Tou Tauhi Kiā Sehova Mo Totatou Fāmili
1 ʼI te ʼu temi faka Tohi-Tapu, ko te ʼu fāmili neʼe natou fai fakatahi te ʼu tuʼuga gāue. Neʼe natou fai ʼi te ʼaho fuli ia te ʼu gāue ʼo te loto fale pea mo natou tauhi tāfito kiā Sehova. (Lev. 10:12-14; Teu. 31:12) Iā ʼaho nei, kua lahi te ʼu koga meʼa kua tahitahiga te ʼu fāmili ʼe natou fai fakatahi he ʼu gāue. Kae ʼe ʼiloʼi e te kau Kilisitiano ia te maʼuhiga ʼaē ke natou fakahoko faka fāmili he ʼu gāue, tāfito ʼo ʼuhiga mo te tauhi ki te ʼAtua. ʼE fiafia lahi anai te Tupuʼaga ʼo te fāmili ʼi tana sio ki te ʼu fāmili ʼe natou tauhi age kiā te ia ʼi te logo tahi!
2 Kotou Fai Faka Mafola Fakatahi Mo Tokotou Fāmili: Ko te faka mafola fakatahi ia te logo lelei ʼe ina faka mālohiʼi ai te ʼu noʼo ʼo te fāmili. Koia, ʼe mole gata ʼaki pē anai ki te fai faka mafola ʼa te tagata ʼāfea mo te kōkelekāsio, kae ʼe toe fai faka mafola anai mo tona ʼohoana pea mo tana fānau. (1 Tim. 3:4, 5) Logolā tanatou maʼumaʼua ʼaupitō, kae ko te ʼu taupau feʼoloʼaki ʼe natou fakatuʼutuʼu he temi ke natou gāue ai mo tonatou ʼohoana ʼi te minisitelio.
3 Ko te ʼu mātuʼa ʼaē ʼe fai faka mafola mo tanatou fānau ʼe feala ke natou tokoni kiā nātou ke natou tuputupu ʼi tanatou gāue fai evaselio. ʼE sisio ai anai ia te fānau ki te fiafia ʼo tanatou ʼu mātuʼa ʼi te minisitelio, pea mo natou toe sisio ai anai ki te fakahā e tanatou ʼu mātuʼa ia tonatou ʼofa ʼaē kiā Sehova pea mo te hahaʼi. (Teu. 6:5-7) ʼE tonu ki te fānau ʼi tanatou lahilahi ake mo ʼanatou mātuʼa ke maʼuhiga tuʼumaʼu ia tanatou fai faka mafola fakatahi. Ko te ʼu mātuʼa mo tanā ʼu tama e toko tolu, ʼo kamata ʼi te taʼu 15 ki te taʼu 21, kei nā kaugā gāue tuʼumaʼu pē mo nātou ʼi te minisitelio. Neʼe ʼui fēnei e te tamai: “ ʼI te temi fuli pē, ʼe mā akoʼi age he ʼu meʼa kiā nātou. Pea ʼe mā tōkakaga ke liliu ia te faʼahi ʼaia ko he meʼa ʼe natou fiafia ai pea mo lotomālohi ai.”
4 Kotou Teuteuʼi Fakatahi: Neʼe maʼu e te ʼu fāmili te ʼu lelei ʼi tanatou teuteuʼi fakatahi te minisitelio. ʼI te agamāhani, ʼe leleiʼia e te fānau mokā fai e te fāmili ia he ʼu faʼifaʼitaki, ʼo natou fesuisuiʼaki, ko he tahi ʼe ina fai te ʼu ʼuluaki palalau peʼe ko he tahi ʼe ina fai te tagata peʼe ko te fafine ʼo te ʼapi. ʼE fai e ʼihi fāmili te faʼahi ʼaia ʼi he ʼu kiʼi minuta ʼi te ʼosi ʼo te ako faka fāmili.
5 ʼE toe lahi age tatatou fiafia ʼi tatatou kau ki he ʼu gāue maʼuhiga pea mo fakafiafia mo nātou ʼaē ʼe tou ʼoʼofa ai. ʼE fakafiafia ki te ʼu fāmili hanatou gāue fakatahi ʼi te minisitelio ʼi te ʼu ʼapi pea mo te fai ʼo te ʼu ʼaʼahi pea mo te ʼu ako Tohi-Tapu. ʼI takotou tauhi kiā Sehova mo tokotou fāmili, ʼe feala ke kotou tala fakafiafia fēnei: “Kiā au mo toku loto fale, ʼe mātou tauhi anai kiā Sehova.”—Sos. 24:15.