Koteā Te Tupuʼaga ʼo Takotou Fiafia?
1. He koʼē ʼe tou fiafia ʼi te fakaʼosi māhina fuli?
1 Kā hoko mai te fakaʼosi ʼo te māhina pea kā fakaʼui mai tatatou pepa tānaki gāue, he koʼē ʼe tou fiafia? ʼE tou fiafia he neʼe tou gāue kiā Sehova ʼaki totatou loto kātoa, tatau aipē peʼe tou pioniē makehe ʼo fai hola e 130 pe neʼe tou fai pē iā minuta e 15.—Pes. 100:2.
2. He koʼē ʼe tonu ke tou tauhi fakamālotoloto kiā Sehova?
2 ʼI tona ʼuhiga Tuʼi ʼAliki ʼo te ʼatulaulau, ʼe tuha mo Sehova ke tou foaki age kiā te ia te meʼa ʼaē ʼe lelei ʼaupitō. (Mala. 1:6) ʼUhi ko totatou ʼofa ʼaē kiā te ia, neʼe tou foaki totatou maʼuli moʼo fai tona finegalo. Koia, ʼi te fakaʼosi ʼo te ʼaho peʼe ko te fakaʼosi ʼo te māhina, kapau ʼe tou ʼiloʼi papau neʼe tou foaki te ʼu “uluaki fua” ʼo totatou temi, mo totatou faiva, pea mo totatou mālohi ʼi te tauhi ʼaē kiā Sehova, pea ʼe mahino ia ʼe tou fiafia anai. (Taag. 3:9) Kae, kapau ʼe hoha totatou leʼo ʼo loto, pea ʼe tonu ai leva ke tou fakakaukauʼi peʼe koteā ʼaē ʼe tou lava fai moʼo hikihiki tatatou gāue.—Loma 2:15.
3. He koʼē ʼe mole lelei hatatou fakatatau kiā ʼihi?
3 ʼE Mole Tou Fakatatau Ki He Tahi Age: ʼE mole lelei hatatou fakatatau kiā ʼihi, peʼe kiā tātou ʼi te temi ʼaē neʼe kei tou mālolohi ai. Ko te ʼu ʼaluʼaga ʼe fetogi. ʼE kehekehe ʼotatou fealagia. Ko te fai ʼo he ʼu fakatatau, ʼe iku tuʼumaʼu ki te fakataupiepie peʼe ki te lotomamahi. (Kal. 5:26; 6:4) Ko Sesu, neʼe mole ina fai he ʼu fakatatau. Kae, neʼe ina vikiʼi he tahi ʼuhi ko te meʼa ʼaē neʼe feala ke ina fai.—Mko. 14:6-9.
4. Koteā te ʼu ako maʼuhiga ʼe tou maʼu mai te lea fakatā ʼa Sesu ʼo ʼuhiga mo te ʼu tenalio?
4 ʼI te lea fakatā ʼa Sesu ʼo ʼuhiga mo te ʼu tenalio, neʼe tahi maʼu e te kau gāue ia te ʼu tenalio “o mulimuli ki te fealagia a te tagata taki tahi.” (Mat. 25:15) ʼI te liliu mai ʼo te pule mai tana folau, neʼe ina sivisivi tanatou gāue. Ko natou ʼaē neʼe gāue kinakina ʼo mulimuli ki ʼonatou fealagia pea mo ʼonatou ʼaluʼaga, neʼe vikiʼi nātou pea neʼe natou fiafia mo tonatou pule. (Mat. 25:21, 23) ʼUhi ko tatatou nonofo maʼumaʼua ʼi te gāue fai fakamafola ʼo te Puleʼaga, ʼe tou falala ʼe leleiʼia tātou e te ʼAtua pea ʼe tou maʼu ai he tupuʼaga ʼo tatatou fiafia!