“Koutou Haga Fua Ke Lahi”

“Koutou haga fua ke lahi, pea ke koutou hā ʼaki mai ko koutou ko taku ʼu tisipulo.”—Soane 15:8, MN.

1. (a) Koteā te fakatotonu neʼe fai e Sesu ki tana kau ʼapositolo ʼi tonatou ʼuhiga tisipulo? (b) Koteā te fehuʼi ʼe tonu anai ke tou fai kia tatou totonu?

NEʼE ko te po ʼi muʼa ʼo tona mate. Neʼe lahi te temi neʼe fakaʼaogaʼi e Sesu moʼo fakaloto mālohiʼi tana kau ʼapositolo ʼaki he ʼu tokoni fakahagatonu. ʼI te temi ʼaia neʼe lagi kua fakalaka te māʼupō, kae ko Sesu ʼaki te ʼofa neʼe ina haga foaki aipe te ʼu palalau fakaloto mālohi ki tona ʼu kaumeʼa. Pea ʼi tana lolotoga palalau, neʼe ina fakamanatuʼi age kia nātou te fakatotonu neʼe tonu ke nātou muliʼi ke nātou nonofo ko tana ʼu tisipulo. Neʼe ina ʼui fēnei: “Ko taku Tāmai ʼe faka kolōliaʼi ʼi te faʼahi ʼaenī: ke koutou haga fua ke lahi, pea ke koutou hā ʼaki mai ko koutou ko taku ʼu tisipulo.” (Soane 15:8, MN ) ʼE tou muliʼi koa ia ʼaho nei te fakatotonu ʼaia ʼi totatou ʼuhiga tisipulo? Koteā te faka ʼuhiga ʼaē ke tou “fua ke lahi”? Moʼo tali kiai, tou vakaʼi tana fai palalau ʼaē mo nātou ʼi te po ʼaia.

2. ʼI te po ʼi muʼa ʼo tona mate, neʼe koteā te lea fakatātā ʼaē neʼe fai e Sesu ʼo ʼuhiga mo te fua?

² Ko te tokoni ʼaē ke tou fua, ʼe ko he lea fakatātā neʼe fai e Sesu ki tana kau ʼapositolo. Neʼe ina ʼui fēnei: “Ko ʼau ia te fuʼu vite moʼoni, pea ko taku Tāmai ʼe ko te tagata gāue vite. Ko te ʼu vaʼa fuli pe ia te ʼau ʼe mole hona fua, ʼe ina toʼo ia, pea ko te ʼu vaʼa fuli pe ʼaē ʼe fua, ʼe ina fakamaʼa ia, ke toe lahi ake hona fua. ʼE kua koutou ʼosi maʼa ʼuhi ko te folafola ʼaē neʼe ʼau tala atu kia koutou. Koutou nonofo ʼo tahi mo ʼau, pea mo ʼau nofo ʼo tahi mo koutou. Ohage pe ko te vaʼa ʼaē ʼe mole feala ke ʼi ai hona fua, gata pe mokā ʼe pipiki maʼu ki te vite, pea ʼe toe feiā mo koutou, ʼe feala ke mole ʼi ai hokotou ʼu fua, mo kapau ʼe mole koutou nonofo ʼo tahi mo ʼau. Ko ʼau ia te fuʼu vite, ko koutou ia te ʼu vaʼa. . . . Ko taku Tāmai ʼe faka kolōliaʼi ʼi te faʼahi ʼaenī: ke koutou haga fua ke lahi, pea ke koutou hā ʼaki mai ko koutou ko taku ʼu tisipulo. Ohage ko te ʼofa ʼa te Tāmai kia te ʼau pea mo ʼau ʼofa kia koutou, koutou nonofo ʼi toku ʼofa. Kapau ʼe koutou taupau taku ʼu fakatotonu, pea ʼe koutou nonofo anai ʼi toku ʼofa.”—Soane 15:1-10, MN.

3. Koteā ʼaē ʼe tonu ke fai e te kau tisipulo ʼa Kilisito ke feala ai hanatou fua?

³ ʼI te lea fakatātā ʼaia ko Sehova ʼe ko te Tagata Gāue Vite, ko Sesu ʼe ko te fuʼu vite, pea ko te kau ʼapositolo ʼaē neʼe palalau kiai ʼe ko te ʼu vaʼa. ʼE fua anai te kau ʼapositolo, mo kapau ʼe nātou faiga ke nātou “nonofo ʼo tahi” mo Sesu. Pea neʼe fakahā leva e Sesu ki tana kau ʼapositolo peʼe feafeaʼi anai tanatou nonofo ʼi te logo tahi maʼuhiga ʼaia: “Kapau ʼe koutou taupau taku ʼu fakatotonu, pea ʼe koutou nonofo anai ʼi toku ʼofa.” Ki muli age, ko te ʼapositolo ko Soane neʼe ina tohi te ʼu palalau feiā ki tona ʼu kaugā fagona Kilisitiano: “Ko ia ʼaē ʼe ina tokagaʼi te ʼu fakatotonu [ʼa Kilisito] ʼe nofo ʼo tahi mo ia.”a (1 Soane 2:24; 3:24, MN ) Koia, ko tana ʼu tisipulo ʼi tanatou taupau te ʼu fakatotonu ʼa Kilisito, ʼe nātou nonofo ʼo tahi mo ia, pea ʼaki te logo tahi ʼaia, ʼe feala ai ke nātou fua. Koteā te fua ʼaia ʼe tonu ke tou fakahā?

Te ʼu Fealagia Moʼo Tuputupu

4. Koteā te ako ʼe tou lava maʼu ʼi te “toʼo” e Sehova te ʼu vaʼa fuli ʼaē ʼe mole fua?

⁴ ʼI te lea fakatātā ʼo te fuʼu vite, ʼe “toʼo” peʼe hele e Sehova he vaʼa mokā ʼe mole fua. Koteā tona faka ʼuhiga kia tatou? ʼE fakahā mai ko te kau tisipulo fuli ʼe tonu ke nātou fua, pea ʼe nātou lava fai fuli te faʼahi ʼaia tatau aipe pe koteā tonatou ʼu ʼaluʼaga peʼe ko tonatou ʼu tuʼakoi. ʼE mahino ia, ʼe mole ʼalutahi anai mo te ʼofa ʼo Sehova hana ‘toʼo’ he tisipulo ʼa Kilisito ʼuhi pe he neʼe mole ina lava fai he meʼa ʼe faigataʼa fau.—Pesalemo 103:14; Kolose 3:23; 1 Soane 5:3.

5. (a) ʼE fakahā feafeaʼi mai e te lea fakatātā ʼa Sesu peʼe feafeaʼi hatatou lava fua ke lahi? (b) Koteā te ʼu faʼahiga fua e lua ʼaē ka tou vakaʼi?

⁵ Ko te lea fakatātā ʼa Sesu ʼo ʼuhiga mo te fuʼu vite, ʼe toe ʼasi mai ai ʼaki pe totatou ʼu fealagia ʼi totatou ʼuhiga tisipulo, ʼe tonu ke tou faiga ke tou tuputupu ʼi tatatou ʼu gāue. Koutou fakatokagaʼi te ʼui ʼa Sesu ʼo ʼuhiga mo te ʼu vaʼa ʼaia: “Ko te ʼu vaʼa fuli pe ia te ʼau ʼe mole hona fua, ʼe ina toʼo ia, pea ko te ʼu vaʼa fuli pe ʼaē ʼe fua, ʼe ina fakamaʼa ia, ke toe lahi ake hona fua.” (Soane 15:2, MN ) ʼI te fakaʼosi ʼo te lea fakatātā, neʼe fakaloto mālohiʼi e Sesu tana ʼu tisipulo ke nātou fua “ke lahi.” (Vaega 8) Koteā tona faka ʼuhiga? ʼI totatou ʼuhiga tisipulo, ʼe mole tonu anai ke tou fakafīfīmālie. (Apokalipesi 3:14, 15, 19) Kae ʼe tonu ke tou kumi te ʼu faʼahi ʼaē ke tou tuputupu ai. Koteā anai te faʼahiga fua ʼe tonu ke tou faigaʼi ke tou fakalahi ʼaupito? Ko faʼahiga fua e lua (1) “ko te fua ʼo te laumālie” pea (2) ko te fua ʼo te Puleʼaga.—Kalate 5:22, 23, MN; Mateo 24:14.

Te Fua ʼo Te ʼu Kalitate Faka Kilisitiano

6. Neʼe faka maʼuhigaʼi feafeaʼi e Sesu Kilisito ia te maʼuhiga ʼo te ʼuluaki kalitate ʼo te fua ʼo te laumālie?

⁶ ʼUluaki fua ʼi te lisi ʼo “te fua ʼo te laumālie” ʼe ko te ʼofa. Ko te laumālie maʼoniʼoni ʼo te ʼAtua ʼe ina fakatupu te ʼofa ʼi te kau Kilisitiano, heʼe nātou fakalogo ki te fakatotonu ʼaē neʼe foaki e Sesu ʼi muʼa ʼo tana talanoa ki te lea fakatātā ʼo ʼuhiga mo te fuʼu vite ʼaē ʼe fua. Neʼe ina ʼui fēnei ki tana kau ʼapositolo: “ ʼE ʼau foaki atu kia koutou te fakatotonu foʼou, ke koutou feʼofaʼofani.” (Soane 13:34, MN ) ʼE mahino ia, ʼi tanatou fai palalau ʼi te po fakamuli ʼaia ʼo tona maʼuli ʼi te kele, neʼe fakamanatuʼi liuliuga age e Sesu ki te kau ʼapositolo te maʼuhiga ʼaē ke nātou fefakahāʼaki ia te ʼofa.—Soane 14:15, 21, 23, 24; 15:12, 13, 17.

7. Neʼe fakahā feafeaʼi e te ʼapositolo ko Petelo ko te fua ʼaē ke fakatuputupu ʼe pipiki ki takita fakahā ʼo te ʼu kalitate ohage ko Kilisito?

⁷ Ko Petelo ʼaē neʼe nofo ʼi ai ʼi te po ʼaia, neʼe mahino kia ia ʼe tonu ki te kau tisipulo moʼoni ʼa Kilisito ke nātou fakahā ia te ʼofa ohage ko Kilisito pea mo te ʼu kalitate ʼaē ʼe hoa mai kiai. ʼI te ʼu taʼu ki muli age, neʼe fakaloto mālohiʼi e Petelo te kau Kilisitiano ke nātou fakatuputupu te ʼu kalitate ohage ko te loto lolomi, mo te ʼofa fakatautehina, pea mo te ʼofa. Neʼe ina toe ʼui ko te fai ʼo te ʼu meʼa ʼaia ʼe ina tāʼofi anai tatou ke mole tou “liliu ʼo nonofo noa peʼe heʼe fua.” (2 Petelo 1:5-8, MN ) Tatau aipe pe koteā totatou ʼu ʼaluʼaga, ʼe tou lava gāueʼi te fua ʼo te laumālie. Koia, ʼofa pe ke tou hage ko Kilisito, ʼo tou fakahā ke lahi age te ʼofa, te agalelei, te agamālū, pea mo te tahi age ʼu kalitate heʼe “ki te taʼi ʼu meʼa ʼaia ʼe mole he lao,” peʼe ko he tuʼakoi. (Kalate 5:23, MN ) ʼIo, tou faiga “ke toe lahi ake hona fua.”

Tou Fakatuputupu Te ʼu Fua ʼo Te Puleʼaga

8. (a) Koteā te pikipikiga ʼo te fua ʼo te laumālie pea mo te fua ʼo te Puleʼaga? (b) Koteā te fehuʼi ʼe tonu ke tou tali kiai?

⁸ Ko te ʼu fuaʼi ʼakau lanu kehekehe pea mo huhuʼa ʼe nātou hikihiki te lelei ʼo he fuʼu ʼakau. Kae ko te lelei ʼo te taʼi ʼu fua ʼaia ʼe mole gata aipe. ʼE toe maʼuhiga te ʼu fuaʼi ʼakau koteʼuhi ʼaki tonatou ʼu tegaʼi ʼakau ʼe feala ke toe hoko atu te tuputupu ʼo te fuʼu ʼakau. ʼE toe feiā pe mo te fua ʼo te laumālie, ʼe mole gata pe ʼi tanatou fakamataleleiʼi ʼaē ia totatou ʼuhigaʼi tagata Kilisitiano. Ko te ʼu kalitate ohage ko te ʼofa pea mo te tui, ʼe nā toe uga foki tatou ke tou faka mafola te logo ʼo te Puleʼaga ʼaē ʼe tou maʼu ʼi te Folafola ʼa te ʼAtua. Koutou fakatokagaʼi pe neʼe faka maʼuhigaʼi feafeaʼi e te ʼapositolo ko Paulo ia te ʼu meʼa maʼuhiga ʼaia e lua. ʼE ina ʼui fēnei: “Pea mo matou, e matou tui [ko te tahi koga ʼo te fua ʼo te laumālie] pea ko te tupuaga aia o tamatou akonaki.” (2 Kolonito 4:13) Ki te faʼahi ʼaia, ʼe toe ʼui fēnei e Paulo, ʼe “tou momoli . . . he sakilifisio o te fakavikiviki ki te Atua, ko te fua aia o te u laugutu.”—ko te lua fua ʼaia ʼe tonu ke tou maʼuliʼi. (Hepeleo 13:15) ʼE ʼi ai koa he ʼu faʼahi ʼi totatou maʼuli ke tou tuputupu ai, ke tou “fua ke lahi,” ʼi totatou ʼuhiga kau faka mafola ʼo te Puleʼaga?

9. Ko te fakatuputupu ʼo he ʼu fua ʼe ko te fai koa ʼo ni ʼu tisipulo? Koutou fakamahino.

⁹ Moʼo maʼu he tali totonu kiai, ʼe tonu muʼa ke tou mahino pe koteā te fua ʼo te Puleʼaga. ʼE tonu koa te ʼui ʼaē ko te fakatuputupu ʼo te ʼu fua ʼe ko te fai ʼo ni ʼu tisipulo? (Mateo 28:19) Ko te fua ʼaē ka tou ʼuluaki maʼu, ʼe faka ʼuhiga koa ki te hahaʼi ʼaē neʼe tou tokoniʼi ke liliu ko ni ʼu atolasio ʼa Sehova kua papitema? Kailoa. Kanapaula neʼe koia ʼaia, pea ʼe ko he meʼa fakaloto vaivai ʼaupito anai ki te kau Fakamoʼoni ʼofaina fuli ʼaē neʼe nātou faka mafola agatonu te logo ʼo te Puleʼaga lolotoga ni ʼu taʼu ʼi te ʼu telituale ʼaē ʼe mole faʼa tali lelei e te hahaʼi. Pea kanapaula ko te fua ʼo te Puleʼaga neʼe fakatā pe ki te kau tisipulo foʼou, ko te kau Fakamoʼoni ʼaē neʼe gāue kinakina ʼe nātou hage anai ko te ʼu vaʼa ʼaē ʼe mole fua ʼi te lea fakatātā ʼa Sesu! ʼE mahino ia ʼe mole feiā. Kae koteā tāfito te fua ʼo te Puleʼaga ʼo totatou minisitelio?

Tou Faka Mafola Fakalelei Te ʼu Pulapula ʼo Te Puleʼaga

10. ʼE hā feafeaʼi ʼi te lea fakatātā ʼa Sesu ʼo te tagata to pulapula pea mo te ʼu faʼahiga kele kehekehe, ko te fua ʼo te Puleʼaga ʼe ko he pulapula foʼou kae ʼe mole ko he tisipulo foʼou?

¹⁰ ʼE tou maʼu te tali kiai ʼi te lea fakatātā ʼa Sesu ʼo te tagata tūtū pulapula pea mo te ʼu faʼahiga kele kehekehe—ʼe ko he tali fakaloto mālohi maʼa nātou ʼaē ʼe faka mafola ʼi ni ʼu telituale ʼe mole tali lelei ai te logo. Neʼe ʼui e Sesu ko te pulapula ʼe ko te logo ʼo te Puleʼaga ʼaē ʼe tou maʼu ʼi te Folafola ʼa te ʼAtua, pea ko te kele ʼe ina fakatātā ia te loto ʼo te tagata. Ko ʼihi pulapula “neʼe maluku ki te kele lelei, pea [ʼe nātou] homohomo ake.” (Luka 8:8, MN ) Koteā te ʼu fua ʼaia? Ka homo ake he kauʼi fulumeto pea mo momoho, ʼe fua, pea ko tona ʼu fua ʼe mole ko he ʼu kauʼi fulumeto, kae ko te tahi ʼu pulapula foʼou. ʼO toe feiā mo he Kilisitiano, ʼe fua, kae mole ko he ʼu tisipulo foʼou, kae ko te pulapula foʼou ia ʼo te Puleʼaga.

11. ʼE tou lava fakamahino feafeaʼi te fua ʼo te Puleʼaga?

¹¹ Koia, ʼi te ʼaluʼaga ʼaia, ko te fua ʼe mole ko he tisipulo foʼou peʼe ko he ʼu kalitate lelei faka Kilisitiano. ʼUhi ko te pulapula ʼaē neʼe to ʼe ko te folafola ʼo te Puleʼaga, ʼe mahino ia ko te fua ʼo te Puleʼaga ʼe ko te ʼu tuʼuga pulapula ʼaē neʼe to. Ko te fakatuputupu ʼo te fua ʼi te temi ʼaia ʼe ko te faka mafola ʼo te Puleʼaga. (Mateo 24:14) ʼE feala koa logola totatou ʼu fealagia ke tou fakatuputupu te fua ʼo te Puleʼaga ʼaki te faka mafola ʼo te logo lelei ʼo te Puleʼaga? Ei ʼe feala! ʼE fakamahino e Sesu ʼi te lea fakatātā pe ʼaia pe koʼe ʼe tou lava fai fuli te faʼahi ʼaia.

Tou Foaki Te Meʼa ʼAē ʼe Lelei Moʼo Faka Kolōliaʼi Te ʼAtua

12. ʼE feala koa ki te kau Kilisitiano fuli ke nātou fakatuputupu te ʼu fua ʼo te Puleʼaga? Koutou fakamahino.

¹² “Ko ia ʼaē neʼe tūtū ki te kele lelei,” neʼe ʼui e Sesu, “ ʼe fua ia ʼo teau te tahi, pea onogofulu te tahi, pea tolugofulu te tahi.” (Mateo 13:23, MN ) Ko te fulumeto ʼaē neʼe to ʼi he gāueʼaga ʼe fakalogo tana tuputupu ki te ʼu ʼaluʼaga. ʼO feiā pe mo tatatou tala te logo lelei, ʼe fakalogo pe ki totatou ʼu ʼaluʼaga, pea neʼe fakahā e Sesu tana mahino ki te faʼahi ʼaia. Ko ʼihi ʼe lagi lahi tonatou ʼu fealagia; ko ʼihi ʼe mole nātou mahahaki pea ʼe nātou mālolohi. Koia, ko te meʼa ʼaē ʼe tou lava fai peʼe lahi age peʼe veliveli age ʼi niʼihi, kae ʼe fiafia aipe Sehova mo kapau ʼe tou fai mo totatou loto katoa. (Kalate 6:4) Tatau aipe peʼe mole lahi tatatou kau ki te gāue fai faka mafola heʼe kua tou matutuʼa peʼe tou mahahaki, kae ko tatatou Tāmai manavaʼofa ʼe sio mai kia tatou ohage ko he tahi ʼe “haga fua ke lahi.” Koteā tona tupuʼaga? Koteʼuhi ʼe tou foaki age kia te ia ‘totatou ʼu fealagia fuli’—ʼaē ko te tauhi ʼe fai mo he loto katoa.b—Maleko 12:43, 44; Luka 10:27.

13. (a) He koʼe ʼe tou “ ʼolo” ʼo fakatupu he ʼu fua ʼo te Puleʼaga? (b) Koteā anai ka tokoni mai ke tou haga fakatupu he ʼu fua ʼi te ʼu telituale ʼaē ʼe mole loko fia logo ai te hahaʼi? (Vakaʼi mo te talanoa ʼi te pasina 21.)

¹³ Tatau aipe pe koteā ʼaē ʼe tou lava fai moʼo fakatuputupu te fua ʼo te Puleʼaga, kae ʼe tou “ ʼolo [anai] pea mo [tou] haga fakatupu he fua” mokā ʼe tou manatuʼi pe koʼe ʼe tou fai te faʼahi ʼaia. (Soane 15:16, MN ) Neʼe fakamahino e Sesu te tupuʼaga tāfito ʼo takita fai te faʼahi ‘aia: “Ko taku Tāmai ʼe faka kolōliaʼi ʼi te faʼahi ʼaenī: ke koutou haga fua ke lahi.” (Soane 15:8, MN ) Ei, ko tatatou gāue fai faka mafola ʼe ina tāpuhā te huafa ʼo Sehova ʼi te malamanei katoa. (Pesalemo 109:30) Ko Honor, ko he Fakamoʼoni agatonu e taʼu 75, ʼe ina ʼui fēnei: “Māʼiape la mo te ʼu telituale ʼaē ʼe mole lahi ai te fia logo, ʼe ko he pilivilesio kia ʼau taku fakafofoga ia te Māʼoluga.” ʼI te temi ʼaē neʼe fehuʼi ai kia Claudio, ko te Fakamoʼoni faʼafai talu mai te taʼu 1974, pe koʼe ʼe kei fai faka mafola, logola ko te hahaʼi ʼo tona telituale ʼe mole nātou fia logo, neʼe ina lau mai te koga tohi ʼo Soane 4:34, ʼaē ʼe tou lau ai te ʼu palalau ʼaenī ʼa Sesu: “Ko taku meakai e ko taku fai te finegalo o ia ae nee ina fekaui [mai] au pea mo au fakakatoa tana gaue.” Neʼe toe ʼui fēnei e Claudio: “Ohage pe ko Sesu, ʼi toku ʼuhiga kaugā faka mafola ʼo te Puleʼaga ʼe ʼau fia fakaʼosi te gāue ʼaē neʼe ʼau kamata fai.” (Soane 17:4) ʼE feiā te manatu ʼa te kau Fakamoʼoni ʼa Sehova ʼo te malamanei.—Vakaʼi te talanoa “E Feafeaʼi Takita ‘Fakatupu Te Fua ʼAki Te Loto Faʼa Kātaki,’ ” ʼi te pasina 21.

Tou Faka Mafola Pea Mo Tou Fai He ʼu Ako

14. (a) Koteā te ʼu gāue e lua neʼe fai e Soane Patita pea mo Sesu? (b) ʼE koutou fakamatalatala feafeaʼi anai te gāue ʼa te kau Kilisitiano ia ʼaho nei?

¹⁴ ʼE talanoa te ʼu Evaselio ki te ʼuluaki tagata fai faka mafola ʼo te Puleʼaga ko Soane Patita. (Mateo 3:1, 2; Luka 3:18) Ko tana ʼuluaki fakatuʼutuʼu “ke fakamooni,” pea neʼe ina fai te faʼahi ʼaia ʼaki te tui mālohi pea mo te falala “ke tui te tagata fuape kia te ia.” (Soane 1:6, 7) ʼIo, ko ʼihi ia nātou ʼaē neʼe fai faka mafola ki ai Soane neʼe nātou liliu ko te ʼu tisipulo ʼa Kilisito. (Soane 1:35-37) Koia, ko Soane neʼe ko he tagata fai faka mafola pea neʼe ko he tahi neʼe ina fai te ʼu tisipulo. Mo Sesu foki neʼe ko he tagata fai faka mafola pea neʼe ko he tagata faiako. (Mateo 4:23; 11:1) Koia ʼaē ʼe mole tou punamaʼuli ai, neʼe fakatotonu e Sesu ke faka mafola te logo ʼo te Puleʼaga pea ke tou tokoni ki te hahaʼi takitokotahi ʼaē neʼe nātou tali te logo ke nātou liliu ko ni ʼu tisipulo. (Mateo 28:19, 20) Koia ko tatatou gāue ia ʼaho nei ʼe ko te fai faka mafola pea mo te fai ʼo ni ʼu ako.

15. Koteā ʼaē ʼe tatau ai te ʼuluaki sēkulō pea mo te temi nei ʼo ʼuhiga mo te tali ʼaē e te hahaʼi tatatou gāue fai faka mafola?

¹⁵ Ko nātou ʼaē neʼe logo ʼi te ʼuluaki sēkulō ki te faka mafola pea mo te faiako ʼa Paulo “nee tui ihi ki te u mea [ʼaē] nee ina fakaha. Ki ihiʼage nee mole natou tui.” (Gaue 28:24) Ia ʼaho nei ʼe toe feiā pe. Kae ʼe lahi te ʼu pulapula ʼo te Puleʼaga ʼe maluku ki te ʼu kele ʼe mole lelei. Kae ko ʼihi pulapula ohage pe ko tona fakakikite e Sesu ʼe kei maluku pe ki te kele lelei, pea ʼe nātou aka, pea mo hohomo ake. ʼI tona fakahagatonu, ʼi te malamanei ʼi te vāhaʼa fuli ʼo te taʼu, ʼe ko te toko 5 000 tupu hahaʼi ʼe nātou liliu ko te ʼu tisipulo moʼoni ʼa Kilisito! Ko te kau tisipulo foʼou ʼaia ʼe nātou “tui . . . ki te u mea [ʼaē] nee . . . fakaha,” logola ko te tokolahi ʼo te hahaʼi ʼe mole nātou fia logo. Koteā ʼaē neʼe tokoni ke nātou fia logo ki te logo ʼo te Puleʼaga? ʼI te agamāhani ʼe malave kia nātou ia te tokaga moʼoni ʼaē neʼe fakahā age e te kau Fakamoʼoni—tanatou ʼu ʼaʼahi liuliuga. (1 Kolonito 3:6) Tou vakaʼi te ʼu faʼifaʼitaki e lua.

ʼE Malave Ki Te Hahaʼi Tatatou Tokagaʼi Moʼoni Ia Nātou

16, 17. He koʼe ʼe maʼuhiga ke tou tokakaga moʼoni ki te hahaʼi ʼaē ʼe felāveʼi mo tatou ʼi te minisitelio?

¹⁶ Ko Karolien, ko he Fakamoʼoni tūpulaga ʼi Pelesike, neʼe ina ʼaʼahi te finematuʼa neʼe mole ina tali te logo ʼo te Puleʼaga. Neʼe fia tokoni ia Karolien pea mo tona kaugā hoa ki te finematuʼa, koteʼuhi neʼe haʼihaʼi tona nima kae neʼe mole ina tali tanā tokoni. Hili kiai ʼaho e lua, pea toe liliu te ʼu Fakamoʼoni ʼaia e lua ki te ʼapi ʼo te finematuʼa pea neʼe nā fakalavelave age pe kua feafeaʼi tona nima. Neʼe ʼui fēnei e Karolien: “Neʼe malave kia ia te faʼahi ʼaia. Neʼe punamaʼuli ʼi tana sio ʼaē neʼe ma tokaga moʼoni kia ia. Neʼe ina fakaafe māua ki tona ʼapi, pea neʼe kamata ai tana ako Tohi-Tapu.”

¹⁷ Ko Sandi, ko he Fakamoʼoni ʼi Amelika, neʼe ina toe fakahā mo ia ʼe tokaga moʼoni ki te hahaʼi ʼaē ʼe faka mafola ki ai. Neʼe ina kumi ʼi te sulunale te ʼu kiʼi toe ʼaē neʼe hoki tupu, ʼosi ʼaia pea ʼalu ʼo ʼaʼahi te ʼu mātuʼa ʼo te ʼu kiʼi toe ʼaia mo Te Tohi ʼo Te ʼu Hisitolia Faka Tohi-Tapu.c ʼI te agamāhani ʼe nofo pe te fafine ʼi fale heʼe fiafia ʼi te fakahāhā ʼo tana kiʼi tamasiʼi kia nātou ʼaē ʼe ʼōmai ʼo fakasiosio mai, pea ʼe tautau hoko ai te fai palalau. ʼE ʼui fēnei e Sandi: “ ʼE ʼau fakahā ki te ʼu mātuʼa kapau ʼe nātou lautohi fakatahi mo tanatou ʼu kiʼi tamasiʼi, ʼe nātou lava maʼu ai he ʼu felogoi lelei. ʼOsi ʼaia, pea ʼau palalau ki te faigataʼa ʼaē ʼo te akoʼi ʼo he tamasiʼi ʼi te temi nei.” Mole heʼeki faʼa fualoa, neʼe fua lelei te taʼi ʼaʼahi ʼaia, heʼe ʼi ai te faʼe mo tana ʼu tamaliki e toko ono kua nātou kamata kaugana kia Sehova. ʼE feala ke tou maʼu te ʼu fua fakafiafia feiā ʼi totatou minisitelio mo kapau ʼe tou fai he ʼu fakatuʼutuʼu pea mo tokaga moʼoni kia nātou.

18. (a) He koʼe ʼe feala kia tatou fuli ke tou mulimuli ki te fakatotonu ʼaē ke ‘tou fua ke lahi age’? (b) ʼI totatou ʼuhiga tisipulo, koteā te ʼu fakatotonu e tolu ʼi te Evaselio ʼa Soane ʼe tou fia muliʼi?

¹⁸ ʼE ko he meʼa fakaloto mālohi hakita ʼiloʼi ko te fakatotonu ʼaē ke tou “haga fua ke lahi” ʼe ko he faʼahi ʼe tou lavaʼi fuli! Peʼe tou tūpulaga peʼe tou matutuʼa, peʼe tou maʼuʼuli haohaoa peʼe tou mahahaki, peʼe tou faka mafola ki he telituale ʼe fia logo ai te hahaʼi peʼe kailoa, kae ko tatou fuli ʼe tou lava fakatupu he ʼu fua ke lahi. ʼO feafeaʼi? ʼO fakatuputupu te fua ʼo te laumālie pea mo tala te logo ʼo te Puleʼaga ʼo te ʼAtua ʼaki totatou loto katoa. Pea tou faiga ke ‘tou nofo ʼi te folafola ʼa Sesu’ pea mo tou ‘femaʼuʼaki te ʼofa ia tatou.’ Ei, ʼi totatou ʼuhiga tisipulo ʼe tou fakahā anai ko tatou ko te ʼu “tisipulo moʼoni [ʼa Kilisito]” mokā ʼe tou muliʼi te ʼu fakatotonu maʼuhiga ʼaia e tolu ʼaē neʼe talanoa kiai te Evaselio ʼa Soane.—Soane 8:31; 13:35, MN.

[Kiʼi nota]

Te ʼu Fehuʼi Fakamanatu

• Koteā te fua ʼaē ʼe tonu ke tou fakatuputupu ke lahi age?

• He koʼe ʼe tou lavaʼi fuli te fakatuʼutuʼu ʼaē ke tou “fua ke lahi”?

• Koteā te ʼu fakatotonu maʼuhiga e tolu ʼi totatou ʼuhiga tisipulo neʼe talanoa kiai te Evaselio ʼa Soane?

[Talanoa ʼo te pasina 21]

E FEAFEAʼI TAKITA “FAKATUPU TE FUA ʼAKI TE LOTO FAʼA KĀTAKI”

KOTEĀ ʼaē ʼe tokoni atu kia koutou ke koutou agatonu ʼo haga faka mafola te logo ʼo te Puleʼaga ʼi te ʼu telituale ʼaē ʼe mole lahi ai te fia logo ʼa te hahaʼi? Koʼeni te ʼu tali ʼe ʼaoga ki te fehuʼi ʼaia.

“ ʼE ʼau loto falala pea mo faʼa kātaki ʼi taku ʼiloʼi ʼaē ʼe tou maʼu katoa te tokoni ʼa Sesu, logola te aga ʼa te hahaʼi ʼo te telituale.”—Ko Harry ko tona taʼu 72; neʼe papitema ʼi te taʼu 1946.

“Ko te koga tohi ʼo 2 Kolonito 2:17 ʼe ina fakaloto mālohiʼi tuʼumaʼu ʼau. ʼE ina ʼui mai ʼe tou kau ki te minisitelio kae ‘sio mai te ʼAtua pea mo Kilisito.’ Ka ʼau kau ki te minisitelio, ʼe ʼau fiafia ʼi taku fai faka mafola mo toku ʼu kaumeʼa lelei.”—Ko Claudio ko tona taʼu 43; neʼe papitema ʼi te taʼu 1974.

“ ʼI tona fakahagatonu, ko te fai faka mafola ʼe ko he meʼa faigataʼa kia ʼau. Kae ʼe ʼau ʼiloʼi te moʼoni ʼo te ʼu folafola ʼaē ia Pesalemo 18:29: ‘ ʼAki toku ʼAtua ʼe feala haku hake ʼi he kaupā.’ ”—Ko Gerard ko tona taʼu 79; neʼe papitema ʼi te taʼu 1955.

“Ka feala pe ke ʼau lau he vaega e tahi ʼi te minisitelio, ʼe ʼau fiafia he neʼe malave ki te loto ʼo he tahi te manatu ʼa te Tohi-Tapu.”—Ko Eleanor ko tona taʼu 26; neʼe papitema ʼi te taʼu 1989.

“ ʼE ʼau faigaʼi te ʼu faʼahiga ʼuluaki palalau kehekehe. ʼE mahino ia ʼi toku temi maʼuli, ʼe mole ʼau fakaʼaogaʼi anai te ʼu ʼuluaki palalau fuli heʼe lahi fau.”—Ko Paul ko tona taʼu 79; neʼe papitema ʼi te taʼu 1940.

“ ʼE mole ʼau ʼita mokā mole tali e te hahaʼi taku fai faka mafola. ʼE ʼau faigaʼi tuʼumaʼu ke ʼau agalelei ʼo fai palalau mo te hahaʼi pea mo fakalogo ki tanatou ʼu manatu.”—Ko Daniel ko tona taʼu 75; neʼe papitema ʼi te taʼu 1946.

“Neʼe ʼau felāveʼi mo te ʼu tisipulo foʼou neʼe papitema, neʼe nātou ʼui mai ko taku fai faka mafola neʼe tokoni ki tanatou liliu ʼaē ko te ʼu Fakamoʼoni. Neʼe mole ʼau ʼiloʼi, ko te tahi neʼe ʼau tokoni ki ai, ki muli age neʼe ako mo nātou ʼaia te Tohi-Tapu pea mo tokoni ke nātou tuputupu. ʼE ʼau fiafia ʼi taku ʼiloʼi ʼe tou kaugā gāue fakatahi.”—Ko Joan ko tona taʼu 66; neʼe papitema ʼi te taʼu 1954.

Koteā te ʼu tokoni ʼaē ʼe ʼaoga atu ke koutou “fakatupu te fua ʼaki te loto faʼa kātaki”?—Luka 8:15, MN.

[Paki ʼo te pasina 20]

ʼI tatatou fakahā te fua ʼo te laumālie pea mo faka mafola te logo ʼo te Puleʼaga, ʼe tou fakatuputupu te fua ke lahi

[Paki ʼo te pasina 23]

Neʼe koteā te faka ʼuhiga ʼo te ʼui ʼaē e Sesu ki tana kau ʼapositolo: “Koutou haga fua ke lahi”?