ʼAua Naʼa Tou Fakafisi Ki Te Fai ʼo He Ako Tohi-Tapu!
1. Ko te ʼaluʼaga fea ʼaē ʼe feala ke ‘mole tou fakafisi te meʼa ʼaē ʼe lelei’ ki te hahaʼi?
1 ʼI tatatou lagolago mālohi ki te tala ʼo te logo lelei ʼo te Puleʼaga ʼo te ʼAtua, ʼe mole tou “fakafisi te meʼa ʼaē ʼe lelei” ki te hahaʼi ʼo totatou telituale. (Taag. 3:27) Ko te logo ʼaē ʼe lelei ʼaupitō ke tou tala ki te hahaʼi, ʼe ko te logo ʼo ʼuhiga mo he temi ʼe fakafiafia age ʼo fakalogo ki te takitaki ʼa te ʼAtua. Tatau aipē peʼe kotou lagolago mālohi ki te tala ki te hahaʼi ia te ʼamanaki ʼo te Puleʼaga, ʼi te fagonogono faigamālie peʼe ʼi takotou tufa ia te ʼu nusipepa, he koʼē ʼe mole kotou fakatuʼutuʼu ke kotou fai he ako Tohi-Tapu, mo kapau ʼe mole heʼeki fai ia te faʼahi ʼaia?
2. Koteā ia te ʼu manatu ʼaē ʼe fakafisi ai ʼihi ki te fai ʼo he ako Tohi-Tapu?
2 ʼI ʼihi temi, ko te faʼahi tāfito ʼaē ʼe ina tāʼofi tātou ke tou fai he ako Tohi-Tapu, ʼe ko tatatou faʼahiga manatu ʼo ʼuhiga mo te ako. ʼE fakafisi ʼihi ke natou fai he ako Tohi-Tapu, heʼe natou manatu ʼe mole natou popoto peʼe natou maʼumaʼua fau. Ko te ʼu tokoni ʼaē ʼe hoa mai, ʼe lagi ʼaoga anai kiā koutou ke mole kotou fakafisi ki te fai ʼo he ako Tohi-Tapu.—Mat. 28:19; Gāue 20:20.
3. He koʼē ʼe feala ke tou akoʼi ia te Tohi-Tapu ki te hahaʼi?
3 Tatatou Manatu ʼAē ʼe Mole Tou Popoto: Lagi neʼe mole lelei takotou ako ʼi te faleako peʼe ʼi ai he tahi ʼu faʼahi ʼaē ʼe tupu ai takotou manatu ʼe mole kotou popoto ʼi te fai ʼo he ako Tohi-Tapu. Neʼe fua lelei ia te gāue ʼa te kau minisi Kilisitiano ʼi te ʼuluaki sēkulō, logolā neʼe “mole ako pea [neʼe] mole ko he ʼu tagata neʼe natou maʼu he poto makehe.” He koʼē neʼe feala ke natou akoʼi ia te moʼoni ki te hahaʼi? He “neʼe [natou] fakatahi mo Sesu.” (Gāue 4:13) Neʼe lahi te ʼu meʼa neʼe akoʼi age kiā nātou e te Tagata Faiako Lahi, ia Sesu, pea neʼe taupau fakalelei ʼi te Tohi-Tapu, ia tana ʼu faiakonaki pea mo tana faʼahiga fai ia te gāue. Tatau aipē pe neʼe mole fualoa takotou ako ʼi te faleako, ʼe akoʼi koutou ʼi te faʼahi fakalaumālie, ko he ako ʼe māʼoluga age ʼi te ʼu faʼahiga ako fuli.—Isa. 50:4; 2 Ko. 3:5.
4. Koteā te ako ʼe tou lava tāʼofi mai te faʼifaʼitaki ʼo Amosi?
4 ʼI ʼihi temi, neʼe fakaʼaogaʼi e Sehova ia te ʼu polofetā moʼo fakatonutonuʼi te ʼu hau peʼe ko he tahi ʼu hahaʼi maʼu tuʼulaga ʼaē neʼe agahala. Ko ʼihi, ʼe natou hagē ko Amosi, ʼaē neʼe mole ko he tahi neʼe maʼuhiga. Neʼe fakahā fakalelei fēnei e Amosi: “Neʼe mole au polofetā, neʼe mole ko au ko he foha ʼo he polofetā kae ko au neʼe ko te tagata tauhi ovi pea mo te tagata huki fiku sekomole.” (Amosi 7:14) Kae neʼe mole fakafisi ia Amosi ki te tala ʼo te logo fakamāu ʼa Sehova ki te pelepitelō ko Amasia, ʼaē neʼe tauhi ki te pipi. (Amosi 7:16, 17) ʼE tonu ke tou manatuʼi tuʼumaʼu ʼe tou fakahoko ia te gāue ʼa te ʼAtua, pea ʼe ina fakaliliu anai tātou ke tou popoto moʼo fakahoko ia te gāue ʼaē neʼe ina fakatotonu mai.—2 Tim. 3:17.
5. He koʼē ʼe tonu ke tou faiga ke tou kamata he ako Tohi-Tapu, tatau aipē peʼe tou maʼumaʼua ʼaupitō?
5 Tatatou Manatu ʼAē ʼe Tou Maʼumaʼua Fau: Tatau aipē peʼe kotou maʼumaʼua fau, kae kua lagi kotou fakatuʼutuʼu he temi ke kotou lagolago tuʼumaʼu ai ki te minisitelio. Ko te fai ʼo he ako Tohi-Tapu ʼe ko he koga fakafiafia ʼaia ʼo te minisitelio. ʼE ko he pilivilēsio te sio ʼaē ki te Folafola ʼa Sehova ʼe ina fetogi ia te maʼuli ʼo he tahi. (Hep. 4:12) ʼE fiafia ia Sehova mokā tou fai ia he ʼu sākilifisio moʼo tokoni ki he tahi ke “aʼu ki te ʼatamai mālama totonu ʼo te moʼoni.” (1 Tim. 2:4) Māʼia mo te ʼu ʼāselo ʼe natou fiafia mokā ʼe fakahemala he tahi mai tona maʼuli ʼāfea pea mo tuputupu ʼi te faʼahi fakalaumālie.—Luka 15:10.
6. Koteā ia te pilivilēsio ʼaē ʼe tou maʼu ʼi te fakahoko ʼo te finegalo ʼo te ʼAtua?
6 ʼE “loto [e te ʼAtua] ke haofaki te faʼahiga tagata fuli pē, pea ke natou aʼu ki te ʼatamai mālama totonu ʼo te moʼoni.” (1 Tim. 2:4) ʼE ko he toe pilivilēsio hatatou gāue ʼo mulimuli ki te finegalo ʼo te ʼAtua, ʼo mole tou fakafisi ki te fai ʼo he ʼu ako Tohi-Tapu!