Te Tali Ki ʼAkotou ʼu Fehuʼi

◼ ʼE tonu koa ke fefoakiʼaki e te kau Fakamoʼoni ʼa Sehova ia te ʼu akonaki ʼaē neʼe natou puke pe neʼe natou tohi?

ʼE tou lotomālohi ʼaki ia te ʼu akonaki Fakatohi-tapu. (Gāue 15:32) Koia lā ʼaē ʼe tou fia vaevae ai he ʼu manatu fakalotomālohi mo nātou ʼaē neʼe mole kau ʼi te fono. ʼAki te ʼu faʼahiga masini puke leʼo foʼou, ʼe faigafua ia te puke ʼo he akonaki pea mo foaki ki ʼihi. Ko ʼihi neʼe natou tānaki te ʼu tuʼuga akonaki neʼe puke, ʼo kau kiai te ʼu akonaki ʼaē neʼe fai ʼi ni ʼu taʼu kua hili atu, pea ʼaki he manatu ʼe lelei ʼe natou foaki ia te ʼu akonaki ʼaia peʼe natou puke maʼa tonatou ʼu kaumeʼa. Ko ʼihi neʼe natou ʼolo ki te Neti pea natou ʼai kiai te ʼu akonaki ke feala ki he tahi pē ʼe loto kiai ke ina puke mai ai.

ʼE mahino ia ʼe mole kovi mo kapau ʼe tou puke he ʼu akonaki maʼa tātou peʼe maʼa totatou fāmili. Tahi ʼaē meʼa, ʼe feala ke fakatuʼutuʼu e te ʼu tagata ʼāfea ke puke he ʼu akonaki maʼa nātou ʼo te kōkelekāsio ʼaē ʼe māhahaki, ʼaē ʼe mole feala ke natou kau ki te ʼu fono. Kae ʼe ʼi ai te ʼu tupuʼaga lelei kiā tātou ke ʼaua naʼa tou fefoakiʼaki he ʼu akonaki neʼe tou puke pe neʼe tou tohi.

Mai tona ʼaluʼaga ʼaē ʼi te agamāhani ʼe fai he ʼu akonaki ʼo mulimuli ki te ʼu meʼa ʼaē ʼe ʼaoga ki te telituale pea mo te kōkelekāsio, ʼe faigafua pē hatatou mahino hala ki te ʼu manatu ʼaē neʼe puke, heʼe mole tou mahino ki te ʼu tupuʼaga ʼaē neʼe fai ai te akonaki. Tahi ʼaē meʼa, ʼe faigataʼa anai kiā tātou hatatou vakavakaʼi pe ko ai ʼaē neʼe ina fai ia te akonaki pea ʼi te temi fea, ke feala ai hatatou falala ʼe mulimuli te ʼu manatu ki te ʼu fakamahino foʼou pea ʼe totonu. (Luka 1:1-4) Pea ko te ʼu akonaki ʼaē ʼe feʼāveʼaki neʼe tohi pe neʼe tou puke, ʼe feala pē anai ke fakamaʼuhigaʼi fau ʼihi kae mole tuha mo te faʼahi ʼaia.—1 Ko. 3:5-7.

Ko te tagata kaugana agatonu mo poto ʼe gāue kinakina moʼo foaki mai ia te meʼa kai fakalaumālie, te “vaega” kua fakafuafua lelei pē pea “ ʼi tona temi totonu.” (Luka 12:42) ʼE kau kiai ia te fakatuʼutuʼu ʼaē ke fai he ʼu akonaki ʼi te ʼu kōkelekāsio ʼa te kau Fakamoʼoni ʼa Sehova pea mo he ʼu ʼalatike neʼe puke ʼe feala ke kotou toʼo ʼi te Neti, ʼi te tuʼasila ʼa te kau Fakamoʼoni ʼa Sehova, ʼaē ko te jw.org. ʼE feala ke tou falala ko te tagata kaugana agatonu mo poto pea mo tona Kolesi Pule ʼe natou foaki anai te ʼu meʼa ʼaē ʼe ʼaoga kiā tātou ke liliu ai tatatou tui ʼo mālohi.—Gāue 16:4, 5.