ʼE Feafeaʼi Hatatou Fakaʼaogaʼi Te ʼu Lautohi ʼAe Neʼe Puke
1. ʼO hilifaki ki te ʼu tohi ʼae kua tou maʼu, kotea ia te tahi faʼahi ʼe tou toe maʼu?
1 Tokolahi ʼe natou fiafia ʼi te lau ʼi tatatou tuʼasila ʼi te Neti jw.org ia te ʼu folafola ʼo te moʼoni. (Ekl. 12:12) Kaʼe, kua kotou fakaʼaogaʼi koa ia te ʼu lautohi ʼae neʼe puke? ʼAki te ʼu faʼahi ʼaia, ʼe feala ke tou fakalogo he ʼu lautohi ʼi tatatou tuʼasila ʼi te Neti. Kotea te ʼu lelei ʼe tou maʼu mai te ʼu lautohi ʼae neʼe puke?
2. ʼE tou lava fakaʼaogaʼi feafeaʼi te ʼu lautohi ʼae neʼe puke ʼi tatatou ako takitokotahi peʼe fakafamili?
2 Ki Tatatou Ako Takitokotahi Peʼe Fakafamili: Tou fakalogo te ʼu lautohi ʼae neʼe puke moka tou faifolau peʼe ka tou fai te ʼu gaue ʼo te ʼaho fuli. Ohage la ko te Tohi-Tapu, mo te ʼu nusipepa, peʼe ko te ʼu tohi. Koteʼuhi ʼe feala ke tokoni kia tatou ke tou fakaʼaogaʼi lelei totatou temi. (Efe. 5:15, 16) ʼE feala ke tou toe fakaʼaogaʼi ia te ʼu lautohi ʼae neʼe puke ʼi tatatou ako fakafamili. Tou fakalogo pea mo muliʼi ʼi ʼatatou tohi. ʼE tokoni mai anai te ʼu lautohi ʼae neʼe puke ʼi tatatou ako takitokotahi. Koteʼuhi ʼe lagi tou fia hikihiki tatatou lautohi peʼe ke tou ako he lea.
3. ʼI totatou telituale, ko ai ʼae ʼe ʼaoga ki ai te ʼu lautohi ʼae neʼe puke?
3 Ki Te Faifakamafola: Ko te hahaʼi ʼo totatou telituale ʼe mole natou maʼu honatou temi ke natou lau ai ʼatatou tohi. Kaʼe, ʼe natou lotolelei ke natou fakalogo ki te ʼu lautohi ʼae neʼe puke. Pea ʼe feala ke tou felaveʼi mo he hahaʼi ʼe palalau ʼi he tahi age lea pea ʼe natou fia fakalogo ki te logo ʼo te Puleʼaga ʼi tanatou “lea totonu.” (Gaue 2:6-8) ʼI ʼihi fenua, ko tanatou agamahani ko te faifakamatala. Ohage la ko Uvea mo Futuna, neʼe ko te agamahani ʼa te hahaʼi ko te fakamatala tonatou hisitolia ki te taʼiake ki muli mai ʼaki pe ʼanatou palalau. Pea neʼe natou lava fakamaʼumaʼu te ʼu fakamatala ʼaia. Neʼe natou leleiʼia te akoʼi ʼo natou ʼaki he ʼu fakamatala.
4. Kotea te ʼu fehuʼi ʼe feala ke tou fai kia tatou totonu?
4 ʼI tokotou telituale, ʼe kotou fakahaʼele koa ia he lautohi neʼe puke ki he tahi ʼe palalau ʼi tana lea? Ka tou momoli ki he tahi ʼi te Neti ia he lautohi ʼo he tohi neʼe puke, ʼe feala koa ke ina maʼu? ʼE feala koa ke tou fakatoʼo age ki he tahi neʼe fia logo ia he CD neʼe puke ki ai he lautohi pea mo te tohi ʼae ʼe alu tahi mo ia? Ko te ʼu tohi, mo te ʼu kaupepa, mo te ʼu nusipepa peʼe ko te ʼu pepa lotu ʼae neʼe puke ʼae neʼe kotou foaki ki he tahi ʼi te faifakamafola, ʼe feala ke kotou tohi ki takotou pepa tanaki. Neʼe fai te ʼu lautohi ʼae neʼe puke maʼa tatou. Pea ko te ʼu lautohi ʼaia, ʼe feala ke tou fakaʼaogaʼi ʼi tatatou ako takitokotahi pea mo to ia te ʼu pulapula ʼo te moʼoni.—1 Ko. 3:6.