ʼE Lava Feafeaʼi Ki He Famili Ke Felagolagoʼaki—ʼI Te Minisitelio
1 ʼE ʼi ai koa he meʼa ʼe fakafiafia lahi age ʼi hatatou sio ki he ʼu tagata mo tonatou ʼohoana, pea mo he ʼu mātuʼa mo ʼanatou fānau ʼe nātou gāue fakatahi ʼi te minisitelio, ʼo nātou fakavikiviki ki te huafa ʼo Sehova ia muʼa ʼo te hahaʼi? (Pes. 148:12, 13) ʼE tonu ke māhani te ʼu famili fuli ʼo kau ki te gāue fai faka mafola. Kua koutou fakatuʼutuʼu koa he ʼaho ʼi te vāhaʼa ke fai faka mafola ai tokotou famili? Kapau koia, pea kua ʼiloʼi e tokotou famili katoa te meʼa ʼaē ʼe tonu ke nātou fai pea ʼe feala ke nātou kau fuli kiai.—Taag. 21:5a.
2 ʼI muʼa ʼo te ʼaho ʼaē ʼe tonu ke fai faka mafola ai te famili, he koʼe ʼe mole koutou fakatuʼutuʼu ke koutou teuteuʼi fakatahi he ʼu fai palalau ʼe fakaʼaogaʼi anai e tokotou famili? ʼE fua lelei anai te ʼu temi ʼaē ʼe koutou fai ai he ʼu faʼifaʼitaki, heʼe tupu ai anai he felagolagoʼaki moʼoni ʼo te famili. ʼE ko he meʼa fakafiafia lahi mokā tokaga te foʼi famili katoa ki te gāue fai faka mafola pea mo nātou teuteu lelei fuli ki te gāue ʼaia!
3 Neʼe fakatahi te tagata taupau feʼaluʼaki mo te famili ki te tufa ʼo te ʼu nusipepa. ʼI tanā ʼolo ʼaē ki te ʼu ʼapi mo te tahi ʼo te ʼu taʼahine ʼa te famili ʼaia, neʼe kole fēnei e te taʼahine: “ ʼE tā gāue anai ʼo aʼu ki te hola fia?” Pea neʼe fakamahino age e te taʼahine neʼe tonu ke hoko atu tana gāue mo tana tāmai. Neʼe hā lelei ko ia mo tana tāmai neʼe nā fiafia ʼi te fai faka mafola fakatahi. ʼE ko he manatu lelei ʼaia ʼo te famili!
4 Ko ʼihi famili ʼe lagi feala ke nātou toʼo fakatahi te selevisi pionie vaeluaʼi temi ʼi te māhina e tahi ʼi te taʼu. Peʼe lagi feala ke toʼo hoholo e he tokotahi ʼi te famili te selevisi pionie vaeluaʼi temi peʼe pionie katoa. Kapau ʼe lelei te fai ʼo tanatou ʼu fakatuʼutuʼu pea mo nātou felagolagoʼaki, pea ʼe lagi feala ki te famili katoa ke fakatuputupu tanatou kau ki te fai faka mafola, ʼo nātou lagolago kia ia ʼaē ʼe pionie. ʼE mahino papau ia ʼe tapuakina anai te famili ʼi te tuputupu ʼaia ʼo te gāue, pea mo te ʼu meʼa lelei ʼaē ka hoko anai kia nātou ʼi te minisitelio.—Mala. 3:10.
5 Ko te gāue lahi ʼi te faka mafola ʼo te evaselio, ʼe tokoni anai ki te ʼu famili ke nātou fakatahi tuʼumaʼu, mo faiva, mo maʼu he ʼu fua lelei, pea mo nātou fiafia ʼi te tauhi kia Sehova!—Vakaʼi ia Filipe 2:1, 2.