Te ʼu Fakamanatu ʼo ʼUhiga Mo Te ʼAho Fakamanatu

ʼI te taʼu ʼaenī, ʼe fai anai te ʼAho Fakamanatu ʼi te Moeaki, ʼaho 22 ʼo Malesio. ʼE tonu ke vakaʼi te ʼu faʼahi ʼaenī e te kau tagata ʼāfea:

◼ ʼI takotou fakatuʼutuʼu te hola ʼo te fono, kotou tōkakaga ke feʼaveʼaki te vino pea mo te pane ʼi te kua ʼosi tō ʼo te laʼā.

◼ ʼE tonu anai ke maʼu pea mo teuteuʼi fakatomuʼa te faʼahiga pane pea mo te faʼahiga vino ʼaē ʼe tāu mo te toʼotoʼoga ʼaia.—Vakaʼi Te Tule Leʼo ʼo te ʼaho 15 ʼo Fepualio ʼo te taʼu 2003, ʼi te pāsina 14 mo te 15.

◼ ʼE tonu anai ke fakatokatoka fakatomuʼa te ʼu pā, mo te ʼu ʼipu, mo te laupapa, pea mo te kie fāliki.

◼ ʼE tonu anai ke fakamaʼa fakatomuʼa te Fale ʼo Te Puleʼaga peʼe ko te koga meʼa ʼaē kā fai ai anai te fono.

◼ Ko te hahaʼi fuli, ʼo kau ai mo te tehina ʼaē kā faiakonaki, ʼe tonu ke natou ʼiloʼi peʼe ko te potu fea pea ko te hola fia ʼaē kā fai ai anai te Fakamanatu.

◼ ʼE tonu anai ke filifili fakalelei ia te ʼu tehina ʼaē kā natou feʼaveʼaki te pane mo te vino, pea ke fakahā fakatomuʼa kiā nātou te meʼa ʼaē ʼe tonu ke natou fai, pea ke natou teu maʼa.

◼ ʼE tonu anai ke fai he ʼu fakatuʼutuʼu moʼo ʼave te pane mo te vino ki te kau fakanofo ʼaē neʼe mole natou lava ʼomai ki te fono.

◼ Kapau neʼe fakatuʼutuʼu ke fakaʼaogaʼi te Fale ʼo Te Puleʼaga e he ʼu kōkelekāsio kehekehe, pea ʼe tonu anai ke felōgoi lelei te ʼu kōkelekāsio ʼaia, ʼaua naʼa hahaʼi fau te hūʼaga ki te Fale fono peʼe ko te ʼala, peʼe ko te ʼu taulaga motokā.

◼ Kapau ʼe fai te ʼAho Fakamanatu ʼi he tahi age koga meʼa, pea ʼe tonu anai ke vakaʼi te ʼu fakatagi ke logo lelei te nofoʼaki kātoa ki te tehina faiakonaki.