ʼE Kotou Tali Feafeaʼi Anai?
1. He koʼē ʼe tonu ke tou muliʼi ia te faʼifaʼitaki ʼa Sesu mokā fai mai he fehuʼi?
1 ʼO aʼu mai ki te temi nei, ʼe ʼofolele te hahaʼi ki te poto tali ʼa Sesu ki te ʼu fehuʼi ʼaē neʼe fai age. Kā fai mai he ʼu fehuʼi kiā tātou ʼi tatatou minisitelio, ʼe lelei ke tou muliʼi ia te faʼifaʼitaki ʼa Sesu ʼo ʼuhiga mo te faʼahi ʼaia.—1 Pet. 2:21.
2. Koteā ʼaē ʼe feala ke tokoni mai ke tou fai he tali ʼe lelei ki he fehuʼi?
2 Tou Fakalogo Muʼa: Neʼe tokagaʼi muʼa e Sesu ia te manatu ʼa ia ʼaē ʼe faifehuʼi. ʼI ʼihi temi ʼe lagi tonu ke tou fai he ʼu fehuʼi ke tou ʼiloʼi papau ai pe koteā ia tana manatu. Ko he tahi ʼe ina fehuʼi atu fēnei: “ ʼE kotou tui koa kiā Sesu?” ʼe lagi ina fia ʼiloʼi pe koʼē ʼe mole tou fai ia te Pō Tapu. Kapau ʼe kotou mahino ki te manatu ʼaē ʼe fia ʼiloʼi moʼoni ʼe ia ʼaē ʼe fai fehuʼi atu, pea ʼe feala ke lelei age takotou fakamahino pea mo ia te manatu ʼaia.—Luka 10:25-37.
3. Koteā ʼaē ʼe tou maʼu moʼo tokoni mai ke tou foaki he ʼu tali lelei Fakatohi-tapu?
3 Tou Tali ʼAki Te Folafola ʼa Te ʼAtua: ʼI te agamāhani ʼe lelei age ke tou tali ʼaki te Tohi-Tapu ki he fehuʼi ʼe fai mai. (2 Tim. 3:16, 17; Hep. 4:12) Ko te tohi Comment raisonner pea mo te kiʼi kaupepa “Te ʼu Fai Palalau Faka Tohi-Tapu,” neʼe ʼaoga ʼaupitō moʼo fai ia he ʼu tali ʼe lelei. Tatau aipē peʼe ko ia ʼaē ʼe faifehuʼi ʼe mole fakamoʼoni ki te Tohi-Tapu, kae ʼaki he aga fakaʼeteʼete ʼe feala ke kotou fakahā ia te manatu ʼa te Tohi-Tapu. Fakalotomālohiʼi ia ia ʼaē ʼe faifehuʼi ke ina fakakaukauʼi lelei ia te poto ʼaē ʼe maʼu ʼi te Tohi-Tapu ʼaē neʼe kua fakamoʼoni ki tona totonu. Kā kotou faʼifaʼitakiʼi Sesu, ko takotou ʼu tali ‘ ʼe hagē anai ko he ʼu foʼi ʼapo ʼaulo ʼi he pā siliva neʼe togi’—ʼe fakaʼapaʼapa, ʼe lelei, pea mo maʼuhiga.—Taag. 25:11.
4. Ko te ʼu temi fea ʼaē ʼe lelei age ai ke mole tou tali ki he ʼu fehuʼi?
4 ʼE Tonu Koa Ke Tou Tali Ki Te ʼu Fehuʼi Fuli? Kapau ʼe mole kotou ʼiloʼi he tali ki he fehuʼi, ʼaua naʼa kotou ufiufi ʼi te ʼui age: “ ʼE mole au ʼiloʼi, kae ʼe feala ke au ʼalu ʼo fai he ʼu kumi ki tau fehuʼi pea ʼe au toe liliu mai anai mo tona tali.” Ko te taʼi agavaivai ʼaia pea mo te taʼi tokaga ʼaia ʼe kotou fakahā, ʼe feala ai ke ina tali ke kotou toe liliu age. Kapau ʼe kotou fakatokagaʼi ko he fehuʼi ʼe fai e he ʼu fili, ʼo natou faiga ke natou fakafihiʼi koutou, kotou muliʼi ia te faʼifaʼitaki ʼa Sesu, ʼo kotou tali fakanounou age pē. (Luka 20:1-8) ʼO toe fēia pē, kapau ko he tahi ʼe mole fia logo fakamālotoloto ki te moʼoni pea ʼe faiga ke koulua fihi ki he akonaki, ʼaki he aga fakaʼapaʼapa kotou fakagata te fai palalau pea kotou fakaʼaogaʼi tokotou temi moʼo kumi ia nātou ʼaē ʼe natou loto moʼoni ki te logo.—Mat. 7:6.
5. Koteā te faʼifaʼitaki neʼe tuku mai e Sesu moʼo tali ki he ʼu fehuʼi?
5 Neʼe mahino kiā Sesu ko te falala ʼaē kiā Sehova neʼe maʼuhiga moʼo fakahoko ia tana gāue ʼaē ko te “fakamoʼoni ki te moʼoni,” ʼaē ko te tali ki he ʼu fehuʼi ʼe fai e te hahaʼi ʼaē ʼe natou loto moʼoni ki hona tali. (Soa. 18:37) ʼE ko he pilivilēsio ʼe tou maʼu ʼi tatatou muliʼi ia te faʼifaʼitaki ʼa Sesu, ʼo tou tali kiā nātou ʼaē ʼe natou “lotolelei ki te maʼuli heʼegata”!—Gāue 13:48.