Tou Tauʼi Te Faigataʼa ʼAē Ko Te Fai Fakamafola Ki Te Hahaʼi Tagata
1. Ko te ʼaluʼaga fea kua maʼuhiga ʼi te temi nei moʼo tokaga ki te ʼu gāue ʼo te Puleʼaga?
1 ʼI te hoholo ʼo te tuputupu ʼo te gāue ʼo te Puleʼaga ʼi te ʼu ʼaho fakaʼosi ʼaenī, ʼe maʼuhiga ke ʼi ai he ʼu tagata ʼe natou maʼu ia te ʼu fealagia fakalaumālie moʼo takitaki te gāue ʼaia. (Mko. 4:30-32; Gāue 20:28; 1 Tim. 3:1-13) Kae ʼi ʼihi koga meʼa, ʼe tokosiʼi age ia te hahaʼi tagata ʼi te hahaʼi fafine ʼaē ʼe natou tali ia te logo ʼo te Puleʼaga. ʼI ʼihi agaʼi fenua, ʼe tuku e te tagata ia te ʼu faʼahi fakalotu pea mo te akoʼi ʼo te fānau ki tona ʼohoana. ʼE feafeaʼi hatatou lava fakalotomālohiʼi he ʼu tagata ʼe tokolahi age, ke natou mahino ʼe ʼaoga kiā nātou ia te ʼu manatu fakalaumālie pea ke natou kau fakatahi mo tātou ki te tauhi moʼoni?
2. Neʼe fua lelei feafeaʼi ia te ʼu faiga ʼa Paulo pea mo Petelo ke nā fai fakamafola ki te hahaʼi tagata?
2 Tou Faiga ʼo Fai Fagonogono Ki Te Hahaʼi Tagata: Kā tali e te pule ʼo te fāmili ia te moʼoni, ʼi te agamāhani ʼe ina uga ia tona fāmili ke natou kau mo ia ki te tauhi maʼa. Ohagē lā ko Paulo pea mo Silasi, ʼi tonā pilisoniʼi ʼuhi ko tanā fai fakamafola, neʼe nā fai fakamafola ki te tagata leʼo ʼo te fale pilisoni. Ko te tagata leʼo pea mo tona fāmili kātoa neʼe natou papitema fuli. (Gāue 16:25-34) ʼAki te fai fakamafola ʼa Paulo ʼi Kolonito, ko “Kilisipo te pelesitā ʼo te sinakoka neʼe tui ki te ʼAliki pea mo tona loto fale kātoa.” (Gāue 18:8) Neʼe fakaʼaogaʼi e Sehova ia Petelo ke fakamafola kiā Kolonelio, ko te ofisie ʼo te kautau Loma ʼaē neʼe ʼui ko “he tagata tauhi fakamālotoloto pea mo manavasiʼi ki te ʼAtua.” Neʼe papitema Kolonelio pea mo tona fāmili pea mo tona ʼu kaumeʼa.—Gāue 10:1-48.
3. ʼO mulimuli ki te faʼifaʼitaki ʼa Filipo, ko ai te hahaʼi tagata “maʼuhiga” ʼaē ʼe feala ke kotou fai fakamafola ki ai?
3 Ko te fai fakamafola ki te hahaʼi tagata “maʼuhiga” ʼe feala ke ʼi ai hona ʼu fua ki ʼamuli. (1 Tim. 2:1, 2) Ohagē lā, neʼe fakatotonu e te ʼāselo ʼa Sehova kiā Filipo ke palalau ki “te tagata maʼu tuʼulaga” ʼaē neʼe pule ki te ʼu koloa fuli ʼo te fafine ʼaliki ʼo Etiopea. Neʼe logo ia Filipo ko te tagata ʼe ina “lolotoga lau leʼo lahi ia te tohi ʼo te polofetā ko Isaia,” pea neʼe ina fakamahino age ki ai ia te logo lelei ʼo ʼuhiga mo Sesu. Neʼe liliu ia te tagata Etiopea ʼaia ko he tisipulo pea ʼe mahino ia, neʼe ina fakamafola ia te logo lelei lolotoga tana toe liliu ʼaē ki tona fenua. Neʼe lagi toe fai fakamafola ki te fafine ʼaliki pea mo nātou ʼaē ʼi tona fale hau, ko he ʼu hahaʼi neʼe lagi mole feala ke natou logo ki te logo lelei.—Gāue 8:26-39.
4. Koteā ʼaē ʼe tou lava fai ke lahi age ia te ʼu faigamālie ʼaē ke logo ia te hahaʼi tagata ki te logo lelei?
4 ʼE Feafeaʼi Hatatou Maʼu He ʼu Hahaʼi Tagata ʼe Kaugamālie Age: Mai tona ʼaluʼaga ʼaē, ʼi te agamāhani ʼe gāue ia te hahaʼi tagata ʼi te ʼaho kātoa, ʼe feala koa ke kotou fakatuʼutuʼu ke lahi age tokotou temi fai fakamafola ʼi te ʼu afiafi, ʼi te ʼu fakaʼosi vāhaʼa peʼe ʼi te ʼu ʼaho mālōlō? Kapau ʼe kotou fakamafola tuʼumaʼu ʼi te ʼu telituale ʼo te ʼu matani gāue, ʼe kotou maʼu ai anai he tahi ʼu faigamālie ke kotou palalau mo te hahaʼi tagata ʼaē ʼe tahitahiga ia tonatou maʼu ʼi tonatou ʼu ʼapi. ʼE feala foki mo te ʼu tehina ke natou faiga tāfito ke natou fagonogono faigamālie ki tonatou ʼu kaugā gāue tagata. ʼI te fai fakamafola ʼi te ʼu ʼapi, tāfito ʼi he telituale ʼe gāueʼi tuʼumaʼu, ʼe feala ke kole e te ʼu tehina ʼi ʼihi lakaga ke natou palalau mo te pule ʼo te loto fale.
5. Koteā ʼaē ʼe tonu ke fai e he tuagaʼane mokā neʼe tali lelei e he tagata ia te logo ʼo te Puleʼaga?
5 Ko he tuagaʼane e tali lelei ia tana fai fakamafola e he tagata ʼe mole tonu ki te tuagaʼane ʼaia ke ina ʼaʼahi tokotahi ia te tagata. ʼE feala ke toe liliu ki ai mo tona ʼohoana peʼe ko he tahi tehina. Kā tuputupu ia te fia mahino ʼa te tagata ʼaia, pea ʼi te agamāhani ʼe lelei age ke tuku ia te ʼaʼahi ki he tehina.
6. ʼE tou lava faʼifaʼitaki feafeaʼi ia te ʼapositolo ko Paulo ke feala ai hatatou “maʼu he tokolahi”?
6 Tou Filifili Ia Te ʼu Manatu ʼAē ʼe Fia Palalau Kiai Te Hahaʼi Tagata: Neʼe lotomahino ia te ʼapositolo ko Paulo ki te hahaʼi ʼaē neʼe fakalogo ki tana fai fakamafola pea neʼe ina fakaʼalutahi ia tana ʼu palalau mo tonatou ʼu ʼaluʼaga, ke feala ai hana “maʼu he tokolahi.” (1 Ko. 9:19-23) ʼO toe fēia pē, ʼe tonu ke tou vakaʼi ia te ʼu manatu ʼaē ʼe fia palalau anai kiai te hahaʼi tagata pea mo tou teuteu kiai. Ohagē lā, ʼi te agamāhani ʼe tuʼaniaʼi e te hahaʼi tagata ia te ʼu fihifihia fakaekonomika, pea ʼe natou loto ki he puleʼaga ʼe lelei, pea mo natou tōkakaga ki te taupau ʼo tonatou fāmili pea mo tonatou maʼuli fīmālie. ʼE lagi natou fia palalau anai ki te tupuʼaga ʼaē ʼo tatatou māʼuʼuli ʼi te kele, mo te kā haʼu ʼo te kele, pea mo te tupuʼaga ʼo te fakagafua ʼaē e te ʼAtua ia te ʼu mamahi. ʼE fia fakalogo anai ia te hahaʼi ki te logo ʼo te Puleʼaga mo kapau ʼe tou maʼu ia te fakasiosio tonu ʼi tatatou palalau age ʼaē kiā nātou.—Taag. 16:23.
7. Koteā ʼaē ʼe lava fai e te kōkelekāsio ke malave lelei ai ia te moʼoni ki te ʼu ʼohoana ʼo te ʼu tuagaʼane ʼaē ʼe mole ʼi te moʼoni kae ʼomai ʼo fono?
7 Tou Tokoni Ki Te ʼu ʼOhoana ʼo Te ʼu Tuagaʼane ʼAē ʼe Mole Tauhi Tahi Mo Nātou: Logolā ʼi te agamāhani, ko te lelei ʼo te aga ʼo totatou ʼu tuagaʼane Kilisitiano ʼe malave lahi ki ʼonatou ʼohoana ʼaē ʼe mole tauhi tahi mo nātou, ʼe toe feala pē ki te hahaʼi ʼo te kōkelekāsio ke natou fai ni ʼu aga ʼe toe malave lelei anai kiā nātou ʼaia. (1 Pet. 3:1-4) Kā haʼu he tuagaʼane ki he fono mo tona ʼohoana ʼaē ʼe mole tauhi tahi mo ia, ko te tali kāiga lelei ʼaē ʼe fai age e te kōkelekāsio, ʼe feala ke liliu ko he faʼahiga fai fakamafola mālohi ki ai. Ko tana haʼu ki te fono ʼe lagi ko hana fia ʼiloʼi ia te moʼoni, pea ʼe feala ke ina tali ke fai hana ako Tohi-Tapu.
8. ʼE lava tokoni feafeaʼi ia te ʼu tehina ki te ʼu ʼohoana ʼo te ʼu tuagaʼane ʼaē ʼe mole ʼi te moʼoni kae natou fia palalau fakanounou pē ki te moʼoni?
8 ʼI te tahi age faʼahi, ko ʼihi tagata ʼohoana ʼi te kamata ʼe natou fia palalau fakanounou pē ki te moʼoni, kae ki muli age ʼe feala ke natou fia fai palalau ki te Tohi-Tapu mo he tehina ʼe felōgoi lelei mo nātou. Ko te ʼu tehina ʼo te tahi kōkelekāsio, neʼe natou faiga tāfito ʼi te ʼu temi ʼaē ʼe natou tautau ʼaʼahi ai te fāmili neʼe mole natou lotu tahi, ke natou fai palalau mo te ʼohoana ʼo te tuagaʼane ki te ʼu manatu neʼe natou ʼiloʼi ʼe fia loto kiai. Neʼe iku ia te faʼahi ʼaia ki he ʼu fai palalau ʼo ʼuhiga mo he ʼu manatu fakalaumālie, pea ʼi te temi nei kua papitema te tagata. ʼI te tahi age kōkelekāsio, ko te tehina neʼe tokoni ki te ʼohoana agalelei ʼo te tuagaʼane moʼo fakatuʼu ʼo te ʼā ʼo tona ʼapi. ʼI te fakahā ʼaia e te tehina ia tana tokagaʼi ia te tagata, neʼe kamata ai leva ia te ako Tohi-Tapu. (Kal. 6:10; Filp. 2:4) ʼU tehina Kilisitiano, he koʼē ʼe mole kotou faiga ke kotou fai palalau mo he tagata ʼohoana e tahi peʼe ko he ʼu tagata ʼohoana ʼaē ʼe mole ʼi te moʼoni?
9. Koteā ʼaē ʼe feala ke maʼu e te ʼu tehina Kilisitiano ʼaē ʼe akoako ki he ʼu maʼua?
9 Ke Akoako Te ʼu Tehina Ke Natou Fakahoko Te ʼu Maʼua: Ko te hahaʼi tagata ʼaē ʼe natou tali ia te logo ʼo te Puleʼaga pea mo fia fakahoko ia he ʼu pilivilēsio ʼi te tauhi ʼaē kiā Sehova, ʼe feala ke natou kau ʼi te “ ʼu meʼa ʼofa, ko he ʼu tagata,” ko he ʼu tagata ʼāfea ʼe natou fakaʼaogaʼi ia tonatou ʼu fealagia pea mo tonatou mālohi moʼo tauhi ia te ʼu kōkelekāsio ʼo te hahaʼi ʼa Sehova. (Efe. 4:8; Pes. 68:18) Ko te ʼu tagata ʼaia ʼe natou taupau ia te kōkelekāsio ʼaki he loto ʼe lelei pea mo he loto kātoa. (1 Pet. 5:2, 3) Ko he toe tapuakina lahi maʼa te ʼu tehina fuli!
10. Neʼe fua lelei feafeaʼi ki te tokolahi ia te ʼu faiga ʼa Ananiasi ke tokoni kiā Paulo?
10 Ohagē lā ko Saulo, neʼe liliu ia ko “he ʼapositolo ʼo te ʼu puleʼaga,” logolā ki muʼa atu neʼe ina fakatagaʼi ia te kau Kilisitiano. (Loma 11:13) Ko te tisipulo ko Ananiasi neʼe mole fia fakamafola kiā Saulo ʼuhi ko te faʼahi ʼaia. Kae neʼe fakalogo Ananiasi ki te takitaki ʼa te ʼAliki, pea neʼe fakamafola ki te tagata ʼaia, ʼaē neʼe liliu ki muli age ko te ʼapositolo ko Paulo. ʼAki te temi, ko te minisitelio ʼa Paulo neʼe fua lelei ki te ʼu toko lauʼi afe hahaʼi ʼaē neʼe natou logo ki tana fai fakamafola pea ko te ʼu toko lauʼi miliona hahaʼi ʼe kei natou maʼu pē ia te ʼu lelei ʼo tana ʼu tohi ʼaē ʼe tuʼu ʼi te Folafola ʼa te ʼAtua.—Gāue 9:3-19; 2 Tim. 3:16, 17.
11. He koʼē ʼe tonu ke tou fai ia te ʼu fetogi ʼaē ʼe ʼaoga moʼo fakamafola ki te hahaʼi tagata?
11 ʼOfa pē ke tou fai ia te ʼu fetogi ʼaē ʼe ʼaoga moʼo tou tauʼi ia te faigataʼaʼia ʼaē ko te fakamafola ki te hahaʼi tagata. ʼI tatatou faiga ʼaē ke tou fakahoko ia te fakatuʼutuʼu ʼaia, ʼe tou lava tui papau ki te tapuakina e Sehova ia tatatou ʼu faiga mālohi ʼaē ke tou fai ia tona finegalo pea mo tokaga lelei ki te ʼu gāue ʼo te Puleʼaga.