Sio Ki Te ʼu Fua ʼo Tau Gāue Kinakina
1. Koteā ʼaē ʼe feala ke ina pulihi ia tatatou faʼafai ʼi te minisitelio?
1 Neʼe fakatupu ia te tagata ke sio ki te ʼu fua ʼo tana gāue kinakina. (Ekl. 2:24) Kae kapau ʼe mole tou fia sisio ki te ʼu fua lelei ʼo tatatou minisitelio, ʼe feala ke tou lotovaivai pea mo puli ai tatatou faʼafai. Koteā ʼaē ʼe feala ke tokoni mai ke tou taupau he faʼahiga manatu ʼe lelei?
2. He koʼē ʼe tonu ke tou maʼu he ʼu manatu fakapotopoto ʼo ʼuhiga mo tatatou minisitelio?
2 Kotou Maʼu He ʼu Manatu Fakapotopoto: Kotou manatuʼi neʼe fua lelei ia te minisitelio ʼa Sesu, tatau aipē pe neʼe mole hahaʼi ia nātou ʼaē neʼe natou tali. (Soa. 17:4) ʼI tana lea fakata ʼo ʼuhiga mo te tagata nunusi pulapula, neʼe fakakikite ai e Sesu ko te tokolahi ʼe mole natou tali anai ia te logo ʼo te Puleʼaga. (Mat. 13:3-8, 18-22) Kae, ʼaki ʼatatou faiga fakamālotoloto ʼe lahi anai te ʼu gāue ʼaē kā tou fakahoko anai.
3. ʼE feafeaʼi anai hatatou fakafua ia tatatou minisitelio tatau aipē peʼe mole tali lelei e te hahaʼi?
3 ʼE Feafeaʼi Anai Hatatou Fakafua Ke Lahi?: Neʼe ʼui e Sesu ʼi tana lea fakatā, ʼe tonu anai ke fakafua e nātou ʼaē ʼe natou tali ia te logo. (Mat. 13:23) ʼI te hili ʼo te homo ake ʼo te kauʼi fulumeto pea kā mātutuʼa, ʼe mole tupu mai ai he tahi age kauʼi fulumeto, kae ʼe maʼu ai te tahi pulapula ke nunusi. Koia, ko te ʼu fua ʼo te gāue ʼa te kau Kilisitiano, ʼe mole fakaʼuhiga pē ki te maʼu ʼo he ʼu tisipulo foʼou, kae ʼe toe fakaʼuhiga ki te tuputupu ʼo te pulapula ʼo te Puleʼaga, ʼaē ko tatatou palalau maʼa te Puleʼaga. ʼE feala ke tou maʼu ia te fiafia ʼi te ʼu fua lelei ʼo tatatou gāue, tatau aipē peʼe mole tali lelei e te hahaʼi. ʼE tou lagolago ki te fakatapuhā ʼo te huafa ʼo Sehova. (Esa. 43:10-12; Mat. 6:9) ʼE tou fiafia ʼi tatatou maʼu ia te pilivilēsio ʼaē ke tou kaugā gāue mo te ʼAtua. (1 Ko. 3:9) Pea ʼe ko te taʼi “fua [ʼaia] o te u laugutu” ʼaē ʼe fakafiafia ki te loto ʼo Sehova.—Hep. 13:15, 16.
4. Koteā te ʼu fua lelei ʼe feala ke tou maʼu ʼi te minisitelio kae mole tou ʼiloʼi?
4 Pea tahi, ʼe feala ke mole tou sisio ki te ʼu fua ʼo tatatou gāue kinakina. Neʼe lagi ʼi ai ʼihi neʼe natou logo ki te fai fakamafola ʼa Sesu kae neʼe hoki natou liliu pē ko ʼana tisipulo ʼi te hili ʼo tana minisitelio ʼi te kele. ʼE toe fēia aipē mo te pulapula ʼo te Puleʼaga ʼaē ʼe tou nunusi, ʼe hoki tauaka pea mo tuputupu pē ki muli age ʼi te loto ʼo he tahi pea ʼe feala ke hū mai ki te moʼoni kae ʼe mole tou ʼiloʼi. ʼI tona fakahagatonu, ʼe fakahoko e tatatou minisitelio ia he toe fakalotofīmālie ki te hahaʼi. Koia, tou haga “fua o lahi” pea mo tou fakahā ko tātou ko te ʼu tisipulo ʼa Sesu.—Soa. 15:8.