ʼE Feala Ke Kotou Liliu Ko He Kau Faiako!
1. Koteā ia te pilivilēsio ʼe maʼu e te kau fai fakamafola fuli ʼo te Puleʼaga?
1 Ko te tahi faʼahi ʼo te minisitelio ʼaē ʼe fakafiafia lahi ai, ʼe ko te akoʼi ki he tahi ia te moʼoni. Ko tatatou sio ʼaē ki tana tali ia te logo ʼo te Puleʼaga pea mo tokoni kiā ia ke fakaovi ki te Tuʼi ʼo te ʼatulaulau, ʼe ko he ʼaluʼaga ʼe tonu ke maʼuhiga kiā tātou. (Sake 4:8) ʼE tonu ke fakatuʼutuʼu e te kau fai fakamafola fuli ʼo te Puleʼaga ke natou akoʼi he tahi ʼe fia logo ki te moʼoni pea mo sio ki tana kamata fai he ʼu fetogi maʼuhiga ʼi tona ʼulugaaga, mo tana ʼu manatu, pea mo tana aga.—Mat. 28:19, 20.
2. He koʼē ʼe lagi mole fia fai e ʼihi he ako Tohi-Tapu, pea koteā ʼaē kā tokoni anai kiā nātou ke natou tauʼi ia te faigataʼaʼia ʼaia?
2 Tou Falala Kiā Sehova: ʼI te temi muʼa, ko te ʼu kaugana agatonu neʼe natou lotolotolua ʼo ʼuhiga mo tanatou lava fakahoko ia te gāue ʼaē neʼe foaki age. ʼI tanatou falala ʼaē kiā Sehova ʼAtua, neʼe feala ai kiā Moisese, mo Selemia, mo Amosi, pea mo ʼihi atu hahaʼi ʼe mole ʼaliki ke natou tauʼi tanatou ʼu lotolotolua peʼe ko tanatou mole falala, kae natou fakahoko ia te gāue maʼuhiga ʼaē neʼe tonu ke natou fai. (Eke. 4:10-12; Sel. 1:6, 7; Amosi 7:14, 15) Mo te ʼapositolo foki ko Paulo neʼe ina “maʼu ia te lototoʼa.” Neʼe ina maʼu feafeaʼi? Neʼe ina ʼui “ ʼuhi ko tomatou ʼAtua.” (1 Tes. 2:2) ʼEī ko tātou fuli, ʼe feala ke tou falala kiā Sehova ʼe tokoni mai anai, ʼe ina foaki mai anai ia te poto, pea mo te mālohi ʼaē ʼe ʼaoga ke tou fai ai he ʼu ako Tohi-Tapu ʼe tuputupu.—Isa. 41:10; 1 Ko. 1:26, 27; 1 Pet. 4:11.
3, 4. Koteā te ako kua fakatuʼu moʼo tokoni mai ke tou akoʼi ki te hahaʼi ia te Folafola ʼa te ʼAtua?
3 Tou Tali Ke Akoʼi Tātou: Ko totatou Faiako Lahi, ia Sehova ʼAtua, ʼe ina akoʼi tātou ʼaki ia te polokalama ako fakalaumālie ʼe fai tuʼumaʼu, ke tou liliu ai ko he kau faiako ʼe kātoa. (Isa. 54:13; 2 Tim. 3:16, 17) Kotou tali ia te ako ʼaia, ʼo kotou fakaʼaogaʼi ia te ʼu faigamālie moʼo fakatuputupu ia takotou mahino ʼaē ki te Tohi-Tapu pea mo hikihiki tokotou popoto ʼi te akoʼi ki he tahi ia te ʼu moʼoni ʼo te Tohi-Tapu. ʼE ko te fakatuʼutuʼu tāfito ʼaia ʼo te Ako Fakateokalatike pea mo te Fono Gāue, kae ʼe akoʼi tātou ʼi te ʼu fono fuli ke tou akoʼi ki te hahaʼi ia te Folafola ʼa te ʼAtua.
4 Kotou faiga ke kotou ako he ʼu faʼahiga fai ʼe faigafua moʼo akoʼi ia te ʼu moʼoni loloto fakalaumālie. ʼE fakamahino fēnei ʼi te tohi École du ministère, ʼi te pāsina 227: “Ke feala hakotou fakamahino he manatu ki he tahi, ʼe tonu muʼa ke kotou mahino lelei ia koutou totonu ki te manatu ʼaia.” Ko te fai ʼo he ʼu tali ʼe tokoni mai ke tou tāʼofi ia he ʼu manatu tāfito ke tou fakaʼaogaʼi ki muli age. Koia kotou teuteu lelei, pea ʼe tuputupu anai takotou falala ʼaē ʼe feala ke kotou akoʼi he tahi.
5. Koteā ia te tahi ako ʼe tou maʼu ʼi te kōkelekāsio moʼo tokoni mai ke tou liliu ko he kau faiako ʼe lelei age?
5 ʼE mahino ia, ʼi te kamata fai fakamafola ʼa te kau minisi Kilisitiano, neʼe natou feakoako iā nātou ʼi tanatou kaugā gāue fakatahi ʼo fai he ʼu tisipulo. (Luka 10:1) Kapau ʼe feala, kotou kaugā ʼolo mo he kau fai fakamafola kua māhani, ohagē ko te kau pioniē, te ʼu tagata ʼāfea, pea mo te ʼu tehina taupau feʼoloʼaki, ʼi te gāue ʼaē ko te fai ʼo he ʼu ako Tohi-Tapu. Kotou tokagaʼi tanatou fakaʼaogaʼi ia te ʼu pāki pea mo te tahi atu ʼu faʼahi ʼi tatatou ʼu tohi ako, moʼo fakamahino ia te ʼu moʼoni Fakatohi-tapu. Kotou kole age kiā nātou he ʼu tokoni ke kotou liliu ai ko he faiako ʼe lelei age. (Taag. 1:5; 27:17) Kotou loto fakafetaʼi ki te ako ʼaia ʼe haʼu mai tokotou ʼu tehina mo tuagaʼane, heʼe ʼi tona fakahagatonu ʼe ko te akoʼi ʼaia ʼo koutou e te ʼAtua.—2 Ko. 3:5.
6. Koteā ʼaē ʼe tonu tāfito ke fai e he tahi ke liliu ai ko he faiako ʼo te Folafola ʼa te ʼAtua?
6 Kotou falala kiā Sehova, pea mo kotou maʼu ia te ʼu fua lelei ʼo tana akoʼi koutou. Kotou fakahā ʼi takotou ʼu faikole ia takotou fia tuputupu ʼi te faʼahi fakalaumālie. (Pes. 25:4, 5) Mo koutou foki ʼe feala ke kotou logoʼi ia te fiafia ʼi te tokoni ki he tahi ke liliu ohagē ko koutou, ko he faiako ʼo te Folafola ʼa te ʼAtua!