Kotou ‘Fakaʼaogaʼi Kātoa Tokotou Nefesi’ Moʼo Tokoni Ki Takotou Kau Ako
1. Koteā ʼaē ʼe tonu ke tou fai moʼo tokoni ki he tahi ʼe ina ako ia te Tohi-Tapu?
1 Moʼo tokoni ki he tahi ʼe ako ia te Tohi-Tapu ke liliu ʼo foaki ia tona maʼuli kiā Sehova, ʼe mole gata ʼaki pē tatatou fai tuʼumaʼu ia te ako Tohi-Tapu mo ia. Neʼe fakatatau e te ʼapositolo ko Paulo ia tana ʼu felōgoi mo te hahaʼi ʼaē neʼe ina akoʼi, ki he faʼē ʼe tokaga fakalelei ki tana fānau. Mo tātou foki ʼe tou leleiʼia tatatou ‘fakaʼaogaʼi kātoa ia totatou nefesi,’ peʼe ko totatou temi, pea mo tou faiga ʼaki he loto kātoa ke tou tokoni ki tatatou kau ako ke natou tuputupu ʼi te faʼahi fakalaumālie.—1 Tes. 2:7-9.
2. He koʼē ʼe tonu ke tou tokaga fakalelei kiā ia ʼaē ʼe ako, pea koteā ʼaē ʼe feala ke tou fai?
2 Kotou Tōkakaga Fakalelei Kiā Nātou: Kā maʼuliʼi e he tahi ia te ʼu meʼa ʼaē ʼe ina ako, pea ko tona leʼo loto ʼe ina uga anai ia ia ke ina fakagata tana fakakaugā ʼaē kiā nātou ʼe mole mulimuli ki te ʼu pelesepeto ʼo te Tohi-Tapu. (1 Pet. 4:4) Kua lagi liʼaki ia ia e tona fāmili. (Mat. 10:34-36) ʼE tou lava tokoni ki ai ke mole ina logoʼi ia tona kua liʼakina ʼaia, ʼo tou tokaga fakalelei kiā ia ʼaki te ʼofa. ʼE tokoni fēnei te tehina kua misionea talu mai fualoa: “ ʼAua naʼa kotou foimo mavae ʼi te ʼosi fai ʼo te ako. Kapau ʼe feala, kotou nonofo muʼa ʼo fai palalau mo ia ʼi he kiʼi temi.” Kotou tōkakaga ʼo foaki kiā ia ʼaē ʼe ako mo koutou, ia he tokoni ʼe ʼaoga. Ohagē lā, ʼe feala koa hakotou telefoni ki ai peʼe ʼaʼahi ia ia mokā ʼe mahaki? ʼE kotou lava heheka fakatahi koa mo ia ʼi te ʼu fono, pea mo tokoni ki tana fānau, mokā ko he meʼa ʼe feala hona fai?
3. ʼE tou lava tokoni feafeaʼi ia ia ʼaē ʼe ako ke ina maʼu he fakalotomālohi mai te kōkelekāsio?
3 Te Tokoni ʼa Te Kōkelekāsio: Kapau ʼe kotou fai fakamafola ovi ki te ʼapi ʼo ia ʼaē ʼe ako mo koutou, he koʼē ʼe mole kotou ʼaʼahi ia ia pea mo fakahā age te tehina peʼe ko te tuagaʼane ʼaē ʼe kaugā gāue mo koutou? Kā feala, fakaafe ʼi ʼihi temi he ʼu kaugā fagona kehekehe, ʼo kau kiai te kau tagata ʼāfea, ke natou kaugā ʼolo mo koutou ki te ako. Pea ʼi te temi ʼaē kua kotou fai tuʼumaʼu ai leva te ako, kotou foimo fakalotomālohiʼi ia ia, ke kau ki te ʼu fono ʼo te Fale ʼo Te Puleʼaga. ʼE feala anai ke ina maʼu he ʼu kaumeʼa fakalotomālohi ʼi te kōkelekāsio, ʼaē kā liliu ko tona fāmili fakalaumālie.—Mko. 10:29, 30; Hep. 10:24, 25.
4. ʼE lava fakapale feafeaʼi tatatou faʼa gāue?
4 Ko he tamai peʼe ko he faʼē ʼe mole fiu ʼi te tokoni ki tana fānau ʼi te faʼahi fakalaumālie, ʼe fiafia ʼaupitō anai mokā filifili e tana fānau ke natou kaugana kiā Sehova pea mo haʼele ʼi te moʼoni. (3 Soa. 4) ʼE feala ke tou toe maʼu mo tātou ia te taʼi fiafia ʼaia, mokā tou fakaʼaogaʼi kātoa ia totatou nefesi moʼo tokoni ki tatatou kau ako Tohi-Tapu.