Ko He ʼAho Makehe Moʼo Fai ʼo He ʼu Ako Tohi-Tapu
1 ʼO kamata atu ʼi te māhina ʼo Sānualio, ʼe filifili anai e te kōkelekāsio takitahi ia he fakaʼosi vāhaʼa ʼi te māhina fuli, peʼe ko te ʼuluaki fakaʼosi vāhaʼa ʼo te māhina ke natou fakatuʼutuʼu tāfito ai ki te fai ʼo te ʼu ako Tohi-Tapu. Ko te faʼahi ʼaia ʼe fai anai ʼi te Moeaki peʼe ko te ʼAhotapu, ʼo mulimuli pē ki te ʼaluʼaga ʼo te telituale. ʼI te ʼaho ʼaia, kapau ʼe mole tali e he tahi ke fai ia hana ako, kae ʼe feala pē anai ke tuku age e te kau fai fakamafola ia te tohi Te Ako Mai Te Tohi-Tapu peʼe ko te ʼu nusipepa fakamuli. ʼE tonu anai ki te kau tagata ʼāfea pea mo te kau faifekau fakaminisitelio fuli ke natou fakatuʼutuʼu ke natou lagolago mālohi ki te gāue ʼaia pea mo kau fakatahi mo te kau fai fakamafola ki te kamata ʼo he ʼu ako Tohi-Tapu.
2 ʼE tonu anai ke fakatuʼutuʼu e te Komitē Gāue ʼo Te Kōkelekāsio peʼe ko te ʼaho fea ʼo te fakaʼosi vāhaʼa ʼaē kā ʼāteaina aipē anai ki te fai ʼo te ʼu ako Tohi-Tapu. ʼI ʼihi temi, ʼe tonu anai ke fai he ʼu fakamanatu ke feala ai ki te kau fai fakamafola hanatou teuteu pea mo fakahoko ia he ʼu faiga makehe ki te fai ʼo he ʼu ako Tohi-Tapu ʼi te ʼu ʼapi pea mo ʼaʼahi ia nātou ʼaē neʼe fia logo.
3 ʼE Feafeaʼi Hatatou Teuteu: ʼE feala ke tou maʼu ia he ʼu manatu moʼo kamata ʼaki he ʼu ako Tohi-Tapu, ʼi te pepa neʼe tufa fakatahi mo Te Minisitelio ʼo Te Puleʼaga ʼo Sānualio 2006 pea mo te pāsina 12 ʼo te tohi Comment raisonner. Ko ʼihi ʼe lagi natou fakatuʼutuʼu ke natou fakaʼaogaʼi ia te kiʼi pepa lotu ʼE Kotou Fia ʼIloʼi Koa Te Moʼoni? Tahi ʼaē meʼa, ʼi te pāsina 3 ʼo Te Minisitelio ʼo Te Puleʼaga ʼo ʼAukusitō 2007, ʼe foaki mai ai ia te ʼu manatu moʼo kamata ʼaki ia he ʼu ako Tohi-Tapu mokā tou toe liliu ʼo ʼaʼahi ia nātou ʼaē neʼe natou tali ia te ʼu nusipepa. ʼE tonu anai ke fakatuʼutuʼu e te kau tagata ʼāfea pea mo te kau faifekau fakaminisitelio ke natou fai ia te fono gāue fai fakamafola iā minuta e 10 peʼe 15, lolotoga te fono gāue fai fakamafola ʼaia ʼe tonu anai ke fakahā ia he manatu ʼaoga e tahi peʼe lua ʼo ʼuhiga mo te kamata ʼo he ʼu ako Tohi-Tapu peʼe fai he faʼifaʼitaki.
4 ʼE mahino ia, ʼe mole tali anai e te hahaʼi fuli ia he ako Tohi-Tapu peʼe ke hoko atu ia tanatou ako ʼi he temi loaloaga. ʼE mole ko he faʼahi ʼaia ke tou holomuli ai, koteʼuhi ko Sehova ʼaē ʼe ina taki mai ki tana kautahi ia nātou ʼaē ʼe hagē ko ni ʼu ovi. (Soa. 6:44) Ko totatou maʼua ʼe mole gata ʼaki pē tatatou tō ia te pulapula ʼo te moʼoni, kae ʼe toe ʼaoga foki ke tou gāueʼi pea mo fakapala ia nātou ʼaē kua tauaka, ʼo kau kiai ia te ako ʼo te Tohi-Tapu pea mo te hahaʼi ʼaē ʼe natou lotolelei ke natou ako ʼo ʼuhiga mo Sehova. ʼI tatatou ako pea mo nātou, ʼe tou fakaʼaogaʼi ai ia te pilivilēsio ʼaē ke tou kaugā gāue mo te ʼAtua.—1 Ko. 3:9.