ʼE Kotou Lava Tokoni Koa Ki He ʼOhoana ʼo He Tehina Peʼe Ko He Tuagaʼane ʼe Mole Tauhi Kiā Sehova?
1 ʼE ʼi ai koa he ʼu tehina peʼe ko he ʼu tuagaʼane peʼe ko he ʼu kaugā fagona ʼi tokotou kōkelekāsio ko ʼonatou ʼohoana ʼe mole heʼeki tauhi kiā Sehova? Kapau ʼe ʼi ai he ʼu ʼaluʼaga fēia, pea ʼe mahino ia ko te kau fai fakamafola ʼaia ʼe natou fakaʼamu ke natou tauhi fakatahi mo ʼonatou hoa ʼi te tauhi moʼoni. Kae ʼe mole ko nātou pē ʼaia ʼe fakaʼamu ki te faʼahi ʼaia. Ohagē ko te ʼAtua, ʼe loto e te kōkelekāsio kātoa “ke haofaki te faʼahiga tagata fuli pē, pea ke natou aʼu ki te ʼatamai mālama totonu ʼo te moʼoni.” (1 Tim. 2:4) ʼE feafeaʼi hatatou tokoni ki he ʼohoana ʼo he tehina mo he tuagaʼane ʼe mole tauhi kiā Sehova?
2 ʼE tonu muʼa ke tou mahino ki te faʼahiga manatu ʼo te ʼohoana ʼaē ʼe mole tui kiā Sehova. Tokolahi te ʼu ʼohoana ʼe mole tui ʼe natou ʼoʼofa ki tonatou fāmili, pea ʼe natou faiga ke natou fakahoko fakalelei tonatou ʼu maʼua fakataumātuʼa, ʼo fēia ki tonatou ʼu maʼua ʼi tonatou ʼuhiga mātuʼa, kae ʼe natou tui mālohi ki te tahi lotu. ʼE lagi mole lahi tanatou mahino ʼaē ki te tauhi ʼa te kau Fakamoʼoni ʼa Sehova, gata pē ki te ʼu fakamatala hala ʼaē neʼe fai age kiā nātou e honatou kaumeʼa. ʼE lagi ko ʼihi ʼe mole natou faʼa leleiʼia te fakaʼaogaʼi ʼaē e tonatou ʼohoana ia tonatou temi ki te tauhi, he neʼe ko te temi ia ki muʼa atu neʼe natou fakaʼaogaʼi ki te fāmili. Kā tou maʼu te fakasiosio mamaʼo pea ʼe tokoni mai anai te kalitātē ʼaia kiā tātou, ke tou tokaga fakalelei mo aga fakaʼapaʼapa ki he ʼohoana ʼo he tehina mo he tuagaʼane ʼe mole tui, pea ke mole tou hoko ʼita mokā tou fai palalau mo ia.—Taag. 16:20-23.
3 Tou Tokagaʼi Te ʼu Meʼa ʼAē ʼe Ina Leleiʼia: ʼE lagi ʼi te kamata ke feala hakita taki mai ki te moʼoni he ʼohoana ʼo he tehina mo he tuagaʼane, ʼaua naʼa tou foimo palalau age ki te Tohi-Tapu, kae ʼaki pē takita aga ʼe feala ai hakita ʼaumai ʼo ia ki te moʼoni. (1 Pet. 3:1, 2) Pea ki te faʼahi ʼaia, ʼe maʼuhiga ke tou tokagaʼi te ʼu meʼa ʼaē ʼe ina leleiʼia. ʼE feala ki te ʼu tuagaʼane ʼo te kōkelekāsio ke natou tokagaʼi te ʼu meʼa ʼaē ʼe leleiʼia e te fafine ʼohoana ʼaē ʼe mole tui, pea ko te ʼu tehina ʼe feala ke natou toe fai fēia mo nātou ki te tagata ʼohoana ʼaē ʼe mole tui. ʼO feafeaʼi?
4 Kapau ʼe mole heʼeki kotou felāveʼi mo te ʼohoana ʼaē ʼe mole tui, ʼe lagi hoki kotou fai anai te faʼahi ʼaia mokā kua kotou ʼosi felōgoi mo te tehina peʼe ko te tuagaʼane ʼo ia te ʼohoana. ʼAua naʼa kotou lotomamahi mo kapau ʼi te ʼuluaki felāveʼi ʼe mole faʼa fiafia ia ia ʼaē ʼe mole tui. ʼE lagi feala pē anai ki tatatou agalelei pea mo tatatou tokagaʼi te ʼu meʼa ʼaē ʼe ina leleiʼia, ke fetogi ai ia tana faʼahiga manatu ʼaē ʼo ʼuhiga mo te kau Fakamoʼoni ʼa Sehova. (Loma 12:20) Ko te kau Kilisitiano kua fotufotuʼa ʼe lagi natou fakaafe anai te ʼohoana ʼaē ʼe mole tui mo tona fāmili ke natou kakai ʼi he afiafi, ʼaki te fakatuʼutuʼu ʼaē ke natou feʼiloʼiʼaki lelei pea ke fetogi ai tana ʼu faʼahiga manatu ʼaē neʼe ina lagi maʼu ʼo ʼuhiga mo tātou. ʼE fai palalau anai te ʼu Kilisitiano ʼaia ki te ʼu meʼa ʼaē ʼe leleiʼia e te ʼohoana ʼaē ʼe mole tauhi kiā Sehova, kae ʼe mole natou faiga anai ke natou fai palalau ki he ʼu manatu fakalaumālie. Ki muli age, mokā kua lelei te fai palalau, ʼe lagi feala ai leva ke natou fai palalau ki he ʼu manatu Fakatohi-tapu. Peʼe lagi ina tali anai hona fakaafe ki he fono ke sio tonu ai ki te ʼu meʼa ʼaē ʼe ako e tona ʼohoana, pea kua lelei heʼe kua feʼiloʼiʼaki mo ʼihi ʼo te kōkelekāsio. Tatau aipē peʼe mole heʼeki fia tauhi kiā Sehova, kae ʼe feala pē ke fakamālo age ki tana lagolago ʼaē ki tona ʼohoana ʼe tauhi ki te moʼoni.
5 ʼE tonu tāfito ki te kau tagata ʼāfea ke natou tokoni ki te ʼu ʼohoana ʼaē ʼe mole tui pea ke natou fakatokagaʼi te ʼu faigamālie ʼaē ke natou fai ai he fagonogono. ʼE lagi feala anai ki he ʼohoana ʼo he tehina peʼe ko he tuagaʼane neʼe mole ina tali he ʼu fai palalau Fakatohi-tapu, ke fia logo ki he ʼu fakalotomālohi Fakatohi-tapu mokā ʼe takoto mahaki ʼi te lōpitali peʼe kua tau mo hona mahaki kovi. Kapau ko he loto fale ʼe mole natou tauhi tahi pea ʼe natou felāveʼi mo he ʼu fihifihia, ohagē lā ko te mate ʼo he tahi ʼo te fāmili, ʼe lelei anai ke fakaafe e te kau tagata ʼāfea te ʼohoana ʼaē ʼe mole tui ke haʼu ʼo logo ki te ʼu tokoni ʼaē kā natou fai anai moʼo fakafīmālieʼi te fāmili.
6 Kotou fakafuafua age muʼa te fiafia ʼaē ʼe maʼu e he Kilisitiano ʼo te kōkelekāsio mokā tali e tona ʼohoana te moʼoni pea mo kau mo ia ki tauhi ʼaē kiā Sehova! Ko te taʼi ʼaluʼaga fakafiafia ʼaia ʼe hoko, ʼe toe fiafia ai foki mo Sehova, mo te kau ʼāselo, pea mo te kōkelekāsio kātoa. (Luka 15:7, 10) Kae kapau leva ia ʼe mole tali e te ʼohoana ʼaē ʼe mole tui ia te ʼu ʼuluaki fai palalau ʼaē ʼe tou fai mo nātou, ʼe tou fiafia aipē, he neʼe leleiʼia e Sehova ia tatatou ʼu faiga “[ʼe] mole . . . loto [ia] ke fakaʼauha he tahi kae ʼe loto ia ke aʼu te hahaʼi fuli ki te fakahemala.”—2 Pet. 3:9.
[ʼU fehuʼi ʼo te ako]
1. He koʼē ʼe mole gata pē ki te kau Kilisitiano ʼaē ʼe maʼuli ʼi he loto fale ʼe mavetevete ʼi te faʼahi ʼo te lotu, ʼe natou fakaʼamu ke natou tokoni ki ʼonatou ʼohoana ke natou tali te moʼoni?
2. Kapau ʼe tou maʼu te fakasiosio mamaʼo, pea ʼe tokoni feafeaʼi mai anai ki tatatou tōkakaga ʼaē ki he ʼohoana ʼo he tehina mo he tuagaʼane ʼe mole tui?
3. ʼI te kamata, koteā lā he faʼahiga fai ʼaē ʼe lagi lelei moʼo ʼaumai he ʼohoana ʼo he tehina peʼe ko he tuagaʼane ki te moʼoni?
4. ʼE feafeaʼi hatatou tōkakaga ki te ʼu meʼa ʼaē ʼe leleiʼia e te ʼohoana ʼo he tehina peʼe ko he tuagaʼane ʼe mole tauhi kiā Sehova?
5. ʼE lava tokoni feafeaʼi te kau tagata ʼāfea ki te ʼu ʼohoana ʼaē ʼe mole tauhi kiā Sehova?
6. He koʼē ʼe tou tokoni ki te ʼu ʼohoana ʼaē ʼe mole tui?
[Fakamatal ʼo te pasina 6]
ʼE lagi ʼi te kamata ke feala hakita taki mai ki te moʼoni he ʼohoana ʼo he tehina mo he tuagaʼane, ʼaua naʼa tou foimo palalau age ki te Tohi-Tapu, kae ʼaki pē takita aga ʼe feala ai hakita ʼaumai ʼo ia ki te moʼoni