Tou Fakaʼaogaʼi Te ʼu Foʼi ʼAta Viteo Moʼo Akoʼi Te Hahaʼi
1. Neʼe fakaʼaogaʼi feafeaʼi e Sehova he ʼu meʼa neʼe hā moʼo akoʼi tana ʼu kaugana ʼo te temi muʼa, pea neʼe malave feafeaʼi kiā nātou?
1 Moʼo fakahā he logo maʼuhiga ki tana ʼu kaugana ʼo te temi muʼa, neʼe fakaʼaogaʼi ʼi ʼihi temi e Sehova he ʼu meʼa neʼe hā pea mo te ʼu moemisi. Koutou manatuʼi neʼe hā kiā Esekiele te saliote ʼa Sehova ʼaē ʼi selo. (Esk. 1:1-28) Koutou fakakaukauʼi age muʼa pe neʼe feafeaʼi ʼapē te loto ʼa Taniela ʼi tana sio ʼi tana moemisi ki te fakaʼiloʼilo ʼo ʼuhiga mo te ʼu puleʼaga ʼaē ka nātou fefakahoahoaʼaki moʼo puleʼi ia te malamanei. (Tan. 7:1-15, 28) Pea mo te meʼa fakaofoofo ʼaē neʼe hā ai te ʼu “fakaʼiloga” ki te ʼapositolo ko Soane, ʼo ʼuhiga mo te ʼu meʼa ʼaē ka hoko lolotoga “te ʼaho ʼo te ʼAliki.” (Apk. 1:1, 10, MN ) Neʼe fakaʼaogaʼi e Sehova te ʼu faʼahi ʼaia moʼo akoʼi ia te ʼu tagata ʼaia, pea neʼe ko he faʼahi neʼe galo gataʼa kiā nātou.
2. Koteā ʼaē ʼe feala ke tou fakaʼaogaʼi moʼo akoʼi ki te hahaʼi te ʼu moʼoni ʼo te Tohi-Tapu?
2 Kapau ʼe tou fia akoʼi pea mo fakamahino ia te ʼu moʼoni ʼo te Tohi-Tapu ki te hahaʼi ke malave ai kiā nātou pea ke fakagalo gataʼa, ʼe feala ke tou fakaʼaogaʼi tatatou ʼu foʼi ʼata viteo. ʼE lahi te ʼu manatu ʼe talanoa kiai tatatou ʼu foʼi ʼata viteo pea mo ina fakatuputupu tatatou falala ʼaē ki te Tohi-Tapu, ki te kautahi ʼa Sehova, pea mo te ʼu pelesepeto ʼaē ʼe nātou fakaliliu tatou ko he ʼu Kilisitiano lelei. Tou vakaʼi te ʼu ʼaluʼaga ʼaē ʼe feala ke tou fakaʼaogaʼi tatatou ʼu foʼi ʼata viteo moʼo akoʼi ia te hahaʼi. Koʼeni tona ʼu faʼifaʼitaki:
3. Koteā ʼaē ʼe feala ke koutou fakaʼaogaʼi moʼo talanoa ki hakotou ako Tohi-Tapu ʼo ʼuhiga mo te kautahi?
3 ʼI Te Minisitelio: Neʼe kua koutou palalau koa ki hakotou ako Tohi-Tapu ʼo ʼuhiga mo tatatou ʼu tēhina mo tuagaʼane ʼi te malamanei kātoa? Koutou fakahā age kiā ia te foʼi ʼata viteo Toute la communauté des frères. ʼE feala hakotou foaki age te foʼi ʼata ke ina sioʼi ʼi muʼa ʼo takotou fai tana ako peʼe koutou sisio fakatahi ʼi he tahi lakaga. Pea koutou fai palalau kiai ʼaki te ʼu fehuʼi ʼaē ʼe tuʼu ʼi Te Minisitelio ʼo Te Puleʼaga ʼo Sūnio 2002.
4. Koteā ʼaē ʼe feala ke fakaʼaogaʼi e he Fakamoʼoni tūpulaga ʼi te faleako?
4 ʼU tūpulaga, kapau ko he meʼa ʼe feala, koutou kole ki takotou tagata faiako peʼe feala ke koutou sioʼi mo takotou kalasi te foʼi ʼata viteo La fermeté des Témoins de Jéhovah face à la persécution nazie peʼe ko te foʼi ʼata Fidèles dans les épreuves—Les Témoins de Jéhovah en Union Soviétique. Koutou kole age ʼe koutou fia lagaʼi he ʼu fehuʼi, ʼo koutou fakaʼaogaʼi te ʼu fehuʼi ʼi Te Minisitelio ʼo Te Puleʼaga ʼo Sūnio 2001 peʼe ko ʼaē ʼo Fepualio 2003, ʼo koutou vakaʼi te ʼu faʼahi ʼaē ʼe fia palalau anai kiai takotou kalasi.
5. Koteā ʼaē ʼe feala ke fakaʼaogaʼi e te ʼu mātuʼa ʼi te ako faka famili?
5 ʼAki Te Famili Pea Mo Te ʼu Kaumeʼa: ʼU mātuʼa, lagi kua lalahi ake takotou fānau talu mai te ʼuluaki hā ʼo te foʼi ʼata Les jeunes sʼinterrogent—Comment me faire de vrais amis? He koʼe ʼe mole koutou toe sioʼi te foʼi ʼata ʼaia ʼi takotou tahi ako faka famili? ʼI Te Minisitelio ʼo Te Puleʼaga ʼo ʼApelili 2002, ʼe tuʼu ai te ʼu fehuʼi moʼo fai ʼaki he fai palalau fakafiafia.
6. Koteā te tahi ʼu faigamālie ʼe feala ke tou fakaʼaogaʼi ai tatatou ʼu foʼi ʼata viteo?
6 Te Tahi ʼu Faigamālie: ʼE koutou lava fakaʼaogaʼi feafeaʼi tatatou ʼu foʼi ʼata viteo e 10 tupu? ʼE feala koa hakotou fakahā he foʼi ata e tahi peʼe lua ki he tahi ʼe koutou ʼaʼahi tuʼumaʼu, moʼo tokoni kiā ia ke tuputupu ʼi te faʼahi fakalaumālie? ʼE koutou lava kole koa ke koutou fakahā he foʼi ʼata ʼi he fale taupau mahaki, pea mo he fale ʼe taupau ai te hahaʼi kua mātutuʼa? ʼE feala anai koa ʼaki he foʼi ʼata ke leleiʼia koutou e takotou ʼu famili ʼaē ʼe mole ko he kau Fakamoʼoni, mo tokotou vāhaʼa fale, pea mo takotou ʼu kaugā gāue? Ko tatatou ʼu foʼi ʼata viteo ʼe ko he ʼu meʼa gāue ʼe malave ʼaupito ki te hahaʼi, moʼo akoʼi ʼo nātou pea mo ʼaoga kiā nātou. Koutou fakaʼaogaʼi te ʼu foʼi ʼata ʼaia moʼo akoʼi te hahaʼi.