Les Témoins de Jéhovah : organisés pour proclamer la bonne nouvelle
Talu mai ia taʼu e 100 tupu,ʼe fakatuʼutuʼu gāue te kau Fakamoʼoni ʼa Sehova moʼo fakamafola ia te logo lelei. ʼI te gāue fai fakamafola lahi ʼaia neʼe heʼeki fai ʼi te mālamanei kātoa, ʼe tou fakahā te logo iā lea e teau tupu, iā fenua e 230 tupu. (Mat. 24:14) Kae he koʼē ʼe ʼaoga ia te gāue ʼaia? Pea ʼe fakahoko feafeaʼi ia te gāue ʼaia ʼi te mālamanei kātoa? Ko te foʼi ʼata DVD ʼaē ko tona kupu tāfito Les Témoins de Jéhovah : organisés pour proclamer la bonne nouvelle, ʼe tali ki te ʼu fehuʼi ʼaia, heʼe fakahā lelei ai te ʼu faʼahi kehekehe ʼo tatatou gāue ʼaē ʼi te mālamanei kātoa. ʼI takotou ʼosi sioʼi ia te foʼi ʼata ʼaia, kotou tali ki te ʼu fehuʼi ʼaenī:
Neʼe feafeaʼi ia te fakatuputupu ʼo tokotou loto fakafetaʼi e te foʼi ʼata viteo ʼaia (1) ki te gāue lahi ʼaē ʼe fai e te kautahi ʼa Sehova moʼo fakamafola ia te logo lelei? (2 Tim. 4:2) (2) ki te ʼu fāmili ʼi te ʼu Petele ʼi te mālamanei kātoa? (3) ki te ako ʼaē ʼe fai maʼa te ʼu taupau pea mo te ʼu misionea? (2 Tim. 2:2) (4) ki te maʼuhiga ʼi te ʼaho fuli pē ke kamata te ʼaho ʼaki te vakaʼi ʼo te vaega Tohi-Tapu pea mo te teuteuʼi ʼo tatatou ʼu fono ʼi te vāhaʼa fuli? (Gāue 17:11) (5) ki te ʼu lelei ʼo tatatou kau ki tatatou ʼu fakatahi fakakilisitiano? (Hep. 10:24, 25) (6) ki te ʼu tapuakina ʼe kotou maʼu anai ʼi te fakatuʼu ʼo te Palatiso ʼi te kele? (Isa. 11:9) (7) ki tatatou kau takitokotahi ki te tānaki ʼo te taʼukai ʼaē ʼe lolotoga fai nei?—Soa. 4:35.
Ko te foʼi ʼata DVD ʼe ko he meʼa gāue lelei moʼo fakahā ki te hahaʼi ʼaē ʼe fia logo, ia te gāue fakamālamanei ʼaē kua fakahoko e te kau Fakamoʼoni ʼa Sehova. (8) Ko te temi fea ʼaē ʼe ʼaoga ai te fakahā ʼo te foʼi ʼata ki takotou kau ako Tohi-Tapu, ki tokotou ʼu feʼilo, pea mo ʼihi atu? (9) ʼI tanatou sioʼi te foʼi ʼata ʼaia, koteā te meʼa lelei ʼaē neʼe kotou fakatokagaʼi iā nātou ʼaia?
Kā tou metitāsio ki te ʼu gāue neʼe fakahoko e Sehova, ʼe tou toe maʼu ʼi totatou loto te ʼu palalau fakafetaʼi ʼaenī ʼa te tagata fai pesalemo: “Neʼe lahi te ʼu meʼa neʼe ke fai e koe totonu, Ê Sehova toku ʼAtua, ʼeī tau ʼu gāue fakaofoofo pea mo tau ʼu manatu ʼo ʼuhiga mo mātou; ʼe mole he tahi age ʼe tatau mo koe.” (Pes. 40:5) ʼOfa pē ke tou fakaʼaogaʼi lelei te foʼi ʼata moʼo tokoni ki ni ʼihi ke fakatuputupu tonatou loto fakafetaʼi kiā Sehova mo tana kautahi!