Te ʼu Meʼa Gāue Moʼo Akoʼi, Mo Uga Pea Mo Fakaloto Mālohiʼi
1 ʼE maʼuhiga ʼaupito te ʼu meʼa ʼaia moʼo akoʼi ki te hahaʼi te Tohi-Tapu pea mo te ʼuhiga ʼo te kau Fakamoʼoni ʼa Sehova. ʼE nātou uga te tokolahi ke nātou pipiki mālohi ki te moʼoni. ʼE nātou fakaloto mālohiʼi te tui pea mo te loto fakafetaʼi ʼa te hahaʼi ʼaē kua nātou foaki tonatou maʼuli ki te ʼAtua. Koteā te ʼu meʼa ʼaia? Ko te ʼu foʼi fime viteo ʼaē neʼe fai e te kautahi ʼa Sehova. Kua koutou sioʼi fuli koa te ʼu foʼi fime viteo ʼaia? Kua fualoa? ʼE koutou fakaʼaogaʼi koa te ʼu foʼi fime ʼaia ʼi takotou minisitelio? ʼE lava ʼaoga feafeaʼi kia koutou te ʼu meʼa gāue lelei ʼaia?
2 ʼI Te Tule Leʼo ʼo te ʼaho 1 ʼo Sūlio 1999, ko te alatike “Koutou Ako Tuʼumaʼu Te Folafola ʼa Te ʼAtua Mo Tokotou Famili,” neʼe tokoni ai ke “koutou fakatuʼutuʼu he temi ke koutou sioʼi he ʼu koga ʼo te ʼu foʼi fime viteo ʼo te Sosiete . . . ʼosi ʼaia pea ke koutou fai palalau kiai.” ʼO mulimuli ki te tokoni lelei ʼaia, ʼe tou fai palalau anai ʼi te ʼu māhina ʼaē ka haʼu ki te ʼu foʼi fime viteo takitahi ʼaia ʼi te Fono Gāue. ʼE mātou fakaloto mālohi ia nātou ʼo te kokelekasio ke nātou ʼuluaki sioʼi muʼa ʼi tonatou ʼapi te foʼi fime viteo ʼaē ka tou palalau anai kiai ʼi te Fono Gāue.
3 ʼI te māhina ʼaenī, ʼe tou kamata ʼaki te ʼuluaki foʼi fime viteo Les Témoins de Jéhovah : un nom, une organisation. Koutou sioʼi pea mo koutou fakalogo ki te ʼu tali ki te ʼu fehuʼi ʼaenī:
◼ Koteā ʼaē ʼe ʼiloa ai te kau Fakamoʼoni ʼa Sehova?
◼ Koteā te vaega Tohi-Tapu ʼaē ʼe fakatafito kiai te ʼu gāue ʼo te Petele?
◼ Koteā te paki faka Tohi-Tapu neʼe koutou sio neʼe teuteuʼi, pea neʼe paki, pea neʼe pena moʼo fakaʼaogaʼi ʼi te ʼu tohi?
◼ Koteā ʼaē neʼe koutou leleiʼia ʼi te faʼahiga faʼu ʼo tatatou ʼu tohi?
◼ Mai te taʼu 1920 ki te 1990, ko tohi e fia ʼaē neʼe tā e te Sosiete?
◼ Ko ai tāfito ʼi te hahaʼi ʼa te ʼAtua ʼaē ʼe tonu ke nātou faiga ke nātou gāue ʼi te Petele?—Taag. 20:29.
◼ Koteā te ʼu faʼahi ʼaē ʼe tonu ai ke tuku e te famili ʼo te Petele he faʼifaʼitaki lelei ki te kau Fakamoʼoni ʼa Sehova fuli?
◼ Koteā ʼaē neʼe koutou leleiʼia ʼi te gāue ʼaē ʼe fai ʼi te Petele moʼo fakaaʼu te logo lelei ki te tokolahi?
◼ ʼE totogi feafeaʼi te gāue ʼaē ʼe fakahoko ʼi te malamanei katoa?
◼ Koteā te gāue ʼaē ʼe feala ke koutou lagolago lahi kiai, pea ʼaki he manatu feafeaʼi?—Soa. 4:35; Gaue 1:8.
◼ Koteā takotou manatu ʼo ʼuhiga mo te kautahi ʼa te kau Fakamoʼoni ʼa Sehova?
◼ ʼE koutou lava fakaʼaogaʼi feafeaʼi te foʼi fime viteo ʼaia ʼi te minisitelio?
ʼI Tesepeli ʼe tou palalau anai ki te foʼi fime viteo La Bible : un récit historique exact, des prophéties dignes de foi.