Kotou Haga “Fua Ke Lahi”
1 Neʼe fakatātā e Sesu ia ia ki he fuʼu vite moʼoni, ko tana Tamai ko te Tagata Gāue Vite, pea ko tana kau tisipulo ʼaē neʼe fakanofo ʼaki te laumālie ki te ʼu vaʼa ʼe fua ʼo te fuʼu vite. ʼI tana fakamatala ia te gāue ʼo te Tagata Gāue Vite fakatātā, neʼe fakahā lelei e Sesu ia te maʼuhiga ʼaē ke pipiki maʼu ki te fuʼu vite. (Soa. 15:1-4) Ko te ako ʼaē ʼe tou tāʼofi mai ai, ʼe ko he tahi ʼe felōgoi lelei mo Sehova ʼe tonu ke hagē ko he vaʼa ʼe fua ʼo te “fuʼu vite moʼoni,” ia Sesu Kilisito. ʼE tonu ke tou haga fua ke lahi ake ia “te fua ʼo te laumālie” pea mo te fua ʼo te Puleʼaga.—Kal. 5:22, 23; Mat. 24:14; 28:19, 20.
2 Te Fua ʼo Te Laumālie: ʼE feala ke tou ʼiloʼi peʼe tou tuputupu ʼi te faʼahi fakalaumālie ʼi tatatou faʼahiga fakahā ia te fua ʼo te laumālie. ʼE kotou faiga koa ke kotou maʼu te fua ʼo te laumālie ʼo te ʼAtua, ʼo kotou ako tuʼumaʼu pea mo metitāsioʼi ia te Folafola ʼa te ʼAtua? (Filp. 1:9-11) Kotou kole ia te laumālie māʼoniʼoni, ʼaē ʼe feala ke ina fakatupu iā koutou ia te ʼu kalitātē ʼe natou faka kolōliaʼi ia Sehova, pea mo tokoni atu ke kotou haga tuputupu ʼi te faʼahi fakalaumālie.—Luka 11:13; Soa. 13:35.
3 Kapau ʼe tou faiga ke tou maʼu te fua ʼo te laumālie, pea ʼe tokoni mai anai ke tou liliu ko he ʼu minisi faʼafai age. Ohagē lā, ʼe uga tātou e te ʼofa pea mo te tui ke tou toʼo hotatou temi ʼi tatatou polokalama ke tou kau tuʼumaʼu ai ki te minisitelio. Ko te ʼu kalitātē ohagē ko te tokalelei, mo te faʼa kātaki, mo te lotoʼofa, mo te agamalū, pea mo te loto lolomi ʼe tokoni mai ke tou tali lelei kiā nātou ʼaē ʼe fakafeagai mai. Ko te fiafia ʼe ina foaki mai he manatu ʼe lelei ʼi te minisitelio tatau aipē pe mole fia tali tātou e te hahaʼi.
4 Te Fua ʼo Te Puleʼaga: ʼE tou toe loto foki ke tou fakatuputupu ia te fua ʼo te Puleʼaga. Ko tona faka ʼuhiga ke tou foaki “he sākilifisio fakavikiviki, ko tona faka ʼuhiga ko te fua ʼo te ʼu laugutu ʼaē ʼe natou fagonogono ki [te] huafa [ʼo Sehova].” (Hep. 13:15) ʼE tou fakahoko te faʼahi ʼaia ʼaki tatatou faʼafai ʼo tala mālohi ia te logo lelei. ʼE kotou faiga koa ke kotou fua ke lahi ia te fua ʼo te Puleʼaga ʼaki takotou hikihiki takotou minisitelio?
5 Neʼe fakahā e Sesu ʼe kehekehe anai te lahi ʼo te ʼu fua ʼaē kā maʼu e tana ʼu tisipulo agatonu. (Mat. 13:23) Koia, ʼe mole tonu ke tou fakatatau ia tātou ki ʼihi kae ke tou foaki kiā Sehova te meʼa lelei ʼaē ʼe tou maʼu. (Kal. 6:4) Ko he sivisivi fakalelei ʼo totatou ʼu ʼaluʼaga, ʼo mulimuli ki te Folafola ʼa te ʼAtua, ʼe tokoni mai anai ke tou haga faka kolōliaʼi ia Sehova ʼo tou “fua ke lahi.”—Soa. 15:8.