Ke “Kotou Fonu ʼi Te Loto Manavaʼofa”
1. Koteā ʼaē kua ʼaoga tāfito ki te hahaʼi iā ʼaho nei?
1 Neʼe mole heʼeki hoko he temi ohagē ko te temi ʼaenī, kua ʼaoga tāfito ki te hahaʼi ia he tokoni manavaʼofa. Kua liliu te hahaʼi ʼo mole kei natou fiafia, ʼo lotomamahi, pea mo heʼe ʼamanaki ʼuhi ko te ʼu ʼaluʼaga tokakovi ʼo te mālamanei. Ko te ʼu toko lauʼi miliona hahaʼi ʼe natou kumi tokoni, pea ko tātou ʼu Kilisitiano ʼe feala ke tou fakahā ia te loto manavaʼofa moʼoni ki ʼotatou kāiga. (Mat. 22:39; Kal. 6:10) ʼE feafeaʼi hatatou fakahā ia te taʼi loto manavaʼofa ʼaia?
2. Koteā te faʼahiga fakahā lelei ʼo te loto manavaʼofa ʼe tonu ke tou fai?
2 Ko He Gāue ʼe Hā Ai Te Loto Manavaʼofa: Ko te ʼu fakalotofīmālie moʼoni mo tologa ʼe haʼu fuli mai te ʼAtua. (2 Ko. 1:3, 4) ʼE loto e Sehova ke tou “fonu ʼi te loto manavaʼofa” pea ke tou ʼaʼahi totatou ʼu kāiga ʼo fakahā age kiā nātou ia te logo lelei ʼo te Puleʼaga. (1 Pet. 3:8) ʼAki tatatou fakahoko ia te gāue ʼaia, ʼe tou fakalotofīmālieʼi “ia nātou ʼaē ʼe lavea ʼonatou loto”, heʼe ko te Puleʼaga ʼo te ʼAtua ʼe ko te ʼamanaki moʼoni pē ʼaia e tahi ki te ʼu mamahi ʼo te mālamanei. (Isa. 61:1) Mai tona ʼaluʼaga ʼaē ʼe ʼofa ia Sehova ki tana hahaʼi, kua vave pē tana pulihi ia te agakovi pea mo fakatuʼu he mālama foʼou agatonu.—2 Pet. 3:13.
3. ʼE feafeaʼi hatatou faʼifaʼitakiʼi ia te faʼahiga tokaga ʼa Sesu ki te hahaʼi?
3 Tou Tokagaʼi Te Hahaʼi Ohagē Ko Sesu: Logolā neʼe fai fakamafola ia Sesu ki te ʼu hahaʼi tokolahi kae neʼe ina toe tokagaʼi ia nātou takitokotahi, ʼo mahino kiā ia ia te ʼaoga ʼaē ke natou faʼufaʼu hanatou ʼu felōgoi mo te ʼAtua. Neʼe natou hagē ko ni faga ovi ʼe mole ʼi ai honatou tagata tauhi. ʼAki te ʼu meʼa ʼaē neʼe ina sio kiai, neʼe malave ai ki te loto ʼo Sesu, ʼo uga ai ia ia ke ina akoʼi nātou ʼaki he loto faʼa kātaki fualoa. (Mko. 6:34) Kapau ʼe tou tokagaʼi te hahaʼi ohagē ko Sesu, ʼe tou fia fakahā anai ia he loto manavaʼofa moʼoni kiā nātou takitokotahi. ʼE feala ke tou fakahā ia te faʼahi ʼaia ʼaki tatatou faʼahiga palalau pea mo te agaaga ʼo totatou fofoga. ʼE tou fakamuʼamuʼa tuʼumaʼu anai ia te gāue fai fakamafola, pea ko te ʼu kupu ʼaē kā tou fakaʼaogaʼi ʼe tāu pea mo te ʼu meʼa ʼaē ʼe ʼaoga ki te hahaʼi takitokotahi.—1 Ko. 9:19-23.
4. He koʼē ʼe tonu ke tou kofuʼi ia te loto manavaʼofa?
4 Ko he hahaʼi tokolahi ʼaē ʼe mavae mai te ʼu puleʼaga fuli ʼe natou tali lelei ia te logo ʼo ʼuhiga mo te Puleʼaga, pea ʼe ʼiloga iā nātou tanatou fia ʼiloʼi te logo ʼaia. Kapau ʼe tou haga kofuʼi ia te loto manavaʼofa, pea ʼe tou fakamaʼuhigaʼi anai pea mo tou fakafiafia totatou ʼAtua loto manavaʼofa ko Sehova.—Kol. 3:12.