Tou Haga Fai Fakamafola
1 ʼI ʼihi temi, ʼe lagi tou fakatokagaʼi ʼe gāueʼi tuʼumaʼu totatou telituale kae tokosiʼi ʼe natou tali lelei. Kae, ʼe ʼi ai te ʼu tupuʼaga tāfito ke tou haga fai fakamafola ai.—Mat. 28:19, 20.
2 Ko He Meʼa Fakamoʼoni Ia: Neʼe fakakikite e Sesu ko te fakamafola ʼo te Puleʼaga ʼe ko he koga maʼuhiga anai ʼo te fakaʼiloga ʼo “te fakaʼosi ʼo te tuʼu ʼo te ʼu faʼahiga meʼa ʼaenī” pea “ko he meʼa fakamoʼoni [anai] ia ki te ʼu puleʼaga kātoa.” (Mat. 24:3, 14) Kā sisio mai te hahaʼi ki tatatou fakamafola ia te logo lelei ʼo te Puleʼaga, ʼe tou foaki ai ia he fakamoʼoni ʼe maʼuhiga. ʼI te hili ʼo tatatou mavae mai te koga meʼa ʼaia, ko ʼihi hahaʼi ʼe lagi natou palalau ʼo ʼuhiga mo tatatou ʼolo age ʼo ʼaʼahi lolotoga he ʼu hola peʼe ko he ʼu ʼaho, tatau aipē peʼe mole natou fagono ki te logo. Ko tatatou leleiʼia ia te ʼu tupuʼaga ʼo tatatou minisitelio ʼe tokoni mai kiā tātou ke tou faʼa kātaki. ʼE tou fakafiafia ia Sehova ʼaki tatatou kau ki te fakahoko ʼo te lea fakapolofetā ʼo te Tohi-Tapu ʼaki tatatou foaki ia he fakamoʼoni pea mo tala fakatomuʼa kiā nātou ia te kua ovi mai ʼo te fakaʼauha.—2 Tes. 1:6-9.
3 ʼE ʼAoga Ke Tou Faʼa Kātaki: ʼUhi ko te lahi ʼaupitō ʼo te ʼu fakafiafia pea mo te ʼu meʼa ʼaē ʼe maʼumaʼua fau kiai te hahaʼi, ʼe fakamaʼua mai kiā tātou ke tou faʼa kātaki mokā tou faiga ke lahi age tanatou fia mahino. ʼE ʼi ai te fafine neʼe ʼaʼahi ʼi te vāhaʼa fuli lolotoga he taʼu kātoa ʼi muʼa ʼo tana tali lelei ia te kau Fakamoʼoni ʼi tona ʼapi ki he fai palalau Fakatohi-tapu. Neʼe ina leleiʼia ia te ʼu meʼa ʼaē neʼe logo kiai ʼo ina tali ai ia te ako Tohi-Tapu, ʼo kamata kau ai ki te ʼu fono, pea mole fualoa neʼe ina fakahā ia tona loto ʼaē ke papitema.
4 ʼE fetogi fakavilivili ia te ʼu ʼaluʼaga ʼo te mālamanei, ʼo toe fēia aipē ki te agaaga ʼo te hahaʼi. Tokolahi neʼe natou fakafisi ki tonatou ʼaʼahi ʼi te ʼu temi ki muʼa atu, kae ʼi te temi nei kua natou lotolelei ke natou fakalogo ki te ʼamanaki fakalotofīmālie ʼaē ʼe tou vaevae age kiā nātou. Kapau ʼe ʼi ai he tokotahi pē ʼe ina tali lelei ia te logo ʼo te Puleʼaga, kua fua ia tatatou faʼa kātaki.
5 ʼI te mālamanei kātoa, tokolahi ʼe “[fetāgihi] pea mo lotomamahi ʼo ʼuhiga mo te ʼu meʼa fakalialia fuli ʼaē ʼe hoko.” (Esk. 9:4) Ko te ʼu fua ʼo tatatou fakamafola ia te Puleʼaga, ʼe ko he fakamoʼoni ʼaia ko nātou ʼaē ʼe faitotonu ʼe natou tali lelei ia te logo lelei ʼo te Puleʼaga. (Isa. 2:2, 3) Koia lā ʼaē, ʼe tonu ai ke tou haga fakamafola ai ʼo tou haga faʼa kātaki ʼi te ʼofa ʼo “ ʼave te ʼu logo lelei ʼo he meʼa ʼe lelei age.”—Isa. 52:7; Gāue 5:42.