Fakaʼaogaʼi Te ʼu ʼAta Viteo Moʼo Akoʼi ʼo ʼAkotou Kau Ako

Ko te fakaʼaogaʼi ʼo he ʼu pāki peʼe ko he ʼu ʼata viteo ʼe tokoni anai kia ia ʼae ʼe ako ke mahino pea mo manatuʼi te ʼu meʼa ʼae ʼe ina ako. Neʼe feia te fakaʼaogaʼi e Sehova totatou Faiako Lahi he ʼu faʼifaʼitaki moʼo fakaha he ʼu ako maʼuhiga. (Sen 15:5; Sel 18:1-6) Pea neʼe toe feia pe mo Sesu te Faiakonaki Lahi. (Mat 18:2-6; 22:19-21) Ko te tahi meʼa gaue foʼou ʼe fua lelei kua fakaʼaogaʼi, ʼe ko te ʼu ʼata viteo. ʼE kotou fakaʼaogaʼi lelei koa te ʼu ʼata viteo moka kotou fai he ako?

Neʼe teuteuʼi ni kiʼi ʼata ʼe hogofulu ke tokoni mai ki tatatou akoʼi te kau ako ʼaki te kaupepa Te ’u Logo Lelei Mai Te ʼAtua. ʼI te mahani, ko te kupu tafito ʼo he ʼata viteo ʼe alu tahi tuʼumaʼu mo he fehuʼi ʼe tuʼu ʼi te kaupepa. Kae ko te kaupepa ʼae ʼe maʼu ʼi totatou tuʼasila ʼi te Neti, ʼe tuʼu ai mo ʼona ʼata viteo ʼe tonu ke sioʼi. Pea, ʼe toe hilifaki atu ki ai, ʼihi age ʼata ʼe maʼu ʼi te ʼu Meʼa Gaue Ki Te Faiako.

ʼE ʼi ai koa he kapite ʼi te tohi ʼe faigataʼa ki tau ako? Peʼe ʼe tau mo ia he faigataʼa? Kumi ʼi te ʼu ʼata viteo ʼo te jw.org® mo te JW Télédiffusion® he ʼata ke tokoni ki ai. ʼE lagi feala pe ke kolua vakaʼi fakatahi he kiʼi ʼata pea mo faipalalau ki ai.

ʼI te mahina fuli, ʼe feala te maʼu ʼo he ʼu ʼata viteo foʼou. Lolotoga takotou sioʼi, kotou fakakaukauʼi pe ʼe feafeaʼi anai hakotou fakaʼaogaʼi.