Te Tali Ki ʼAkotou ʼu Fehuʼi

◼ ʼE lelei koa ki te ʼu kōkelekāsio peʼe ki te hahaʼi hanatou fakaʼaogaʼi ia te ʼu kiʼi fakaʼiloga ʼa te kau Fakamoʼoni ʼa Sehova, ohagē lā ko te ʼu pāki ʼaē ʼe tuʼu ʼi te ʼu tohi ʼe momoli ki te ʼu kōkelekāsio?

Ko te fakaʼiloga ʼaia, ʼe ko he higoa peʼe ko he pāki ke ʼiloʼi gafua ai he sōsiete. Ko te pāki ʼaē ʼo te Tule, ʼe ina fakafofoga ia te Watch Tower Bible and Tract Society of Pennsylvania pea mo ʼihi fale gāue ʼo te kautahi. Ko te ʼu ʼasosiasio ʼaē ʼe natou fakafofoga ia te filiale, mokā natou faitohi ki te ʼu kōkelekāsio, ʼe tuʼu ʼi te kamataʼaga ʼo te ʼu tohi ʼaia ia te pāki ʼo te Tohi-Tapu ʼe tuʼu ava. Ko ʼihi fale gāue ʼa te kau Fakamoʼoni ʼa Sehova ʼe natou fakaʼaogaʼi te tahi age ʼu pāki.

ʼE mole tonu ki te ʼu kōkelekāsio peʼe ko te hahaʼi ke natou fakaʼaogaʼi ia te ʼu pāki ʼaia peʼe ko te ʼu higoa ʼo te ʼu fale gāue ʼa te kautahi, peʼe ko he pāki ʼe tatau mo te ʼu pāki ʼaia ʼi tonatou ʼu Fale ʼo Te Puleʼaga moʼo fakaʼiloga ʼaki tonatou Fale fono, mo te ʼu tohi ʼaē ʼe natou fai, mo hanatou ʼu meʼa ʼa nātou totonu pē, pea mo ʼihi age pē ʼu meʼa. Ko tona taʼi faʼahiga fakaʼaogaʼi ʼaia, ʼe feala ai ke mole kei ʼiloʼi lelei e te hahaʼi ʼo te puleʼaga ʼo te fenua, mo te hahaʼi tā tohi, pea mo ʼihi age ia te pikipikiga ʼo te kōkelekāsio mo te ʼu fale gāue ʼo te kautahi. ʼE toe feala ai ke mole ʼiloʼi papau, peʼe ko te ʼu tohi neʼe momoli mai e te kolesi pule peʼe ko te filiale.

Ko te pāki ʼo te Tule peʼe ko hona tahi age fakaʼiloga, ʼe mole tonu ke fakaʼaogaʼi ki te ʼu Fale ʼo Te Puleʼaga ʼaē kā laga, tatau aipē peʼe ko te Sōsiete Watch Tower ʼaē ʼe pule ki te ʼu Fale fono. Ko te ʼu kōkelekāsio ʼaē ʼe tohi ʼi tonatou ʼu Fale ʼo Te Puleʼaga ia te fakaʼiloga ʼaia, ʼe mole heʼeki fakamaʼua kiā nātou ke natou molehi te pāki ʼaia, heʼe lahi anai ia te ʼu fetogi ʼaē ke fai kiai, pea ʼe toe fakamaʼua kiai he temi loaloaga, mo he gāue pea mo hona totogi. Kae kapau ʼe ko he kihiʼi fetogi pē ʼaē ʼe tonu ke fai kiai pea ʼe mole fakamaʼua kiai he toe gāue lahi, pea ʼe tonu ke fetogi. Kapau koia, pea ʼe feala ke fai te faʼahi ʼaia mokā ʼe fakatuʼutuʼu ke toe gaohi ia te fale fono peʼe ko te pāki ʼo te kōkelekāsio.