Ko He ʼu Fetogi Lelei ʼo ʼUhiga Mo Te Tule Leʼo!
1 ʼI te kamata ʼo te taʼu ʼaenī, neʼe tala ki te ʼu kōkelekāsio te logo fakafiafia: ʼO kamata ʼi te māhina ʼo Sānualio ʼo te taʼu 2008, ʼe tā anai te ʼu nusipepa kehekehe e lua ʼo Te Tule Leʼo, ko te nusipepa ʼe tufa anai ki te hahaʼi pea ko te tahi nusipepa maʼa te ʼu tehina mo tuagaʼane. Neʼe lagi kotou feʼekeʼaki: ‘Ko te ʼu faʼahi fea ʼaē kā kehekehe ai te ʼu nusipepa ʼaia e lua? Koteā tona ʼaoga ʼo te maʼu ʼo he ʼu nusipepa kehekehe? ʼE ʼi ai anai koa he ʼu fetogi kā fai ki te ʼu nusipepa ʼaia?’
2 Te ʼu Faʼahi ʼAē ʼe Kehekehe Ai Te ʼu Nusipepa: Ko te nusipepa ʼo te ʼuluaki ʼaho ʼo te māhina ʼe higoa anai ko te Nusipepa Ki Te Kaugamālie. Ko te ʼu ʼalatike fuli ʼo te nusipepa ʼaia ʼe teuteuʼi anai maʼa te hahaʼi. Ko te nusipepa ʼo te ʼaho 15 ʼo te māhina ʼe higoa anai ko te Nusipepa Ako pea ʼe mole tufa anai ʼi te fai faka mafola. ʼE tā ai anai ia te ʼu ʼalatike ako fuli ʼo te māhina pea mo te tahi ʼu ʼalatike ʼe fia lau anai e te kau Kilisitiano ʼaē kua foaki tonatou maʼuli ki te ʼAtua. Ko te Nusipepa Ki Te Kaugamālie ʼe fia lau anai e te kau Fakamoʼoni kae tāfito ia nātou ʼaē ʼe mole ko he kau Fakamoʼoni ʼaē ʼe lagi natou fakaʼapaʼapa ki te Tohi-Tapu. Kae ko te Réveillez-vous ! ʼe kei tā tāfito pē ia maʼa te hahaʼi fuli, ʼo kau kiai te hahaʼi ʼaē ʼe mole faʼa tui ki te Tohi-Tapu, pea mo nātou ʼaē ʼe natou ʼui ʼe mole hanatou lotu.
3 Tona ʼAoga: ʼI te Nusipepa Ako, ʼe mole kei ʼaoga anai ke fakamahino te ʼu kupu ohagē ko te kupu “pioniē” ʼaē ʼe mole mahino kiai te hahaʼi ʼaē ʼe mole ko he kau Fakamoʼoni. ʼE toe maʼu ʼi te nusipepa ʼaia he ʼu logo maʼuhiga neʼe teuteuʼi tāfito maʼa te kau Fakamoʼoni ʼa Sehova pea mo te kau ako Tohi-Tapu ʼaē ʼe tuputupu ʼi te faʼahi fakalaumālie. ʼE feafeaʼi ki te Nusipepa Ki Te Kaugamālie? Mai tona ʼaluʼaga ʼaē ko te ʼu meʼa ʼaē ʼe talanoa kiai pea mo tona faʼahiga tohi ʼe mulimuli pē anai ki te ʼu meʼa ʼaē ʼe ʼaoga ki te hahaʼi, koia ʼe fia lau fuli anai te nusipepa ʼaia e he tahi ʼe mole ko he Fakamoʼoni. ʼE mahino ia, ʼe sio anai ia te kau Fakamoʼoni ʼa Sehova fuli ki te ʼaoga ʼo te ʼu nusipepa ʼaia. ʼE tou maʼu anai he māhina kātoa moʼo hikihiki tatatou faʼahiga palalau moʼo tufa te ʼu nusipepa ʼaia, ʼuhi ʼaē heʼe tou tufa anai Te Tule Leʼo e tahi mo te Réveillez-vous ! e tahi ʼi te fai faka mafola ʼi te māhina fuli.
4 Te ʼu Fetogi: Ko ʼihi ʼu fetogi lelei ʼe fakatuʼutuʼu ʼo ʼuhiga mo te Nusipepa Ki Te Kaugamālie. Ohagē lā ʼe palalau anai ki te ʼu akonaki faka Tohi-Tapu tāfito ʼi hona ʼaluʼaga ʼe faigafua te mahino kiai. ʼE toe fakahā ai anai peʼe lava tokoni feafeaʼi te Tohi-Tapu ki te ʼu fāmili. Ko he ʼu ʼalatike ako ʼo te Tohi-Tapu ʼe tā anai maʼa te kau tūpulaga. ʼI te ʼu nusipepa fuli, ʼe tā ai anai he ʼalatike ʼe ina fakamahino lelei ai te ʼu vaega Tohi-Tapu ʼe ina akoʼi mai he ʼu kalitātē ʼo Sehova.
5 ʼE tou faikole ke tapuakinaʼi e Sehova te fakatuʼutuʼu foʼou ʼaia ʼo ʼuhiga mo Te Tule Leʼo. ʼOfa pē, ke aʼu te logo lelei ʼaki Te Tule Leʼo pea mo te Réveillez-vous ! ki te hahaʼi fuli ʼaē ʼe tuha mo nātou ia te logo lelei.—Mat. 10:11.