ʼE Feafeaʼi Anai Hanatou Logo?
1. He koʼē ʼe feala ke faigataʼa ia te fai fakamafola, pea he koʼē ʼe tonu ke tou toe hoko atu pē?
1 ʼI te kua ovi mai ʼo te ʼaho ʼo Sehova, kua maʼuhiga ʼaupitō ʼi te temi nei ke tou tokoni ki te hahaʼi ke natou maʼu ia he ʼatamai mālama ʼo ʼuhiga mo te ʼAtua pea mo tana ʼu fakatuʼutuʼu ʼaē ki te mālamanei. (Soa. 17:3; 2 Pet. 3:9, 10) ʼE lagi ʼi ʼihi temi ʼe faigataʼa, koteʼuhi tokolahi ʼe mole natou tali peʼe lagi fakalainoaʼi tātou ʼuhi ko tatatou fai fakamafola. (2 Pet. 3:3, 4) Kae ʼe tou tui papau ʼe kei ʼi ai pē ia nātou ʼaē ʼi tatatou telituale ʼe natou tali anai ia te logo lelei mokā ʼe fakahā age kiā nātou. ʼE feafeaʼi anai kiā nātou ʼaia hanatou logo mo kapau ʼe mole he tahi ʼe fai fakamafola?—Loma 10:14, 15.
2. ʼE fakalotomālohiʼi feafeaʼi tātou ʼaki te faʼifaʼitaki ʼa te ʼapositolo ko Paulo?
2 ʼI Te Temi Fakafeagai: Mai tona ʼaluʼaga ʼaē ʼe kei ʼi ai te tokolahi ʼe natou fia logo anai ki te logo lelei ʼo te Puleʼaga, koia ʼe mole tonu ai ke tou tuku ia tatatou gāue fai fakamafola. Ko te kolo ko Filipe neʼe ko te ʼuluaki kolo ʼaia ʼo te Eulopa neʼe logo ki te fai fakamafola ʼa Paulo ʼo ʼuhiga mo te logo lelei. ʼI te temi ʼaē neʼe fai ai ia te ʼu fasituʼu kiā Paulo pea mo Silasi, neʼe tā nāua mo te ʼu koga ʼakau pea mo pilisoniʼi nāua. (Gāue 16:16-24) Kae ko te ʼaluʼaga fakalotomamahi ʼaia neʼe mole tupu ai he tuku e Paulo ia tana fai fakamafola ʼuhi he neʼe mataku. ʼI te temi ʼaē neʼe ʼalu ai ki Tesalonika, te lua kolo ʼaē neʼe fai kiai tana gāue fakamisionea, neʼe “lototoʼa [ia] ʼuhi ko te ʼAtua.” (1 Tes. 2:2) ʼE fakahā lelei mai ʼi te faʼifaʼitaki ʼa Paulo, ʼe mole he takuʼaki ke tou ‘fiu’ ai ʼi tatatou fai fakamafola.—Kal. 6:9.
3. Koteā ʼaē ʼe feala ai ke fetogi ia te manatu ʼa niʼihi ʼaē ki muʼa atu neʼe mole natou tali ia te logo lelei?
3 Tokolahi ia nātou ʼaē neʼe mole natou tali ia te logo lolotoga ni ʼu taʼu, kua natou fetogi ʼo ʼuhiga mo te logo lelei. Neʼe tupu ia te faʼahi ʼaia, ʼuhi he neʼe hoko kiā nātou ia he ʼu fihifihia fakaekonomika, ia te mahaki, peʼe ko he mate ʼo he tahi ʼi tonatou fāmili. (1 Ko. 7:31) Ko ʼihi ʼaē ko tanatou ʼu mātuʼa neʼe mole natou tali ia te moʼoni, ʼi te temi nei kua natou lalahi pea kua natou tali leva ia te logo lelei. ʼAki tatatou haga fai fakamafola aipē, ʼe ko he faigamālie ki te ʼu faʼahiga hahaʼi ʼaia ke natou “fetapa ki te huafa ʼo Sehova” naʼa tauhala.—Loma 10:13.
4. Koteā ʼaē ʼe ina uga tātou ke tou fai “tuʼumaʼu pē” ia tatatou minisitelio?
4 “Tuʼumaʼu Pē”: Ko totatou ʼofa ʼaē ki te ʼAtua pea mo totatou kāiga, ʼe ina uga anai tātou ke tou fai “tuʼumaʼu pē” ia tatatou fai fakamafola pea mo te fai ʼo ni ʼu tisipulo, ohagē ko tona fai e te kau ʼapositolo ʼi te ʼuluaki sēkulō. (Gāue 5:42) Tokolahi iā ʼaho nei, ʼe natou “toʼetoʼe pea mo lotomamahi ʼo ʼuhiga mo te ʼu meʼa fakalialia fuli” ʼaē ʼe hoko nei ʼi te mālamanei. (Esk. 9:4) ʼE ko he ʼamanaki pea mo he falalaʼaga ʼe maʼu e te ʼu hahaʼi ʼaia mokā natou logo ki te logo lelei! Tatau aipē mokā ʼe tokolahi ia nātou ʼaē ʼe mole natou tali ia te logo lelei, kae ʼe tou tui papau ʼaki te Tohi-Tapu, ko Sehova ʼe fiafia ʼi tatatou ʼu faiga.—Hep. 13:15, 16.