ʼE Lelei Koa Tokotou Mata?
1. Koteā te fakaʼuhiga ʼo te maʼu ʼo ‘he mata ʼe lelei’?
1 Ko te ʼu meʼa ʼaē ʼe tokaga tāfito kiai totatou ʼu mata ʼe malave ki te ʼu meʼa ʼaē ʼe tou fai. Koia, ʼe tuha ai ia te ʼu palalau ʼaenī neʼe fai e Sesu: “Koia, kapau ʼe lelei tou mata, pea ʼe mālamagia anai tou sino kātoa”! (Mat. 6:22) Ko totatou mata “ ʼe lelei” ʼi te faʼahi fakalaumālie mokā ʼe tokaga tāfito ki he meʼa ʼe tahi, ʼaē ko te fai ʼo te finegalo ʼo te ʼAtua. Kā tou fakamuʼamuʼa ia te Puleʼaga pea ʼe mole fakaleluʼi tātou ʼaki he ʼu koloa ʼe mole honatou ʼaoga peʼe ko he ʼu gāue ʼe natou toʼo totatou temi ʼaē ʼe tonu ke tou fakaʼaogaʼi ki te minisitelio.
2. Koteā ʼaē ʼe feala ke ina fakahalaʼi tatatou manatu ʼo ʼuhiga mo te ʼu meʼa ʼaē ʼe ʼaoga kiā tātou, kae koteā ʼaē kā tokoni mai anai?
2 ʼE ʼAoga Ke Tou Vakavakaʼi Ia Tātou Totonu: Ko tatatou mahino ki te ʼu meʼa ʼaē ʼe ʼaoga kiā tātou ʼe feala ke fakahalaʼi ʼaki te ʼu logo ʼaē ʼe fakahāhā ʼi te televisio, ʼe ʼui mai ai te ʼu meʼa ʼaē ʼe tonu ke tou toʼo peʼe ko tatatou sio ki te ʼu koloa ʼaē ʼe maʼu e te hahaʼi. ʼI muʼa ʼo hakotou fai he gāue peʼe kotou totogi he meʼa ʼe ina faʼao anai tokotou temi, peʼe ko takotou falā, peʼe ko tokotou mālohi, ʼe lelei anai ke kotou “lau te paʼaga ʼaē kā puli anai kiai,” ʼo kotou fai ia te fehuʼi ʼaenī: ‘ ʼAki te meʼa ʼaenī, ʼe lelei age koa taku tauhi kiā Sehova peʼe ina fakavaivai ifo?’ (Luka 14:28; Filp. 1:9-11) ʼE toe fakapotopoto hatatou vakavakaʼi ʼi ʼihi temi peʼe lava feafeaʼi hatatou maʼuli fakafeʼauga ke lahi age ia tatatou gāue ʼaē ʼi te minisitelio.—2 Ko. 13:5; Efe. 5:10.
3. Koteā ʼaē ʼe tou ako mai te tuagaʼane ʼaē neʼe ina fai te ʼu fetogi moʼo fakafaigafua tona maʼuli?
3 Ko te tuagaʼane, ʼi te kamata ʼo tana pioniē kātoa, neʼe ina filifili ke ina taupau tana gāue fakamālama ʼaho kātoa, logolā neʼe feala pē hana maʼu te ʼu meʼa ʼaē ʼe ʼaoga kiā ia ʼaki he gāue fakamālama vaeluaʼi ʼaho. Neʼe ina ʼui fēnei ki muli age: “ ʼE mole he tahi ʼe feala ke kaugana kiā pule e lua. Neʼe tonu ke au tuku ia te ʼu meʼa ʼaē neʼe au loto kiai kae ke au vakaʼi te ʼu meʼa ʼaē neʼe ʼaoga kiā au. Neʼe mahino kiā au ʼaki te temi, ʼe mole kei tou fakaʼaogaʼi ia te ʼu koloa pea ʼe au gaʼegaʼe mokā ʼe au faiga ke au maʼu te ʼu meʼa ʼaē ʼe au loto kiai.” Neʼe feala ke ina fai he ʼu fetogi moʼo fakafaigafua tona maʼuli, pea mo fetogi tana gāue, ʼo feala ai ke hoko atu tana selevisi pioniē.
4. He koʼē ʼe maʼuhiga ke tou taupau ʼi te temi nei ia he mata ʼe lelei?
4 ʼI te maʼuhiga ʼo te ʼu temi ʼaē ʼe tou māʼuʼuli ai, ʼe toe ʼāsili maʼuhiga age ke tou taupau ia he mata ʼe lelei. Kā fakalaka he ʼaho pea ʼe feala pē ke fakaʼuhiga ohagē ko he ʼaho kua tou fakaovi atu ai ki te fakaʼosi ʼo te tuʼu ʼaenī pea mo te kamata ʼo te mālama foʼou ʼa te ʼAtua. (1 Ko. 7:29, 31) Kapau ʼe tou tōkakaga tāfito ki te gāue fai fakamafola, pea ʼe feala ai ke tou haofaki ia tātou totonu pea mo nātou ʼaē ʼe fakalogo mai kiā tātou.—1 Tim. 4:16.