine pea mo tona ʼohoana. Neʼe nā punamaʼuli ʼaupito pea neʼe nā tali ke fai hanā ako Tohi-Tapu. ʼUhi ko te faka mafola lelei ʼaia neʼe fai kia nāua, neʼe nā kamata mulimuli ai ki te finegalo ʼo te ʼAtua.
5 ʼE koutou fakaʼaogaʼi lahi koa tatatou ʼu foʼi fime viteo?