Kotou Fakatuʼutuʼu Ke Kotou Fai He Ako Tohi-Tapu
1 “Hiki ake ʼokotou mata pea ke kotou sisio ki te ʼu gāueʼaga, kua hihina ia ki te tānaki ʼo te taʼukai.” (Soa. 4:35) ʼE mahino ia ko te ʼu palalau ʼaia neʼe fai e Sesu Kilisito, ʼe faka ʼuhiga ki te ʼaluʼaga ʼaē ʼe hoko ki te kau minisi Kilisitiano iā ʼaho nei.
2 ʼE kei tou maʼu pē te ʼu hahaʼi ʼe natou loto moʼoni ke akoʼi age kiā nātou ia te ʼu ala ʼa Sehova. ʼE tou sio ki te faʼahi ʼaia ʼi te lahi ʼo te ʼu tisipulo foʼou ʼaē ʼe papitema ʼi te taʼu fuli. Kapau ʼe kotou loto moʼoni ke kotou fai he ako Tohi-Tapu, koteā ʼaē ʼe feala ke kotou fai?
3 Kotou Fai He Fakatuʼutuʼu: ʼUluaki, kotou fakatuʼutuʼu ke kotou kamata pea mo fai tuʼumaʼu he ako Tohi-Tapu. Kotou taupau te fakatuʼutuʼu ʼaia ʼi tokotou ʼatamai ʼi takotou lolotoga fai fakamafola. Mai tona ʼaluʼaga ʼaē neʼe fakatotonu ki te kau Kilisitiano ke natou fai fakamafola pea mo akoʼi ia te hahaʼi, ko tātou fuli ʼe tonu ke tou faiga ke lahi age te ʼu ako Tohi-Tapu ʼaē ʼe tou fai.—Mat. 24:14; 28:19, 20.
4 Te Tahi ʼu Puani ʼe Tonu Ke Tou Manatuʼi: ʼE tonu ki te ʼu kaugā fai fakamafola ʼo te Puleʼaga ke natou faikole fakamālotoloto. ʼI ʼihi temi, ʼe tou maʼu ni ʼu hahaʼi neʼe natou faikole ke natou maʼu ia he tokoni ʼi te faʼahi fakalaumālie. ʼE ko he meʼa fakafiafia hotatou fakaʼaogaʼi e Sehova moʼo kumi pea mo akoʼi te ʼu hahaʼi ʼaia!—Asea 2:7; Gāue 10:1, 2.
5 Neʼe faikole ia te tuagaʼane ke ina maʼu hana ako Tohi-Tapu, pea ʼi tona fale gāue neʼe ina tufa te ʼu kiʼi pepa lotu ʼaē ʼE Koutou Fia Mahino Lahi Koa Ki Te Tohi-Tapu? ʼI te temi ʼaē neʼe toʼo ai e te fafine tana kiʼi pepa lotu, mo ina lau, pea mo ina kamata tohi te fakamatala ʼaē ʼe ʼātakai ʼi te tuʼa ʼo te kiʼi pepa lotu, neʼe palalau age te tuagaʼane kiā ia pea neʼe feala ai ke ina kamata he ako Tohi-Tapu.
6 Ko te kau fai fakamafola ʼaē ʼe faiva ʼi te kamata ʼo he ʼu ako Tohi-Tapu pea mo hoko atu ia te ʼu ako ʼaia, ʼe feala ke natou tokoni atu kiā koutou, ke kotou fakahoko takotou fakatuʼutuʼu ʼaē ke kotou fai he ako Tohi-Tapu. Kotou faikole ki te ʼAtua ʼo ʼuhiga mo takotou faiga ʼaē ke kotou maʼu he ako Tohi-Tapu, pea kotou fakaʼaogaʼi ia te tokoni fuapē ʼaē ʼe foaki atu moʼo fakahoko ia te fakatuʼutuʼu ʼaia. Lagi mole tuai, pea kotou ʼiloʼi leva ia te fiafia ʼo te fai ʼo he ako Tohi-Tapu.