Tou Tala Ia Te Folafola ʼa Te ʼAtua ʼAki He Lototoʼa
“ ʼAlu ʼo fai fakakikite ki taku hahaʼi.”—Amosi 7:15.
1, 2. Neʼe ko ai ia Amosi, pea koteā ʼaē ʼe fakahā ʼi te Tohi-Tapu ʼo ʼuhiga mo ia?
ʼI TANA minisitelio, neʼe fakafeagai ia te pelepitelo ki te gāue ʼa te kaugana ʼa Sehova. Neʼe pupulaʼi fēnei ia ia e te pelepitelo: ‘Tuku nei tau fai faka mafola! Mavae ʼi henī!’ Koteā ʼaē neʼe fai e te kaugana? Neʼe fakalogo koa ki tona kapu ʼaia, pe neʼe lototoʼa koa ʼo hoko atu ia tana tala ia te folafola ʼa te ʼAtua? ʼE feala ke koutou maʼu ia te fakamatala ʼo te kaugana ʼaia ʼi te tohi ʼaē ʼe fakahigoa ʼaki tona higoa: ia te tohi ʼo Amosi. Kae ʼi muʼa ʼo hatatou mahino lelei ki te fakafeagai ʼaia ʼa te pelepitelo, tou vakaʼi age muʼa he tahi ʼu fakamatalatala ʼo ʼuhiga mo Amosi.
2 Neʼe ko ai ia Amosi? Ko te temi fea ʼaē neʼe maʼuli ai, pea neʼe maʼuli ʼifea? ʼE tou maʼu tona ʼu tali ia Amosi 1:1, ʼaē ʼe ʼui ai: “Te ʼu folafola ʼa Amosi ʼaē neʼe kau ʼi te kau tauhi ōvi ʼo Tekoa, . . . ʼi te temi ʼo Usia te hau ʼo Suta pea mo te temi ʼo Selopoame te foha ʼo Seoasi, te hau ʼo Iselaele.” Ko Amosi neʼe ko he tagata mai Suta, kae neʼe nofo ʼi te kolo ʼo Tekoa, ʼaē neʼe vaha mo Selusalemi ia kilometa e 16, ʼi te potu saute. Neʼe maʼuli ʼi te fakaʼosi ʼo te hiva sēkulō ʼi muʼa ʼo totatou temi ʼi te temi ʼaē neʼe takitaki ai e te Hau ko Usia ia Suta pea mo te temi ʼo Selopoame 2 ʼaē neʼe hau ki te puleʼaga ʼo Iselaele, ʼaē ko tona ʼu telepi e hogofulu. Ko Amosi neʼe ko te tagata tauhi ōvi. ʼE ʼui ia Amosi 7:14 neʼe ko “te tagata tauhi ōvi” pea ko “te tagata huki fiku sekomole.” ʼI te ʼu temi taʼukai ʼo te ʼu fiku neʼe kau ai ia Amosi. Neʼe ina huki te ʼu fiku. Neʼe fai te faʼahi ʼaia moʼo faka momoho vave ia te ʼu fiku, pea neʼe ko he gāue kinakina.
“ ʼAlu ʼo Fai Fakakikite”
3. ʼE ʼaoga feafeaʼi kiā tatou ia te faʼifaʼitaki ʼa Amosi, mo kapau ʼe tou manatu ʼe mole tāu mo tatou ke tou fai faka mafola?
3 Neʼe ʼui fakahagatonu fēnei e Amosi: “Neʼe mole au polofeta, neʼe mole ko au ko he foha ʼo he polofeta.” (Amosi 7:14) Neʼe mole ko he foha ia ʼo he polofeta pea neʼe mole akoʼi ia ia ke liliu ko he polofeta. Kae ʼi te lotolotoiga ʼo te hahaʼi ʼo Suta neʼe filifili e Sehova ia Amosi moʼo fai ia Tana gāue. ʼI te temi ʼaia, neʼe mole filifili e te ʼAtua ia he hau mālohi, ia he pelepitelo ʼatamai, peʼe ko he pule maʼu koloā. Pea ʼe ko he ako lelei ʼaia kiā tatou. ʼE lagi mole tou maʼu koloā pea neʼe mole lelei tatatou ako, kae ʼe tonu koa ke tou lotolotolua ʼo manatu ʼe mole tāu mo tatou ke tou tala ia te folafola ʼa te ʼAtua? Kailoa! Ko Sehova ʼe ina akoʼi tatou ke tou tala ia tana logo—māʼiape la mo te ʼu telituale faigataʼa. Koia kapau neʼe tokoni ia Sehova kiā Amosi ʼi tana fai faka mafola ki te hahaʼi loto fefeka, pea ʼe tonu anai kiā nātou fuli ʼaē ʼe nātou fia tala ia te folafola ʼa te ʼAtua ʼaki he lototoʼa ke nātou tokagaʼi ia te faʼifaʼitaki ʼa te polofeta lototoʼa ʼaia.
4. He koʼe neʼe faigataʼa kiā Amosi ia tana fai faka mafola ʼi Iselaele?
4 Neʼe fakatotonu fēnei e Sehova kiā Amosi: “ ʼAlu ʼo fai fakakikite ki taku hahaʼi.” (Amosi 7:15) Neʼe ko he fakatotonu faigataʼa, koteʼuhi ʼi te temi ʼaia ko te puleʼaga ʼo te ʼu telepi e hogofulu ʼo Iselaele neʼe nātou māʼuʼuli ʼi te tokalelei, mo te fīmālie pea mo maʼu koloā. Tokolahi ia nātou neʼe nātou laga tonatou ‘ ʼu fale ʼo te temi momoko’ pea mo tonatou ‘ ʼu fale ʼo te temi vevela’ pea ko te ʼu fale ʼaia neʼe mole laga ʼaki he ʼu piliki neʼe faʼu ʼaki te pela, kae neʼe laga ʼaki te ʼu “maka neʼe taʼaga” pea ʼe totogi kovi. Ko ʼihi neʼe nātou teuteuʼi tonatou ʼu fale ʼaki te ʼu lei neʼe togi fakamatalelei pea mo nātou ʼinu te vino ʼaē neʼe fai ʼaki te ʼu vite ʼo “te ʼu fuʼu vite lelei.” (Amosi 3:15; 5:11) Ko te tupuʼaga la ʼaia ʼo te mole tokagaʼi e te tokolahi ia te fai faka mafola ʼa Amosi. Pea ko te telituale ʼaē neʼe gāue ai Amosi ʼe feala pe ke fakatatau mo ʼihi telituale ʼe tou fakahoko ai tatatou minisitelio ʼi te temi nei.
5. Koteā te ʼu aga heʼe faitotonu neʼe lolotoga fai e ʼihi hahaʼi ʼo Iselaele?
5 Neʼe mole kovi te maʼu koloā ʼa Iselaele, kae ko te meʼa ʼaē neʼe kovi heʼe ko ʼihi neʼe nātou aga fakakākā ke maʼu ai hanatou ʼu meʼa. Ko te kau maʼu meʼa neʼe nātou “kaihaʼa ia nātou ʼe liliki” pea mo “fakamamahiʼi ia te kau māsisiva.” (Amosi 4:1) Ko te hahaʼi faifakatau koloā lalahi, mo te kau tuʼi fakamāu pea mo te kau pelepitelo neʼe kua nātou fakatuʼutuʼu ke nātou kaihaʼa ia te hahaʼi māsisiva. Tou toe liliu muʼa ki te temi ʼaia, ʼo tou vakaʼi ia te ʼu meʼa ʼaē neʼe fai e te ʼu tagata ʼaia.
Neʼe Maumauʼi Ia Te Lao ʼa Te ʼAtua
6. Neʼe kaihaʼa feafeaʼi ia te hahaʼi e te kau Iselaele faifakatau koloā?
6 Tou vakaʼi muʼa ia te lāpalasi fakatauʼaga meʼa. Neʼe ʼi ai te kau faifakatau koloā kākā neʼe nātou “fakaveliveli ia te efa” pea nātou “fakalahi ia te sikeli,” pea māʼiape la mo te “otaʼotaʼi fulumeto” neʼe nātou fakatau ohage ko he fulumeto. (Amosi 8:5, 6) Neʼe kākāʼi e te kau faifakatau koloā ia te hahaʼi he neʼe totogi kovi fau ia te ʼu meʼa ʼaē neʼe nātou fakatau, kae neʼe mole ko he ʼu meʼa lelei. ʼI tanatou kua toʼo fuli ia te ʼu koloā ʼa te hahaʼi māsisiva, ko te hahaʼi fakaʼofaʼofa ʼaia neʼe nātou toe fakatau pe ia nātou totonu ke nātou liliu ko ni ʼu sinifu. Pea ko te kau faifakatau koloā neʼe nātou totogi ia nātou “ki te totogi ʼa he hoaʼi taka.” (Amosi 8:6) Koutou fakakaukauʼi age muʼa! Ko te kau faifakatau koloā mānumānu ʼaia neʼe nātou meʼa noaʼi tonatou ʼu tēhina mo tuagaʼane Iselaele ohage ko he ʼu sūlie! Neʼe ko he fakalainoaʼi ʼaia ʼo te hahaʼi māsisiva, pea ko he toe maumauʼi ʼo te Lao ʼa te ʼAtua! Kae ko te kau faifakatau koloā pe ʼaia neʼe nātou faka maʼuhigaʼi ia “te sapato.” (Amosi 8:5) ʼIo, neʼe nātou fakahā pe ia muʼa ʼo te hahaʼi ʼe ko nātou ko te ʼu hahaʼi lotu.
7. He koʼe neʼe lava maumauʼi ia te Lao ʼa te ʼAtua e te kau faifakatau koloā ʼo Iselaele?
7 He koʼe koa neʼe mole fakatūʼā ia te kau faifakatau koloā ʼi tanatou maumauʼi ia te Lao ʼa te ʼAtua, ʼaē ʼe ʼui fēnei ai: “ ʼE tonu ke ke ʼofa ki tou kāiga ohage pe ko koe totonu”? (Levitike 19:18) Neʼe nātou hāo mai te tūʼā koteʼuhi ko nātou ʼaē neʼe fakanofo ke nātou poupouki ia te Lao—ia te kau tuʼi fakamāu—neʼe toe lagolago pe mo nātou ki te ʼu aga ʼaia. ʼI te muʼa matapā ʼo te kolo, ʼaē neʼe fai ai te ʼu tonu fakamāu, ko te kau tuʼi fakamāu neʼe ‘nātou tali te falā ʼaē neʼe foaki age ke nātou fai he fakamāu kākā pea neʼe mole nātou tokagaʼi ia te hahaʼi māsisiva.’ Neʼe mole ʼofa ia te kau tuʼi fakamāu ki te hahaʼi māsisiva, he neʼe nātou fai tanatou ʼu fakamāu ʼo mulimuli ki te ʼu totogi fakafūfū ʼaē neʼe foaki age. (Amosi 5:10, 12) Koia, ko te kau tuʼi fakamāu neʼe nātou meʼa noaʼi ia te Lao ʼa te ʼAtua.
8. Koteā te aga ʼaē neʼe meʼa noaʼi e te kau pelepitelo agakovi?
8 ʼI te temi ʼaia, neʼe feafeaʼi ia te kau pelepitelo ʼo Iselaele? Moʼo tali ki te faʼahi ʼaia, tou vakaʼi ia te tahi ʼaluʼaga. Tou fakatokagaʼi ia te ʼu agahala ʼaē neʼe fakagafua e te kau pelepitelo ke fai “ ʼi te fale ʼo tonatou ʼu ʼatua”! ʼAki ia Amosi, neʼe ʼui fēnei e te ʼAtua: “Neʼe ʼalu te [foha] pea mo tana tāmai ki te taʼahine pe e tahi, ke tupu ai he moamoagaʼi ʼo toku huafa taputapu.” (Amosi 2:7, 8) Koutou fakakaukauʼi age muʼa! Ko te tāmai Iselaele mo tona foha neʼe nā fai te ʼu felāveʼi fakasino heʼeʼaoga ʼi te fale lotu mo te fafine paomutu. Pea ko te kau pelepitelo agakovi ʼaia neʼe nātou meʼa noaʼi te aga heʼeʼaoga ʼaia!—Levitike 19:29; Teutalonome 5:18; 23:17.
9, 10. Ko te Lao fea ʼa te ʼAtua ʼaē neʼe maumauʼi e te kau Iselaele, pea koteā ʼaē ʼe lava fakatatau kiai ʼi te temi nei?
9 ʼO ʼuhiga mo ʼihi agahala, neʼe ʼui fēnei e Sehova: “ ʼI te ʼu mutuʼi meʼa ʼaē neʼe toʼo moʼo fakamoʼoni ʼaki he maʼua, ʼe nātou fāliki ʼo momoe kiai ʼi te ʼu ʼaletale fuli; pea ko te vino ʼa te hahaʼi ʼaē neʼe fakatūʼā, ʼe nātou ʼinu ʼi te fale ʼo tonatou ʼu ʼatua.” (Amosi 2:8) Ko te kau pelepitelo pea mo te hahaʼi fuli neʼe kua nātou meʼa noaʼi ia te lao ʼaē ʼe tuʼu ia Ekesote 22:26, 27, ʼaē ʼe ʼui ai ko he mutuʼi meʼa neʼe toʼo moʼo fakamoʼoni ʼaki he maʼua, neʼe tonu ke toe liufaki ʼi muʼa ʼo te tō ʼo te pōʼuli, kiā ia ʼaē ʼaʼana te kofu ʼaia. Neʼe mole nātou mulimuli ki te lao ʼaia he neʼe nātou fakaʼaogaʼi te mutuʼi meʼa ʼaia ko he meʼa fāliki ke nātou fakafālō ai mokā nātou fai kakai pea mokā nātou ʼiʼinu maʼa tonatou ʼu ʼatua hala. Pea ko te ʼu tūʼā ʼaē neʼe huʼi age e te hahaʼi māsisiva, neʼe nātou fakaʼaogaʼi moʼo totogi ʼaki te vino ʼaē ka nātou fakaʼaogaʼi moʼo ʼinu ʼi te ʼu lafeti ʼo te lotu hala. Neʼe kua nātou mamaʼo ʼosi mo te tauhi moʼoni!
10 Ko te kau Iselaele neʼe nātou maumauʼi ʼaupito te ʼu fakatotonu lahi e lua ʼo te Lao—ʼaē ko te ʼofa kiā Sehova pea mo te ʼofa ki ʼonatou tatau. Koia la ʼaē neʼe fekauʼi ai e te ʼAtua ia Amosi ke ʼalu ʼo tauteaʼi nātou ʼuhi ko tanatou heʼe agatonu. ʼI te temi nei, ko te ʼu puleʼaga ʼo te malamanei, ʼaē ʼe kau ai mo te hahaʼi ʼo te Keletiate, ʼe nātou toe maʼu mo nātou te aga ʼa te kau Iselaele ʼo te temi muʼa. Ko ʼihi ʼe nātou koloāʼia, kae ko ʼihi ʼe nātou maʼuli fakaʼofaʼofa pea mo maʼuli mamahi ʼuhi ko te ʼu aga kovi ʼaē ʼe fai e te kau takitaki kākā ʼi te ʼu matani gāue lalahi, ʼi te ʼu meʼa faka politike, pea mo te lotu hala. Kae ko Sehova ʼe tokaga ki te hahaʼi ʼaē ʼe maʼuli mamahi pea mo nātou ʼaē ʼe nātou kumi ia ia. Koia, neʼe ina fekauʼi ai tana ʼu kaugana ʼo te temi nei ke nātou gāue ohage ko te gāue ʼaē neʼe fai e Amosi—ke nātou lototoʼa ʼo faka mafola ia Tana folafola.
11. Koteā te ako ʼe tou maʼu mai te faʼifaʼitaki ʼa Amosi?
11 ʼE ʼaoga lahi anai kiā tatou te faʼifaʼitaki ʼa Amosi, heʼe tatau tana gāue pea mo te gāue ʼaē ʼe tou fai ʼi te temi nei. ʼE fakahā lelei mai e Amosi (1) te meʼa ʼaē ʼe tonu ke tou faka mafola, (2) ia te faʼahiga fai ʼo te fai faka mafola, pea (3) ia te tupuʼaga ʼo te mole lava tāʼofi ʼo tatatou fai faka mafola e te kau fakafeagai. Tou vakaʼi ia te ʼu puani takitahi ʼaia e tolu.
Tou Faʼifaʼitakiʼi Ia Amosi
12, 13. Neʼe fakahā feafeaʼi e Sehova tona ʼita ʼaē ki te kau Iselaele, pea neʼe feafeaʼi tanatou aga?
12 ʼI totatou ʼuhiga kau Fakamoʼoni ʼa Sehova, ʼe tou tokaga tāfito ʼi tatatou minisitelio faka Kilisitiano ki te faka mafola ʼo te Puleʼaga pea mo te fai ʼo ni ʼu tisipulo. (Mateo 28:19, 20; Maleko 13:10) Kae ʼe tou toe faka mafola foki ia te ʼu fakatokaga ʼa te ʼAtua, ohage pe ko Amosi ʼi tana fakahā ʼaē ko Sehova ʼe ina fakahoko anai ia tana fakamāu ki te kau agakovi. Ia Amosi 4:6-11, ʼe tou lau ai ko Sehova neʼe ina fakahā tuʼa lahi tona ʼita ki Iselaele. Neʼe ina fakahoko “te hoge pane” ki te kau Iselaele, pea mo “fakafisi age kiā nātou he ua lalahi,” neʼe ina tauteaʼi nātou ʼaki “te maʼuli lila [ʼa te ʼakau ʼe kai ʼona tegaʼi ʼakau] pea mo te mahaki [ʼa te ʼu ʼakau],” pea neʼe ina fakatō kiā nātou ia “te taʼi mahaki.” Neʼe fakahemala ai koa ia te kau Iselaele? Neʼe ʼui fēnei e te ʼAtua: “Neʼe mole koutou liliu mai kiā te au.” ʼIo, ko te kau Iselaele neʼe tuʼa lahi ia tanatou fakafisi kiā Sehova.
13 Neʼe fakatūʼā e Sehova ia te kau Iselaele ʼaē neʼe mole fakahemala. Kae neʼe ina fakatokagaʼi muʼa nātou ʼaki te lea faka polofeta. ʼO mulimuli pe kiai, neʼe ʼui fēnei e te ʼAtua: “Ko te Tuʼi ʼAliki ko Sehova ʼe mole ina fai anai he meʼa kae neʼe mole heʼeki ina tala tana meʼa fakalilo ki tana kau kaugana, ia te kau polofeta.” (Amosi 3:7) Ko te ʼAtua neʼe ina fakahā kiā Noe ia te Tulivio ʼaē neʼe ʼamanaki hoko mai pea neʼe ina fakatotonu age ke ina tala he fakatokaga ki te hahaʼi. ʼO toe feiā mo Amosi, neʼe ʼui age e Sehova ke ina fai he fakatokaga fakaʼosi. Kae neʼe meʼa noaʼi e Iselaele ia te fakatokaga ʼa te ʼAtua pea neʼe mole ina fai te aga ʼaē ʼe lelei.
14. Koteā te ʼu meʼa ʼi totatou temi ʼe tatau ai mo te temi ʼo Amosi?
14 ʼE mahino ia, kua koutou tokagaʼi ko te ʼu ʼaluʼaga ʼo totatou temi ʼe tatau mo te temi ʼo Amosi. Neʼe fakakikite e Sesu Kilisito ʼi te temi fakaʼosi ʼe lahi anai ia te ʼu malaʼia ʼaē ka hoko. Neʼe ina toe fakakikite foki ʼe fai anai mo te gāue fai faka mafola ʼi te malamanei kātoa. (Mateo 24:3-14) Kae ohage pe ko te temi ʼo Amosi, tokolahi ia te hahaʼi ia ʼaho nei ʼe nātou meʼa noaʼi ia te ʼu fakaʼiloga ʼo te temi pea mo te logo ʼo te Puleʼaga. ʼE toe hoko pe anai ki te hahaʼi ʼaia ia te ʼu meʼa ʼaē neʼe hoko ki te kau Iselaele ʼaē neʼe mole fakahemala. Neʼe fakatokagaʼi fēnei nātou e Sehova: “Teuteu ke ke felāveʼi mo tou ʼAtua.” (Amosi 4:12) Neʼe nātou felāveʼi mo te fakamāu ʼa te ʼAtua ʼi te temi ʼaē neʼe tauʼi ai nātou e te kau Asilia. ʼI te temi nei, ko te mālama heʼe lotu ʼaenī ʼe ‘felāveʼi anai mo te ʼAtua’ ʼi Halamaketone. (Apokalipesi 16:14, 16) Koia kapau kei loto faʼa kātaki ia Sehova, ʼe tou fakaloto mālohiʼi anai he tokolahi fēnei: “Koutou kumi ia Sehova, pea koutou māʼuʼuli ai.”—Amosi 5:6.
Ohage Ko Amosi ʼe Tou Felāveʼi Mo Te ʼu Fakafeagai
15-17. (a) Neʼe ko ai ia Amasia, pea neʼe ina tali feafeaʼi ia te ʼu fakamāu ʼaē neʼe fai e Amosi? (b) Koteā te ʼu palalau loi ʼaē neʼe fai e Amasia moʼo fakafeagai kiā Amosi?
15 ʼE feala ke tou faʼifaʼitakiʼi ia Amosi ʼi te logo ʼaē ʼe tou faka mafola pea mo tatatou faʼahiga fai faka mafola. ʼE hā lelei ia te faʼahi ʼaia ʼi te kapite 7, ʼaē ʼe talanoa ai ki te pelepitelo ʼaē neʼe kua tou palalau pe kiai ʼi te ʼuluaki palakalafe ʼo te alatike. Neʼe ko “Amasia ia te pelepitelo ʼo Petele.” (Amosi 7:10) Ko te kolo ʼo Petele neʼe ko te kolo taulaga ʼo te lotu ʼaposita ʼo Iselaele, ʼaē neʼe fai ai te tauhi ki te vitulo. Koia ko Amasia neʼe ko he pelepitelo ʼo te lotu Sutea. Neʼe tali feafeaʼi e Amasia te ʼu fakamāu lototoʼa ʼa Amosi?
16 Neʼe ʼui fēnei e Amasia kiā Amosi: “Tagata ʼaē ʼe hā kiai te ʼu meʼa, ʼalu, hola ki te fenua ʼo Suta, pea kai ʼi ai te pane, pea ʼe feala ai hau fai fakakikite. Kae ʼe mole kei tonu ke ke fai faka mafola ʼi Petele, heʼe ko he sagatualio ʼo te hau pea ko te ʼapi fakahau.” (Amosi 7:12, 13) ʼE hage neʼe fia ʼui fēnei e Amasia: ‘ ʼAlu koe ki tou fenua! Kua ʼi ai tamatou lotu.’ Neʼe ina toe faigaʼi foki ke tapuʼi e te puleʼaga ia te ʼu gāue ʼaē ʼa Amosi, ʼo ina ʼui fēnei ki te Hau ko Selopoame 2: “Neʼe fonofono ia Amosi ʼo ʼuhiga mo koe ʼi te loto fale pe ʼo Iselaele.” (Amosi 7:10) Ei, ko Amasia neʼe ina tukugakoviʼi ia Amosi ʼe ko te tagata aga fakakākā! Neʼe ina ʼui fēnei ki te hau: “Koʼeni te ʼu palalau ʼa Amosi: ‘ ʼE matehi anai ia Selopoame ʼaki te heletā; pea ʼe fakamavae moʼoni anai ia Iselaele ʼi tona fuga kele, ke ʼalu ʼo maʼuli popūla.’ ”—Amosi 7:11.
17 ʼI te ʼu palalau ʼaia ʼa Amasia, ko faʼahi ʼe tolu ʼaē ʼe hala ai tana ʼu palalau. Neʼe ina ʼui fēnei: “Koʼeni te ʼu palalau ʼa Amosi.” Kae neʼe mole heʼeki ʼui tuʼa tahi e Amosi ʼe ʼaʼana te ʼu fakakikite. ʼI te temi fuli, neʼe ina ʼui pe: “Koʼeni te ʼu palalau ʼa Sehova.” (Amosi 1:3) Neʼe ina toe tukugakoviʼi ia Amosi ʼe ina ʼui: “ ʼE matehi anai ia Selopoame ʼaki te heletā.” Kae ia Amosi 7:9 neʼe ina fakakikite fēnei: “[Ko au Sehova] ʼe au tuʼu ake anai ʼo fakafeagai ki te ʼapi ʼo Selopoame ʼaki te heletā.” Neʼe fakakikite e te ʼAtua ia te malaʼia ʼaia ki te “ ʼapi” ʼo Selopoame, tona hōloga. Tahi ʼaē meʼa, ko Amasia neʼe ina ʼui ko Amosi neʼe palalau fēnei: “ ʼE fakamavae moʼoni anai ia Iselaele ʼi tona fuga kele, ke ʼalu ʼo maʼuli popūla.” Kae ko Amosi neʼe ina toe fakakikite ʼe tapuakinaʼi anai ia te kau Iselaele mo kapau ʼe nātou liliu mai ki te ʼAtua. ʼIo ko Amasia neʼe ina fai he ʼu loi ke tapuʼi ai e te hau ia te fai faka mafola ʼa Amosi.
18. Ko te ʼu faʼahi fea ʼaē ʼe tatau ai ia Amasia pea mo te kau takitaki lotu ʼo te temi nei?
18 ʼE koutou fakatokagaʼi koa ia te tatau ʼo te ʼu loi ʼaē neʼe fai e Amasia pea mo te ʼu loi ʼaē ʼe lau ʼi te temi nei e te hahaʼi ʼaē ʼe fakafeagai ki te hahaʼi ʼa Sehova? Ohage pe ko te ʼu faiga ʼa Amasia ke ina tāʼofi ia te fai faka mafola ʼa Amosi, ʼe toe feiā pe mo ʼihi pātele, mo te kau takitaki lotu, pea mo te kau ʼēpikopō ʼo totatou temi ʼe nātou faiga ke nātou fakagata ia te fai faka mafola ʼa te ʼu kaugana ʼa Sehova. Ko Amasia neʼe ina tukugakoviʼi ia Amosi ʼe ko te tagata aga fakakākā. ʼO toe feiā ʼi te temi nei, ko ʼihi kau takitaki lotu ʼe nātou tukugakoviʼi ia te kau Fakamoʼoni ʼa Sehova ʼo nātou ʼui ʼe nātou fakatupu tuʼutāmaki ki te maʼuli tokalelei ʼo te fenua. Pea ohage ko te kole ʼa Amasia ki te hau ke tokoni age moʼo tauʼi ia Amosi, ko te kau takitaki lotu ʼe nātou tau kole ki te kau politike ke nātou tokoni age moʼo fakatagaʼi ʼo te kau Fakamoʼoni ʼa Sehova.
ʼE Mole Lava Tāʼofi e Te Kau Fakafeagai Ia Tatatou Fai Faka Mafola
19, 20. Neʼe tali feafeaʼi e Amosi ia te fakafeagai ʼa Amasia?
19 Neʼe tali feafeaʼi e Amosi ia te fakafeagai ʼa Amasia? ʼUluaki, neʼe fehuʼi fēnei e Amosi ki te pelepitelo: “ ʼE ke ʼui koa: ‘ ʼE mole tonu ke ke fakakikite ʼo fakafeagai ki Iselaele’?” ʼAki he lototoʼa, ko te polofeta ʼa te ʼAtua neʼe ina fakahā atu aipe kiā Amasia ia te ʼu meʼa ʼe lagi neʼe mole fia logo kiai. (Amosi 7:16, 17) Neʼe mole mataku ia Amosi. ʼE ko he faʼifaʼitaki lelei ʼaia kiā tatou! Kapau ʼe tonu ke tou tala ia te folafola ʼa te ʼAtua, ʼe mole tou talagataʼa anai ki totatou ʼAtua, māʼiape la mo te ʼu fenua ʼaē ʼe hage ai te aga ʼa te hahaʼi ko te aga ʼa Amasia, ʼo fonofono ke fakatagaʼi tatou. Ohage ko Amosi, ʼe tou haga tala fēnei: “Koʼeni te ʼu palalau ʼa Sehova.” Pea ʼe mole feala anai ki te kau fakafeagai ke nātou tāʼofi ia tatatou faka mafola, heʼe ko “te nima ʼo Sehova” ʼe nofo mo tatou.—Gaue 11:19-21.
20 Neʼe tonu ke ʼiloʼi e Amasia ʼe mole he fua anai ʼo tana ʼu fakamatakutaku. Neʼe kua fakahā pe e Amosi ʼe mole feala ki he tagata ʼo te kele ke ina tāʼofi tana fai faka mafola—pea ko te tolu puani ʼaia ka tou vakaʼi anai. Ia Amosi 3:3-8, neʼe fai e Amosi ia te ʼu fehuʼi pea mo te ʼu lea fakatātā moʼo fakahā ko meʼa fuli ʼaē ʼe hoko ʼe ʼi ai tona tupuʼaga. Pea neʼe ina fai te fakatā ʼaenī: “ ʼE ʼi ai te laione ʼe gugulu! Ko ai ʼaē ka mole mataku anai? Ko te Tuʼi ʼAliki ko Sehova neʼe palalau totonu! Ko ai ʼaē ka mole fai fakakikite anai?” Ko tona faka ʼuhiga neʼe ʼui fēnei e Amosi ki te hahaʼi: ‘ ʼE koutou matataku fuli mokā koutou logo ki te gugulu ʼa he laione, koia ʼe mole feala haku fakatātāʼofi ia taku faka mafola ʼo te folafola ʼa te ʼAtua, heʼe ko Sehova totonu ʼaē neʼe ina fakatotonu mai ke fai ia te faʼahi ʼaia.’ Neʼe palalau ia Amosi ʼaki he lototoʼa he neʼe manavasiʼi pea mo fakaʼapaʼapa lahi ki te ʼAtua.
21. ʼE tou tali feafeaʼi ki te fakatotonu ʼa te ʼAtua ʼaē ke tou faka mafola ia te logo lelei?
21 Neʼe tou logo mo tatou ki te fakatotonu ʼa Sehova ʼaē ke tou fai faka mafola. ʼE tou tali feafeaʼi? Ohage ko Amosi pea mo te ʼu ʼuluaki tisipulo ʼa Sesu, pea ʼaki te tokoni ʼa Sehova ʼe tou lototoʼa ʼo tala Tana folafola. (Gaue 4:23-31) Peʼe fakatagaʼi tatou e te kau fakafeagai peʼe fakaʼaoʼaoganoa ia te hahaʼi ʼaē ʼe tou fai faka mafola ki ai, kae ʼe mole feala anai ke nātou tāʼofi tatatou fai faka mafola. Ohage ko te faʼafai ʼa Amosi, ko te kau Fakamoʼoni ʼa Sehova ʼi te malamanei kātoa ʼe nātou lototoʼa ʼo tala ia te logo lelei. Ko totatou maʼua ke tou fakatokagaʼi ia te hahaʼi ʼo ʼuhiga mo te fakamāu ʼaē ka fakahoko e Sehova. Koteā ʼaē ʼe pipiki ki te fakamāu ʼaia? ʼE tali anai kiai ia te alatike ʼaē ka hoko mai.
ʼE Koutou Tali Feafeaʼi Anai?
• Neʼe feafeaʼi ia te ʼu ʼaluʼaga ʼaē neʼe fakahoko ai e Amosi ia te gāue ʼaē neʼe fakatotonu age e te ʼAtua?
• Ohage ko Amosi, koteā ʼaē ʼe tonu ke tou faka mafola?
• ʼE tonu ke tou fakahoko feafeaʼi ia tatatou fai faka mafola?
• He koʼe ʼe mole lava tāʼofi e te kau fakafeagai ia tatatou fai faka mafola?
[Paki ʼo te pasina 10]
Neʼe filifili e te ʼAtua ia te tagata huki fiku ko Amosi moʼo fai ia Tana gāue
[Paki ʼo te pasina 13]
ʼE tou lototoʼa koa ohage ko Amosi ʼo tala ia te fakatokaga ʼa Sehova?